ಗಾಜಿಯಾಬಾದ್ (ನವದೆಹಲಿ) : ನಗರದ ಸಾಹಿಬಾಬಾದ್ ಪೊಲೀಸ್ ಠಾಣೆ ವ್ಯಾಪ್ತಿಯ ಆರ್ಥ್ಲಾ ಪ್ರದೇಶದಲ್ಲಿ ಸೂಟ್ಕೇಸ್ನಲ್ಲಿ ಯುವತಿಯೊಬ್ಬಳ ಮೃತದೇಹ ಪತ್ತೆಯಾಗಿದೆ.
ಮೃತ ಯುವತಿಯ ವಯಸ್ಸು 25 ಇರಬಹುದು ಎಂದು ಅಂದಾಜಿಸಲಾಗಿದ್ದು, ಗುರುತು ಪತ್ತೆಯಾಗಿಲ್ಲ. ಕೈಯಲ್ಲಿ ಮದರಂಗಿಯ ವರ್ಣ ಕಂಡು ಬಂದಿದ್ದು, ಇತ್ತೀಚೆಗೆ ಮದುವೆಯಾಗಿರಬಹುದು ಎಂದು ಶಂಕಿಸಲಾಗಿದೆ. ಕೊರೊನಾ ನಿಯಂತ್ರಿಸುವ ಸಲುವಾಗಿ ನಗರದಲ್ಲಿ 55 ಗಂಟೆಗಳ ಲಾಕ್ ಡೌನ್ ಘೋಷಿಸಲಾಗಿತ್ತು, ಭಾನುವಾರ ರಾತ್ರಿಯೂ ಲಾಕ್ಡೌನ್ ಮುಂದುವರೆದಿತ್ತು. ಸೋಮವಾರ ಬೆಳಗ್ಗೆ ಸ್ಥಳೀಯರು ಸೂಟ್ ಕೇಸ್ನಲ್ಲಿ ಶವ ಇರುವುದನ್ನು ಗಮನಿಸಿದ್ದಾರೆ. ಲಾಕ್ ಡೌನ್ ವೇಳೆಯಲ್ಲಿ ಶವ ತಂದು ಬಿಸಾಡಿರಬಹುದು ಎಂದು ಪೊಲೀಸರು ತಿಳಿಸಿದ್ದಾರೆ.
ಸ್ಥಳೀಯ ನಿವಾಸಿ ಮೊಹಮ್ಮದ್ ಶರೀಫ್ ಎಂಬುವರು ಅನುಮಾನಾಸ್ಪದ ಸೂಟ್ಕೇಸ್ ನೋಡಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಬಂದ ಪೊಲೀಸರು ಸೂಟ್ಕೇಸ್ ತೆರೆದಾಗ ಮೃತದೇಹ ಕಂಡು ಬಂದಿದೆ. ಲಾಕ್ ಡೌನ್ ನಿಮಿತ್ತ ಪೊಲೀಸರು ಗಸ್ತಿನಲ್ಲಿದ್ದರೂ, ಈ ರೀತಿ ಶವ ತಂದು ಬಿಸಾಡಿರುವುದು ಹೇಗೆ ಗಮನಕ್ಕೆ ಬಂದಿಲ್ಲ ಎಂಬುದು ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ.
ಸೂಟ್ಕೇಸ್ನಲ್ಲಿ ಪತ್ತೆಯಾದ ಯುವತಿಯ ಮೃತ ದೇಹವು ಕೈ ಕಾಲುಗಳು ಕಟ್ಟಿದ ರೀತಿಯಲ್ಲಿ ಇತ್ತು. ಕೈಯಲ್ಲಿ ಮದರಂಗಿ ಕಂಡು ಬಂದಿದ್ದು, ಹಣೆ ಮೇಲಿನ ಸಿಂಧೂರ ಒತ್ತಾಯದಿಂದ ಅಳಿಸಿ ಹಾಕಿದ ರೀತಿಯಲ್ಲಿತ್ತು. ಸುಮಾರು 5 ಗಂಟೆಗಳ ಮೊದಲು ಶವವನ್ನು ತಂದು ಇಟ್ಟು ಹೋಗಿರಬಹುದು ಎಂದು ಪೊಲೀಸರು ಅನುಮಾನ ವ್ಯಕ್ತಪಡಿಸಿದ್ದು, ಯುವತಿಯ ಗುರುತು ಪತ್ತೆ ಹಚ್ಚುವುದರಲ್ಲಿ ನಿರತರಾಗಿದ್ದಾರೆ. ಮರಣೋತ್ತರ ಪರೀಕ್ಷೆಯ ಬಳಿಕವಷ್ಟೆ ಸಾವಿಗೆ ನಿಖರ ಕಾರಣ ತಿಳಿದು ಬರಲಿದೆ.
