ಮನೆ ಮಾಲೀಕನೊಂದಿಗೆ ಜಗಳ... ಬೆದರಿಸಲು 16 ಕಚ್ಚಾ ಬಾಂಬ್​ ತಂದ ಯುವಕರು!

ಕೆಲ ಯುವಕರು ಕ್ಷುಲ್ಲಕ ಕಾರಣಕ್ಕೆ ಮನೆ ಮಾಲೀಕನೊಂದಿಗೆ ಜಗಳವಾಡಿದ್ದು, ಕಚ್ಚಾ ಬಾಂಬ್​ನಿಂದ ಮಾಲೀಕನನ್ನು ಬೆದರಿಸಲು ಮತ್ತು ಆಸ್ತಿ-ಪಾಸ್ತಿ ಹಾನಿಗೊಳಿಸಲು ಸ್ಕೆಚ್​ ಹಾಕಿರುವ ಘಟನೆ ಉತ್ತರಪ್ರದೇಶದ ಬರೇಲಿಯಲ್ಲಿ ನಡೆದಿದೆ.

ಬರೇಲಿ (ಉತ್ತರಪ್ರದೇಶ):ಮನೆ ಮಾಲೀಕನೊಂದಿಗೆ ಜಗಳವಾಡಿದ ಯುವಕರು ಕಚ್ಚಾ ಬಾಂಬ್​ನಿಂದ ಆತನನ್ನು ಬೆದರಿಸಿ ಆಸ್ತಿ-ಪಾಸ್ತಿ ಹಾನಿಗೊಳಿಸಲು ಸ್ಕೆಚ್​ ಹಾಕಿರುವ ಘಟನೆ ಬೆಳಕಿಗೆ ಬಂದಿದೆ.

ಇಲ್ಲಿನ ಖೇಲಂ ಗ್ರಾಮದ ಬಬ್ಲು, ಜೈವೀರ್​ ಮತ್ತು ಹಲೀನ್​ ಎಂಬುವರು ಮನೆ ಮಾಲೀಕ ಖಾನ್​ ಸಿಂಗ್​ನೊಂದಿಗೆ ಜಗಳವಾಡಿದ್ದಾರೆ. ಜಗಳ ವಿಕೋಪಕ್ಕೆ ತಿರುಗಿದ್ದು, ಆತನ ಆಸ್ತಿಯನ್ನು ಹಾನಿಗೊಳಿಸಲು ಮತ್ತು ಬೆದರಿಕೆ ಹಾಕಲು ಮೂವರು ಸ್ಕೆಚ್​ ಹಾಕಿದ್ದಾರೆ. ಹೀಗಾಗಿ ಯುವಕರು ಕಚ್ಚಾ ಬಾಂಬ್​ಗಳನ್ನು ತಂದು ಸಿಂಗ್​ರ ಮನೆಯಲ್ಲಿಟ್ಟಿದ್ದರು.

ಇದರ ಬಗ್ಗೆ ಮಾಲೀಕ ಸಿಂಗ್​ಗೆ ತಿಳಿದಿದೆ. ಕೂಡಲೇ ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಸುದ್ದಿ ತಿಳಿದ ಪೊಲೀಸರು ಮನೆ ಪರಿಶೀಲಿಸಿದಾಗ 16 ಕಚ್ಚಾ ಬಾಂಬ್​ಗಳು ದೊರೆತಿದ್ದು, ಕೂಡಲೇ ಬಬ್ಲು ಮತ್ತು ಜೈವೀರ್​ನನ್ನು ಪೊಲೀಸರು ಬಂಧಿಸಿದ್ದರು. ಈ ವೇಳೆ ಹಲೀನ್​ ಪರಾರಿಯಾಗಿದ್ದಾನೆ.

ಆರೋಪಿಗಳನ್ನು ಪೊಲೀಸರು ವಿಚಾರಣೆಗೊಳಪಡಿಸಿದಾಗ ಮಾಲೀಕ ಸಿಂಗ್​ರ ಆಸ್ತಿ-ಪಾಸ್ತಿಗೆ ಹಾನಿ ಮಾಡಲು ಕಚ್ಚಾ ಬಾಂಬ್​ಗಳನ್ನು ತಂದಿದ್ದೇವೆ ಎಂದು ತಪ್ಪೊಪ್ಪಿಕೊಂಡಿದ್ದಾರೆ.

ಈ ಘಟನೆ ಕುರಿತು ಪ್ರಕರಣ ದಾಖಲಾಗಿದ್ದು, ಪರಾರಿಯಾಗಿರುವ ಆರೋಪಿಗಾಗಿ ಪೊಲೀಸರು ಶೋಧ ನಡೆಸಿದ್ದಾರೆ.