ಸೂಕ್ಷ್ಮಜೀವಿ ನಿರೋಧಕ ಸಂಶೋಧನೆಯಲ್ಲಿ ಭಾರತ - ಬ್ರಿಟನ್​ ಜಂಟಿ ಸಹಭಾಗಿತ್ವ

ದಕ್ಷಿಣ ಏಷ್ಯಾ ಮತ್ತು ಕಾಮನ್‌ವೆಲ್ತ್ ರಾಜ್ಯ ಸಚಿವ ವಿಂಬಲ್ಡನ್‌ನ ಲಾರ್ಡ್ ತಾರಿಕ್ ಅಹ್ಮದ್ ಅವರು ಸೂಕ್ಷ್ಮಜೀವಿಯ ವಿರೋಧಿ ಪ್ರತಿರೋಧಕವನ್ನು (ಎಎಂಆರ್) ನಿಭಾಯಿಸಲು ಯುನೈಟೆಡ್ ಕಿಂಗ್‌ಡಮ್ ಮತ್ತು ಭಾರತ ಹೊಸ ಸಹಭಾಗಿತ್ವ ನಡೆಸಲಿದೆ ಎಂದು ಹೇಳಿದ್ದಾರೆ.

ನವದೆಹಲಿ: ಬ್ಯಾಕ್ಟೀರಿಯಾ ನಿರೋಧಕ ಮತ್ತು ಜೀನ್‌ಗಳ ವಿರುದ್ಧದ ಜಾಗತಿಕ ಹೋರಾಟದಲ್ಲಿ ಪ್ರಮುಖ ಪ್ರಗತಿಗೆ ಕಾರಣವಾಗಬಹುದಾದ ಸೂಕ್ಷ್ಮಜೀವಿ ವಿರೋಧಿ ಪ್ರತಿರೋಧಕವನ್ನು (ಎಎಂಆರ್) ನಿಭಾಯಿಸಲು ಬ್ರಿಟನ್​​ ಮತ್ತು ಭಾರತ ಎಂಟು ಮಿಲಿಯನ್ ಪೌಂಡ್ ( 76 ಕೋಟಿ ರೂ.)‌ ಮೌಲ್ಯದ ಐದು ಹೊಸ ಯೋಜನೆಗಳೊಂದಿಗೆ ಸಹಭಾಗಿತ್ವ ಹೊಂದಲಿದೆ.

ದಕ್ಷಿಣ ಏಷ್ಯಾ ಮತ್ತು ಕಾಮನ್‌ವೆಲ್ತ್ ರಾಜ್ಯ ಸಚಿವ ವಿಂಬಲ್ಡನ್‌ನ ಲಾರ್ಡ್ ತಾರಿಕ್ ಅಹ್ಮದ್ ಅವರು ಈ ಘೋಷಣೆ ಮಾಡಿದ್ದಾರೆ ಎಂದು ಬ್ರಿಟಿಷ್ ಹೈಕಮಿಷನ್‌ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.

ಔಷಧೀಯ ಉದ್ಯಮದ ಜಾಗತಿಕ ಪೂರೈಕೆಯಲ್ಲಿ ಭಾರತ ಪ್ರಮುಖ ಉತ್ಪಾದಕ ರಾಷ್ಟ್ರವಾಗಿದೆ. ಅನುಮತಿಗಳಿಗೆ ಒಳಪಟ್ಟು ಐದು ಯೋಜನೆಗಳನ್ನು ಈ ವರ್ಷದ ಸೆಪ್ಟೆಂಬರ್‌ನಲ್ಲಿ ಚಾಲನೆಗೊಳಿಸಲು ಎರಡೂ ರಾಷ್ಟ್ರಗಳು ಒಪ್ಪಿಗೆ ಸೂಚಿಸಿವೆ.

ಅಂತಾರಾಷ್ಟ್ರೀಯ ಸಹಯೋಗಕ್ಕಾಗಿ ಯುಕೆ ರಿಸರ್ಚ್ ಅಂಡ್ ಇನ್ನೋವೇಶನ್​ ಫಂಡ್‌ನಿಂದ ನಾಲ್ಕು ಮಿಲಿಯನ್ ಪೌಂಡ್‌ಗಳನ್ನು ನೀಡಲಾಗುತ್ತಿದೆ. ಇದರಿಂದ ಔಷಧ ವಿಜ್ಞಾನ ಮತ್ತು ಸಂಶೋಧನೆಯಲ್ಲಿ ಮಹತ್ವದ ಬೆಳವಣಿಗೆ ಆಗಲಿದೆ. ಹಲವು ರೋಗಗಳ ವಿರುದ್ಧ ಹೋರಾಡಲು ಬಲ ಸಿಗಲಿದೆ ಎಂದು ಹೇಳಲಾಗುತ್ತಿದೆ.