ಇಂದು ವಿಶ್ವ ಆತ್ಮಹತ್ಯೆ ತಡೆ ದಿನ: ಸಾವಿಗೆ ಶರಣಾಗಿ ಸಾಧಿಸುವುದೇನಿಲ್ಲ, ಬದುಕಿ ಜಯಿಸೋಣ..

ಆತ್ಮಹತ್ಯೆಯ ಭೂತ ಯಾವ ದೇಶವನ್ನೂ ಬಿಟ್ಟಿಲ್ಲ. ವಿಶ್ವದೆಲ್ಲೆಡೆ ಆತ್ಮಹತ್ಯೆ ಮಾಡಿಕೊಳ್ಳುವವರ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಲೇ ಇದೆ. ಇದಕ್ಕೆ ವೈಯಕ್ತಿಕ, ಆ ದೇಶದ ಸಾಂಸ್ಕೃತಿಕ, ಧಾರ್ಮಿಕ, ಲಿಂಗ ಅಥವಾ ಜೀವನ ಶೈಲಿಗಳು ಕಾರಣವಾಗಿರುತ್ತದೆ. ಭಾರತದಲ್ಲೂ ವರ್ಷಕ್ಕೆ ಲಕ್ಷಕ್ಕಿಂತ ಹೆಚ್ಚು ಜನರು ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. ಅಮೂಲ್ಯವಾದ ಬದುಕನ್ನು ಯಾವುದೋ ಕಾರಣಕ್ಕಾಗಿ ಕಳೆದುಕೊಳ್ಳುವ ಪ್ರವೃತ್ತಿ ದಿನೇ ದಿನೇ ಹೆಚ್ಚುತ್ತಿದೆ. ಈ ಬಗ್ಗೆ ಜಾಗೃತಿ ಮೂಡಿಸುವ ಉದ್ದೇಶದಿಂದ ವಿಶ್ವದೆಲ್ಲೆಡೆ ಪ್ರತಿ ವರ್ಷ ಸೆಪ್ಟೆಂಬರ್‌ 10ರಂದು ವಿಶ್ವ ಆತ್ಮಹತ್ಯೆ ತಡೆ ದಿನ ಆಚರಿಸಲಾಗುತ್ತಿದೆ.

ಪ್ರತಿ ಜೀವಿಯ ಹುಟ್ಟು ಆಕಸ್ಮಿಕ ಹಾಗೂ ಸಾವು ನಿಶ್ಚಿತ. ಯಾವೊಬ್ಬ ಮನುಷ್ಯನೂ ತನ್ನ ಆಯ್ಕೆಯಂತೆ ಜನಿಸಲು ಸಾಧ್ಯವಿಲ್ಲ. ಸಾವು ನಿಶ್ಚಿತವಾದರೂ ಅದನ್ನು ನಾವೇ ಆಹ್ವಾನಿಸುವುದು ಎಷ್ಟು ಸರಿ? ಅದನ್ನು ಆಯ್ಕೆ ಮಾಡಿಕೊಳ್ಳುವ ಸ್ವಾತಂತ್ರ್ಯ ನಮಗಿದೆಯೇ? ಖಂಡಿತವಾಗಿಯೂ ಇಲ್ಲ. ಪ್ರತಿ ಜೀವಿಯು, ವಸ್ತುಗಳೂ ಪರಿಸರದ ಒಂದು ಅಂಗ. ಅದರಂತೆ ಮನುಷ್ಯನೂ ಸಮುದಾಯದ ಒಂದು ಭಾಗ.

