ವಿಶಾಖಪಟ್ಟಣಂ(ಆಂಧ್ರ ಪ್ರದೇಶ): ರಾಜ್ಯಾದ್ಯಂತ ಸರ್ಕಾರವೇ ಮುಂದೆ ನಿಂತು ಮದ್ಯದಂಗಡಿಗಳನ್ನು ನಿರ್ಮಿಸಲು ಮುಂದಾಗಿದೆ. ಇದಕ್ಕಾಗಿ 'ವಾಕ್ ಇನ್ ಶಾಪ್ಸ್' ಎಂಬ ಹೆಸರಿನಲ್ಲಿ ರಾಜ್ಯಾದ್ಯಂತ ಮದ್ಯದ ಮಾಲ್ಗಳನ್ನು ಸ್ಥಾಪಿಸಲು ಜಗನ್ ಸರ್ಕಾರ ಯೋಜನೆ ರೂಪಿಸಿದೆ.
ಉನ್ನತ ಮಟ್ಟದ ಮದ್ಯದಂಗಡಿಗಳು ಇವಾಗಿದ್ದು, ಇಂತಹ 50 ರಿಂದ 100 ಮಾಲ್ಗಳನ್ನು ರಾಜ್ಯದಲ್ಲಿ ಸ್ಥಾಪಿಸಲಾಗುವುದು ಎಂದು ವರದಿಯಾಗಿದೆ. ರಾಜ್ಯದ ಪ್ರಮುಖ ನಗರಗಳು, ಜಿಲ್ಲಾ ಕೇಂದ್ರಗಳು ಮತ್ತು ಪ್ರಮುಖ ಪಟ್ಟಣಗಳಲ್ಲಿ ಇಂತಹ ಮಾಲ್ಗಳನ್ನು ಸ್ಥಾಪಿಸಲಾಗುತ್ತಿದೆ.
ಇವುಗಳನ್ನು ಆಂಧ್ರಪ್ರದೇಶ ರಾಜ್ಯ ಪಾನೀಯಗಳ ನಿಗಮ ಲಿಮಿಟೆಡ್ (APSBCL) ನಿರ್ವಹಿಸುತ್ತದೆ. ಅದನ್ನು ಸಕ್ರಿಯವಾಗಿ ಜಾರಿಗೊಳಿಸಲು ರಾಜ್ಯ ಸರ್ಕಾರ 2020-21ನೇ ಸಾಲಿನಲ್ಲಿ ಹೊಸ ಮದ್ಯ ನೀತಿಯನ್ನು ಕೂಡಾ ಘೋಷಿಸಿದೆ. ಕಂದಾಯ ಇಲಾಖೆಯ ವಿಶೇಷ ಪ್ರಧಾನ ಕಾರ್ಯದರ್ಶಿ ರಜತ್ ಭಾರ್ಗವ, ಕಳೆದ ಶುಕ್ರವಾರ ಈ ಆದೇಶ ಹೊರಡಿಸಿದ್ದಾರೆ. ಈ ವರ್ಷದ ಅಕ್ಟೋಬರ್ 1 ರಿಂದ 2021 ರ ಸೆಪ್ಟೆಂಬರ್ 30 ರವರೆಗೆ ಈ ನೀತಿ ಜಾರಿಯಲ್ಲಿರುತ್ತದೆ.
ಪ್ರಸ್ತುತ ಸರ್ಕಾರವು ನಡೆಸುತ್ತಿರುವ ಮದ್ಯದಂಗಡಿಗಳಲ್ಲಿ ಕೆಲವು ರೀತಿಯ ಬ್ರಾಂಡಿಗಳಿವೆ. ಹೊಸದಾಗಿ ಸ್ಥಾಪಿಸಲಾಗುತ್ತಿರುವ ‘ವಾಕ್ ಇನ್ ಶಾಪ್ಸ್’ನಲ್ಲಿ ಎಲ್ಲಾ ಬ್ರಾಂಡ್‌ಗಳ ಮದ್ಯಗಳನ್ನು ಇರಿಸಲು ಎಪಿಎಸ್‌ಬಿಸಿಎಲ್ ಯೋಜನೆ ರೂಪಿಸಿದೆ. ರಾಜ್ಯದ ಒಟ್ಟು ಮದ್ಯದಂಗಡಿಗಳ ಸಂಖ್ಯೆ 2,934 ಮೀರಬಾರದು. ಹೀಗಾಗಿ ಈ ವಾಕ್ ಇನ್ ಶಾಪ್ಸ್ ಇರುವ ಸ್ಥಳದಲ್ಲಿ ಈಗಾಗಲೇ ಅಸ್ತಿತ್ವದಲ್ಲಿರುವ ಮದ್ಯದಂಗಡಿಗಳನ್ನು ತೆಗೆದುಹಾಕಲಾಗುತ್ತದೆ.