ನವದೆಹಲಿ: ಚೀನಾ ಕ್ಷಿಪ್ರವಾಗಿ 15 ನಿಮಿಷಗಳ ಒಳಗೆ ಕೊರೊನಾ ವೈರಸ್ ಪರೀಕ್ಷೆಯ ಫಲಿತಾಂಶ ಪಡೆಯುತ್ತದೆ. ಅದೇ ಮಾದರಿಯನ್ನು ಇಟಲಿ ಮತ್ತು ಜಪಾನ್ ಹೊಂದಿದ್ದರೆ ಭಾರತ ಮಾತ್ರ ಫಲಿತಾಂಶಕ್ಕಾಗಿ ಒಂದು ದಿನ ಕಾಯಬೇಕಿದೆ.
ವರದಿಗಳ ಪ್ರಕಾರ, ಚೀನಾದಲ್ಲಿನ ಆರೋಗ್ಯ ಅಧಿಕಾರಿಗಳು ಕೊರೊನಾ ವೈರಾಣು ಪರೀಕ್ಷೆಯ ಫಲಿತಾಂಶವನ್ನು ಕೇವಲ 15 ನಿಮಿಷಗಳಲ್ಲಿ ಪಡೆಯುತ್ತಾರೆ. ಆದರೆ, ಭಾರತದಲ್ಲಿ ಇದಕ್ಕೆ 24 ಗಂಟೆಗಳು ಅಥವಾ ಅದಕ್ಕೂ ಹೆಚ್ಚಿನ ಸಮಯ ಬೇಕಾಗುತ್ತದೆ.
ವ್ಯತ್ಯಾಸವೆಂದರೆ ಚೀನಾ ಕ್ಷಿಪ್ರವಾಗಿ 15 ನಿಮಿಷಗಳಲ್ಲಿ ಕೊರೊನಾ ವೈರಸ್ ಪರೀಕ್ಷಾ ವಿಧಾನ ಬಳಸುತ್ತಿದ್ದು, ಇದು ವೈರಸ್ ಇರುವಿಕೆಯನ್ನು ವೇಗವಾಗಿ ಪತ್ತೆ ಹಚ್ಚುತ್ತದೆ. ಶೇ 80ರಷ್ಟು ನಿಖರವಾದ ಪ್ರತಿಕ್ರಿಯೆ ಸಹ ನೀಡುತ್ತದೆ ಎನ್ನಲಾಗುತ್ತದೆ. ಇಟಲಿ ಮತ್ತು ಜಪಾನ್ ಸಹ ಇದೇ ವಿಧಾನ ಬಳಸುತ್ತಿದೆ. ಆದರೆ, ಈ ಪರೀಕ್ಷೆಯನ್ನು ಬ್ರಿಟಿಷ್ ಸರ್ಕಾರ ದೂರ ಇರಿಸಿದೆ.
ಆರೋಗ್ಯ ಮತ್ತು ಸಾಮಾಜಿಕ ಆರೈಕೆ ಇಲಾಖೆಯ ಕಾರ್ಯನಿರ್ವಾಹಕ ಏಜೆನ್ಸಿಯಾದ ಪಬ್ಲಿಕ್ ಹೆಲ್ತ್ ಇಂಗ್ಲೆಂಡ್, ತನ್ನದೇ ಆದ ಪರೀಕ್ಷೆಯನ್ನು ಅಭಿವೃದ್ಧಿಪಡಿಸುವ ಆಶಯ ಹೊಂದಿದೆ. ಕ್ಷಿಪ್ರವಾಗಿ ಪತ್ತೆಹಚ್ಚುವ ಕೊರೊನಾ ವೈರಸ್ ಫಲಿತಾಂಶ ಪರೀಕ್ಷಾ ವಿಧಾನ ಸಾಕಷ್ಟು ನಿಖರವಾಗಿಲ್ಲ ಎಂದು ಅದು ಹೇಳುತ್ತದೆ. ಇದಕ್ಕೆ ಅಮೆರಿಕದ ಫುಡ್ ಆ್ಯಂಡ್ ಡ್ರಗ್ ಅಡ್ಮಿನಿಸ್ಟ್ರೇಷನ್ನ (ಎಫ್ಡಿಎ) ಅನುಮೋದನೆಯೂ ಇಲ್ಲ ಎಂದು ವಾದಿಸುತ್ತಿದೆ.
ಉತ್ತರ ಕೆರೊಲಿನಾ ಮೂಲದ ಕಂಪನಿ ಬಯೋಮೆಡೋಮಿಕ್ಸ್, ತನ್ನ ಕ್ಷಿಪ್ರ ಪರೀಕ್ಷೆಯ ವಿಧಾನವನ್ನು ದಕ್ಷಿಣ ಕೊರಿಯಾ, ಚೀನಾ, ಇಟಲಿ, ಜಪಾನ್ ಮತ್ತು ಮಧ್ಯಪ್ರಾಚ್ಯದ ಕೆಲವು ರಾಷ್ಟ್ರಗಳು ಬಳಸುತ್ತಿದೆ ಎಂದಿದೆ. ಶಂಕಿತ ವ್ಯಕ್ತಿಯ ಬೆರಳು ಚುಚ್ಚಿ ರಕ್ತದ ಹನಿಗಳನ್ನು ಸಂಗ್ರಹಿಸಿ ಪರೀಕ್ಷೆ ನಡೆಸಲಾಗುತ್ತದೆ. ಈ ಫಲಿತಾಂಶದ ಚಿತ್ರಣವು ಮನೆಯಲ್ಲಿಯೇ ಗರ್ಭಧಾರಣೆಯ ಪರೀಕ್ಷೆಯಂತೆಯೇ ಕಂಡುಬರುತ್ತದೆ.