ಜಗತ್ತಿನಲ್ಲಿ ಆತ್ಮಹತ್ಯೆ ಪ್ರಕರಣಗಳನ್ನು ತಡೆಗಟ್ಟುವ ನಿಟ್ಟಿನಲ್ಲಿ ಈ ದಿನವನ್ನು ಆಯೋಜಿಸಲು ಅಂತಾರಾಷ್ಟ್ರೀಯ ಆತ್ಮಹತ್ಯೆ ತಡೆಗಟ್ಟುವ ಸಂಘ (ಐಎಎಸ್​​ಪಿ), ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್‌ಒ) ಮತ್ತು ವಿಶ್ವ ಮಾನಸಿಕ ಆರೋಗ್ಯ ಒಕ್ಕೂಟ (ಡಬ್ಲ್ಯುಎಫ್‌ಎಂಹೆಚ್)ದ ಸಹಯೋಗದೊಂದಿಗೆ ಇದನ್ನು ಆಚರಿಸಲಾಗುತ್ತದೆ. 'ಆತ್ಮಹತ್ಯೆ ತಡೆಗಟ್ಟಲು ಎಲ್ಲರೂ ಒಟ್ಟಾಗಿ ಕೆಲಸ ಮಾಡೋಣ' ಎಂಬ ವಿಷಯದೊಂದಿಗೆ ಈ ಬಾರಿ ವಿಶ್ವ ಆತ್ಮಹತ್ಯೆ ತಡೆ ದಿನ ಆಚರಿಸಲಾಗುತ್ತಿದೆ.

ಆತ್ಮಹತ್ಯೆ ತಡೆಗಟ್ಟುವುದು ಸಾರ್ವತ್ರಿಕ ಸವಾಲಾಗಿದೆ. ಪ್ರತಿ ವರ್ಷ ಎಲ್ಲಾ ವಯಸ್ಸಿನ ಜನರ ಸಾವಿಗೆ 20 ಪ್ರಮುಖ ಕಾರಣಗಳು ಇವೆ. ಇವುಗಳಿಂದ 800,000ಕ್ಕೂ ಹೆಚ್ಚು ಸಾವುಗಳಿಗೆ ಸಂಭವಿಸಿವೆ. ಅಂದರೆ ಪ್ರತಿ 40 ಸೆಕೆಂಡಿಗೆ ಒಂದು ಆತ್ಮಹತ್ಯೆ ನಡೆಯುತ್ತಿದೆ.

ಕಳೆದು ಹೋದ ಪ್ರತಿಯೊಬ್ಬರ ಜೀವನವೂ ಇನ್ನೊಬ್ಬರ ಪಾಲುದಾರ, ಮಗು, ಪೋಷಕರು, ಸ್ನೇಹಿತ ಅಥವಾ ಸಹೋದ್ಯೋಗಿಯನ್ನು ಪ್ರತಿನಿಧಿಸುತ್ತದೆ. ಪ್ರತಿ ಆತ್ಮಹತ್ಯೆಗೆ ಸರಿಸುಮಾರು 135 ಜನರು ತೀವ್ರ ದುಃಖವನ್ನು ಅನುಭವಿಸುತ್ತಾರೆ ಅಥವಾ ಅದರ ಪರಿಣಾಮ ಅನುಭವಿಸುತ್ತಾರೆ. ಪ್ರತಿ ಆತ್ಮಹತ್ಯೆಯಿಂದ ಸುಮಾರು 25 ಜನರು ಆತ್ಮಹತ್ಯೆ ಪ್ರಯತ್ನ ಮಾಡುತ್ತಾರೆ.

ಅಂಕಿ ಅಂಶಗಳು:

ಕಳೆದ 45 ವರ್ಷಗಳಲ್ಲಿ ವಿಶ್ವಾದ್ಯಂತ ಶೇ. 60ರಷ್ಟು ಪ್ರಕರಣಗಳು ಹೆಚ್ಚಾಗಿವೆ. ಜಾಗತಿಕವಾಗಿ ಸಂಭವಿಸುವ ಸಾವಿಗೆ ಆತ್ಮಹತ್ಯೆ 15ನೇ ಪ್ರಮುಖ ಕಾರಣವಾಗಿದೆ. ಎಲ್ಲಾ ಸಾವುಗಳಲ್ಲಿ ಆತ್ಮಹತ್ಯೆಯೂ ಶೇ.1.4ರಷ್ಟಿದೆ ಮತ್ತು ಜಾಗತಿಕ ಆತ್ಮಹತ್ಯೆ ಪ್ರಮಾಣ 100,000 ಜನಸಂಖ್ಯೆಗೆ 11.4 ಆಗಿದೆ.

