ನಾಳೆ ಭಾರತ - ಚೀನಾ ನಡುವೆ 17ನೇ ಡಬ್ಲ್ಯೂಎಂಸಿಸಿ ಸಭೆ

ಭಾರತ ಹಾಗೂ ಚೀನಾ ನಡುವೆ ನಾಳೆ 17ನೇ ಸಮಾಲೋಚನೆ ಮತ್ತು ಸಹಕಾರ ಕಾರ್ಯವಿಧಾನ ಸಭೆ ನಡೆಯಲಿದ್ದು, ಮಹತ್ವದ ವಿಷಯಗಳ ಬಗ್ಗೆ ಚರ್ಚೆಯಾಗುವ ಸಾಧ್ಯತೆಯಿದೆ.

ನವದೆಹಲಿ:ಚೀನಾ ಹಾಗೂ ಭಾರತದ ನಡುವಿನ ಸಂಬಂಧ ಸುಧಾರಿಸುವ ನಿಟ್ಟಿನಲ್ಲಿ ಸಮಾಲೋಚನೆ ಮತ್ತು ಸಹಕಾರ ಕಾರ್ಯವಿಧಾನ (ಡಬ್ಲ್ಯೂಎಂಸಿಸಿ) ಸಭೆ ನಾಳೆ ನಡೆಯಲಿದೆ ಎಂದು ಉನ್ನತ ಮೂಲಗಳು ತಿಳಿಸಿವೆ.

ಕೊನೆಯ ಡಬ್ಲ್ಯೂಎಂಸಿಸಿ (ವರ್ಕಿಂಗ್​ ಮೆಕ್ಯಾನಿಸಂ ಫಾರ್​ ಕನ್ಸಲ್​​​ಟೇಷನ್​ ಆ್ಯಂಡ್ ಕೋಆರ್ಡಿನೇಷನ್​) ಸಭೆ ಕೊನೆಯದಾಗಿ ಜುಲೈ 10ರಂದು ನಡೆದಿದ್ದು, ಚೀನಾ ಹಾಗೂ ಭಾರತದ ನಡುವೆ ಶಾಂತಿ ಸುವ್ಯವಸ್ಥೆ ಸುಧಾರಿಸಲು ಸೇನೆಯನ್ನು ಹಿಂತೆಗೆದುಕೊಳ್ಳುವ ಪ್ರಕ್ರಿಯೆ ನಡೆಯುತ್ತಿದೆ. ಈ ಹಿನ್ನೆಲೆಯಲ್ಲಿ ಮತ್ತಷ್ಟು ಮಾತುಕತೆಗಳು ಹಾಗೂ ಮಾರ್ಗಸೂಚಿಗಳ ಬಗ್ಗೆ ಎರಡು ರಾಷ್ಟ್ರಗಳು ಈ ಸಭೆಯಲ್ಲಿ ಚರ್ಚೆ ಮಾಡಲಿವೆ.

ಈವರೆಗೂ ಎರಡೂ ರಾಷ್ಟ್ರಗಳು 16 ಡಬ್ಲ್ಯೂಎಂಸಿಸಿ ಸಭೆಗಳನ್ನು ನಡೆಸಿದ್ದು, ಭಾರತದ ಪರವಾಗಿ ವಿದೇಶಾಂಗ ಸಚಿವಾಲಯದ ಅಧಿಕಾರಿಗಳು ಚೀನಾದಿಂದ ಅಲ್ಲಿನ ವಿದೇಶಾಂಗ ಸಚಿವರು ಪಾಲ್ಗೊಂಡಿದ್ದರು.

ನಾಳೆ ನಡೆಯುವ ಸಭೆಯಲ್ಲಿ ಸೇನಾ ತೆರವು ಕಾರ್ಯಾಚರಣೆಯ ಬಗ್ಗೆ ಚರ್ಚೆ ನಡೆಯುತ್ತದೆ ಎಂದು ಊಹಿಸಲಾಗಿದ್ದು, ಎರಡೂ ರಾಷ್ಟ್ರಗಳು ಒಮ್ಮತಕ್ಕೆ ಬರುವ ನಿರೀಕ್ಷೆ ಹೆಚ್ಚಾಗಿದೆ.