• ಪುರುಷರ ಪ್ರಮಾಣ - 15.0 / 100 000
• ಮಹಿಳೆಯರ ಪ್ರಮಾಣ - 8.0 / 100 000
• ಅನೇಕ ಯುರೋಪಿಯನ್ ದೇಶಗಳಲ್ಲಿ 15-24 ವರ್ಷ ವಯಸ್ಸಿನವರು ಹೆಚ್ಚು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆ. ವಯಸ್ಕರಲ್ಲಿ ಜಾಗತಿಕವಾಗಿ ಆತ್ಮಹತ್ಯೆ ಪ್ರಮಾಣ ಸ್ತ್ರೀಯರಿಗಿಂತ ಪುರುಷರಲ್ಲೇ ಹೆಚ್ಚಾಗಿದೆ.
• 2012ರಲ್ಲಿ ಶೇ.76ರಷ್ಟು ಜಾಗತಿಕ ಆತ್ಮಹತ್ಯೆ ಕಡಿಮೆ ಮತ್ತು ಮಧ್ಯಮ-ಆದಾಯದ ದೇಶಗಳಲ್ಲಿ ಸಂಭವಿಸಿದೆ. ಅದರಲ್ಲಿ ಶೇ.39ರಷ್ಟು ಆಗ್ನೇಯ ಏಷ್ಯಾ ದೇಶಗಳಲ್ಲಿ ಸಂಭವಿಸಿದೆ.
• ಶರಿಯಾ ಕಾನೂನಿನ ಪ್ರಕಾರ 25 ದೇಶಗಳಲ್ಲಿ (ಡಬ್ಲ್ಯುಎಚ್‌ಒ ಸದಸ್ಯ ರಾಷ್ಟ್ರಗಳಲ್ಲಿ) ಆತ್ಮಹತ್ಯೆಯನ್ನು ಇನ್ನೂ ಅಪರಾಧೀಕರಿಸಲಾಗಿದೆ. ಹೆಚ್ಚುವರಿ 20 ದೇಶಗಳಲ್ಲಿ ಆತ್ಮಹತ್ಯೆ ಪ್ರಯತ್ನ ಮಾಡುವವರಿಗೆ ಜೈಲು ಶಿಕ್ಷೆ ವಿಧಿಸಬಹುದು.

ಆತ್ಮಹತ್ಯಾ ಭಾವನೆಗಳು ಯಾವುವು?:

• ಆತ್ಮಹತ್ಯೆಯು ಆನುವಂಶಿಕ, ಮಾನಸಿಕ, ಸಾಮಾಜಿಕ ಮತ್ತು ಸಾಂಸ್ಕೃತಿಕ ಅಪಾಯಕಾರಿ ಅಂಶಗಳನ್ನು ಒಳಗೊಂಡಿದೆ. ಆದರೆ ಸೀಮಿತವಾಗಿರದ ಅಪಾಯಕಾರಿ ಅಂಶಗಳ ಒಮ್ಮುಖದ ಪರಿಣಾಮವಾಗಿದೆ. ಕೆಲವೊಮ್ಮೆ ಆಘಾತ ಮತ್ತು ನಷ್ಟದ ಅನುಭವಗಳೊಂದಿಗೆ ಸಂಯೋಜಿಸಲ್ಪಟ್ಟಿದೆ.
• ಆತ್ಮಹತ್ಯೆಯಿಂದ ಸಾಯುವ ಜನರಲ್ಲಿ ಖಿನ್ನತೆಯು ಸಾಮಾನ್ಯವಾಗಿ ಕಂಡುಬರುವ ಮಾನಸಿಕ ಅಸ್ವಸ್ಥತೆಯಾಗಿದೆ.
• ಆತ್ಮಹತ್ಯೆಯಿಂದ ಸಾಯುವ ಹೆಚ್ಚಿನ ಆದಾಯದ ದೇಶಗಳಲ್ಲಿ ಶೇ.50ರಷ್ಟು ವ್ಯಕ್ತಿಗಳು ತಮ್ಮ ಸಾವಿನ ಸಮಯದಲ್ಲಿ ದೊಡ್ಡ ಖಿನ್ನತೆಯಿಂದ ಬಳಲುತ್ತಿರುತ್ತಾರೆ.
• ಪ್ರತಿ ಒಂದು ಆತ್ಮಹತ್ಯೆಗೆ 25 ಜನರು ಆತ್ಮಹತ್ಯೆ ಪ್ರಯತ್ನವನ್ನು ಮಾಡುತ್ತಾರೆ. 135 ಜನರು ಪ್ರತಿ ಆತ್ಮಹತ್ಯೆ ಸಾವಿನಿಂದ ಪ್ರಭಾವಿತರಾಗುತ್ತಾರೆ. ಇದು ಪ್ರತಿವರ್ಷ ವಿಶ್ವಾದ್ಯಂತ ಆತ್ಮಹತ್ಯೆಯಿಂದ ಬಳಲುತ್ತಿರುವ 108 ದಶಲಕ್ಷ ಜನರಿಗೆ ಸಮನಾಗಿರುತ್ತದೆ.
• ಆತ್ಮಹತ್ಯೆಗೆ ಮಾನಸಿಕ ಸ್ಥಿಮಿತತೆ ಕಳೆದುಕೊಳ್ಳುವುದು ಒಂದು ಕಾರಣವಾಗಿದೆ.
• ಕುಟುಂಬ ಮತ್ತು ಸುತ್ತಲಿನ ಪರಿಸರವೂ ಆತ್ಮಹತ್ಯೆಗೆ ಕಾರಣವಾಗುತ್ತದೆ.

ಆತ್ಮಹತ್ಯೆಯ ಎಚ್ಚರಿಕೆ:

• ಅತಿಯಾದ ದುಃಖ ಅಥವಾ ಆಗಾಗ ಚಿತ್ತ ಸ್ಥಿತಿಯ ಬದಲಾವಣೆಗಳು
• ಹತಾಶತೆ-ಭವಿಷ್ಯದ ಬಗ್ಗೆ ಭರವಸೆ ಕಳೆದುಕೊಳ್ಳುವುದು.
• ನಿದ್ರೆಯ ಸಮಸ್ಯೆ-ಇದು ದೀರ್ಘಕಾಲದ ನಿದ್ರಾಹೀನತೆಗೆ ಕಾರಣವಾಗಬಹುದು.
• ಹಠಾತ್ ಶಾಂತತೆ
• ಸಾಮಾಜಿಕ ವಾಪಸಾತಿ- ಒಂಟಿತನ, ಕುಟುಂಬ, ಸ್ನೇಹಿತರಿಂದ ದೂರವಿರುವುದು.
• ಅಸಡ್ಡೆ, ಡ್ರಗ್ಸ್ ಮತ್ತು ಆಲ್ಕೋಹಾಲ್ ತೆಗೆದುಕೊಳ್ಳುವುದು, ನಿಮ್ಮ ದೇಹದ ಭಾಗಗಳನ್ನು ಕೊಯ್ದುಕೊಳ್ಳುವುದು.

ಆತ್ಮಹತ್ಯೆ ತಡೆಗಟ್ಟಲು ಇರುವ ಸವಾಲುಗಳು:

• ಸಾಕಷ್ಟು ಸಂಪನ್ಮೂಲಗಳು ಇಲ್ಲ
• ಪರಿಣಾಮಕಾರಿಯಲ್ಲದ ಸಮನ್ವಯತೆ
• ಜಾರಿಗೊಳಿಸಿದ ಮಾರ್ಗಸೂಚಿಗಳ ಕೊರತೆ
• ಸ್ವತಂತ್ರ ಮತ್ತು ವ್ಯವಸ್ಥಿತ ಮೌಲ್ಯಮಾಪನದ ಕೊರತೆ
• ಆತ್ಮಹತ್ಯೆಯನ್ನು ತಡೆಗಟ್ಟುವ 2014 ರ ಡಬ್ಲ್ಯುಎಚ್‌ಒ ಜಾಗತಿಕ ವರದಿಯಿಂದ, ಆತ್ಮಹತ್ಯೆ ತಡೆಗಟ್ಟುವಲ್ಲಿ ಪ್ರಗತಿ ನಡೆಯುತ್ತಿದೆ. ಅನೇಕ ದೇಶಗಳು 2ನೇ ರಾಷ್ಟ್ರೀಯ ಆತ್ಮಹತ್ಯೆ ತಡೆಗಟ್ಟುವ ಕಾರ್ಯಕ್ರಮವನ್ನು ಪ್ರಾರಂಭಿಸಿವೆ. ಅವುಗಳೆಂದರೆ: ಸ್ಕಾಟ್ಲೆಂಡ್, ಇಂಗ್ಲೆಂಡ್, ಐರ್ಲೆಂಡ್ ಮತ್ತು ಯುನೈಟೆಡ್ ಸ್ಟೇಟ್ಸ್.

ಆತ್ಮಹತ್ಯೆ ತಡೆಗೆ ನಮ್ಮ ಪಾತ್ರ:

• ಯಾವುದೋ ಒಬ್ಬ ವ್ಯಕ್ತಿ ಖಿನ್ನನಾಗಿದ್ದಾನೆಂದರೆ, ಸಾವಿನ ಕುರಿತು ಮಾತಾಡುತ್ತಿದ್ದಾನೆಂದರೆ ಅವರನ್ನು ಒಂದೆರಡು ಗಂಟೆ, ದಿನಗಳ ಮಟ್ಟಿಗೆ ನಮ್ಮ ಆಪ್ತ ಪರಿಧಿಯೊಳಗೆ ಇಟ್ಟುಕೊಳ್ಳುವುದು.
• ನೋವಿಗೆ ಸಮಯ ಕೊಡುವ, ಸಮಸ್ಯೆಗೆ ಕಿವಿಯಾಗುವ ಕನಿಷ್ಠ ಹೃದಯವಂತಿಕೆ ತೋರಿಸುವುದು.
• ಕ್ತಿಗೆ ಸಾಮಾಜಿಕ ಸಂಸ್ಕಾರ-ಬದ್ಧತೆ, ಕೌಟುಂಬಿಕ ಜವಾಬ್ದಾರಿ, ವೈಯಕ್ತಿಕ ಮಹತ್ವದ ಕುರಿತು, ತಿಳುವಳಿಕೆ ಸಿಕ್ಕರೆ ಅರ್ಧದಷ್ಟುಆತ್ಮಹತ್ಯೆಗಳು ನಿಲ್ಲುತ್ತವೆ.
• ಖಿನ್ನತೆಯಂತಹ ಕಾಯಿಲೆಗೆ ಆಸ್ಪತ್ರೆಗಳಿವೆ.
• ಸಮುದಾಯದ ಸಂಪರ್ಕ, ಸಂವಹನದ ಜೊತೆಗೆ ಹವ್ಯಾಸ, ಸೃಜನಾತ್ಮಕ ಚಟುವಟಿಕೆ, ಸಮಸ್ಯೆ ನಿವಾರಣೆಗೆ ಮನಸ್ಸು ತಯಾರಿಡುವುದು.
• ಯಶಸ್ಸೇ ಬದುಕಲ್ಲ ಎನ್ನುವ ಸರಳ ಸೂತ್ರವನ್ನು ಪ್ರತಿಯೊಬ್ಬರೂ ಅಳವಡಿಸಿಕೊಂಡು ಆರೋಗ್ಯ ಸಮಾಜ ನಿರ್ಮಾಣಕ್ಕೆ ಕೈಜೋಡಿಸುವುದು.

ಸಮುದಾಯದ ಮಹತ್ವ:

• ನಾವೆಲ್ಲರೂ ಸಮುದಾಯದ ಭಾಗವಾಗಿದ್ದೇವೆ, ಕುಟುಂಬ, ಸ್ನೇಹಿತರು, ಕೆಲಸದ ಸಹೋದ್ಯೋಗಿಗಳು, ನೆರೆಹೊರೆಯವರೊಂದಿಗೆ ಸಂಪರ್ಕ ಹೊಂದಿದ್ದರೆ, ಕೆಲವು ಆತಂಕಗಳನ್ನು ನಿವಾರಿಸಲು ಸಮುದಾಯ ಸಹಾಯ ಮಾಡುತ್ತದೆ.
• ಕೆಲವೊಮ್ಮೆ ನಾವು ನಮ್ಮ ಕುಟುಂಬ, ಗೆಳೆಯರೊಂದಿಗೆ ಪ್ರತ್ಯೇಕವಾಗಿ, ಅವರ ಸಂಪರ್ಕ ಕಡಿತಗೊಳಿಸುತ್ತೇವೆ.
• ನಮ್ಮ ಸಮುದಾಯಗಳಲ್ಲಿ ದುರ್ಬಲರಾಗುವವರನ್ನು ಬೆಂಬಲಿಸುವ ಮತ್ತು ಅಧಿಕಾರ ನೀಡುವ ಜವಾಬ್ದಾರಿ ನಮ್ಮ ಮೇಲಿದೆ.
• ಅವರೊಂದಿಗೆ ಮಾತನಾಡಿ ಸಲಹೆ ನೀಡುವ ಮೂಲಕ ಮತ್ತು ಅವರಿಗೆ ಬೆಂಬಲವನ್ನು ನೀಡುವ ಮೂಲಕ ನೀವು ಅವರ ನಿರ್ಧಾರವನ್ನು ಬದಲಾಯಿಸಬಹುದು.

ಭಾರತದಲ್ಲಿ ಆತ್ಮಹತ್ಯೆ ಪ್ರಮಾಣ:

ಪ್ರತಿ ವರ್ಷ ನಮ್ಮ ದೇಶದಲ್ಲಿ 1,00,000ಕ್ಕೂ ಹೆಚ್ಚು ಜನರು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆ. ವೃತ್ತಿಪರ/ವೃತ್ತಿ ಸಮಸ್ಯೆಗಳು, ಪ್ರತ್ಯೇಕತೆಯ ಪ್ರಜ್ಞೆ, ನಿಂದನೆ, ಹಿಂಸೆ, ಕೌಟುಂಬಿಕ ಸಮಸ್ಯೆಗಳು, ಮಾನಸಿಕ ಅಸ್ವಸ್ಥತೆ, ಮದ್ಯದ ಚಟ, ಆರ್ಥಿಕ ನಷ್ಟ, ದೀರ್ಘಕಾಲದ ನೋವು ಮುಂತಾದವು ಆತ್ಮಹತ್ಯೆಗೆ ಕಾರಣಗಳಾಗಿವೆ.

2019ರಲ್ಲಿ ದೇಶದಲ್ಲಿ ಒಟ್ಟು 1,39,123 ಆತ್ಮಹತ್ಯೆ ಪ್ರಕರಣಗಳು ವರದಿಯಾಗಿದ್ದು, 2018ಕ್ಕೆ ಹೋಲಿಸಿದರೆ ಶೇ.3.4ರಷ್ಟು ಹೆಚ್ಚಳವಾಗಿದೆ. 2019ರಲ್ಲಿ ಪ್ರತಿದಿನ 381 ಜನರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. 2019ರ ವರ್ಷದಲ್ಲಿ ಸುಮಾರು 1 ಲಕ್ಷದ 39 ಸಾವಿರದ 123 ಸಾವುಗಳು ಆತ್ಮಹತ್ಯೆಯಿಂದ ಸಂಭವಿಸಿವೆ. ದೇಶದಲ್ಲಿ ಆತ್ಮಹತ್ಯೆ ಪ್ರಮಾಣ ಶೇ.10.4ಗಿಂತ ಹೆಚ್ಚಾಗಿದೆ. ಶೇ.32.4ರಷ್ಟು ಪ್ರಕರಣಗಳ ಹಿಂದೆ ಕೌಂಟುಂಬಿಕ ವಿವಾದಗಳು, ಶೇ.5.5ರಷ್ಟು ಆತ್ಮಹತ್ಯೆಯ ಹಿಂದೆ ವಿವಾಹವಾದರು, ಶೇ.17.1ರಷ್ಟು ಆತ್ಮಹತ್ಯೆಯ ಹಿಂದೆ ಅನಾರೋಗ್ಯದ ಕಾರಣ ಇದೆ.

ಶೇ.70.2ರಷ್ಟು ಪುರುಷರು, ಶೇ.29.8ರಷ್ಟು ಮಹಿಳೆಯರು ಆತ್ಮಹತ್ಯೆ ಮಾಡಿಕೊಂಡಿದ್ದು, ಹೆಚ್ಚಾಗಿ ಮಹಾರಾಷ್ಟ್ರ, ತಮಿಳುನಾಡು, ಮಧ್ಯಪ್ರದೇಶ, ಪಶ್ಚಿಮ ಬಂಗಾಳ ಮತ್ತು ಕರ್ನಾಟಕ ರಾಜ್ಯಗಳಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

• ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡವರು - ಶೇ.53
• ವಿಷ ಸೇವಿಸಿದವರು - ಶೇ.25.8
• ನೀರಿನಲ್ಲಿ ಮುಳುಗಿ ಸತ್ತವರು - ಶೇ.5.2
• ಸೆಲ್ಫ್​ ಇಮೊಲೇಷನ್​​ ಮಾಡಿಕೊಂಡವರು - ಶೇ.3.8

ನಿಮ್ಮ ಬಳಿ ಆತ್ಮಹತ್ಯೆ ಮಾಡಿಕೊಳ್ಳಲು ಇಚ್ಚಿಸಿರುವವರು ಸಮಸ್ಯೆ ಅಥವಾ ನೋವನ್ನು ಹೇಳಿಕೊಂಡಾದ ಅದನ್ನು ಕಡೆಗಣಿಸಬೇಡಿ. ಇದು ಆತ್ಮಹತ್ಯೆ ಮಾಡಿಕೊಳ್ಳುವಂಥ ಗಂಭೀರ ಸಮಸ್ಯೆ ಏನಲ್ಲ ಎಂದ ಭಾವಿಸಬೇಡಿ. ನಿಮಗೆ ಅದು ಗಭೀರವಲ್ಲದಿದ್ದರೂ ಅವರು ಅದನ್ನು ಹೇಗೆ ಸ್ವೀಕರಿಸಿದ್ದಾರೆ ಎನ್ನುವುದು ಮುಖ್ಯವಾಗುತ್ತದೆ. ಜೀವನಕ್ಕೆ ಹೆದರಿ ಆತ್ಮಹತ್ಯೆಗೆ ಶರಣಾಗುವವರಿಗೆ ಜೀವನ ಬೆಲೆ ತಿಳಿದಿರುವುದಿಲ್ಲ. ಅವರಿಗೆ ಸಣ್ಣ ವಿಷಯವೂ ದೊಡ್ಡದಾಗಿಯೇ ಕಾಣುತ್ತದೆ.