ಪಿಎಂ ಮೋದಿಗೆ ರಾಖಿ ಕಟ್ಟಿದ ಟ್ರಿಪಲ್ ತಲಾಖ್ ಹೋರಾಟಗಾರ್ತಿ ಇಶ್ರತ್ ಜಹಾನ್

ಟ್ರಿಪಲ್​ ತಲಾಖ್​​ನ ಅರ್ಜಿದಾರರಲ್ಲಿ ಪ್ರಮುಖರಾದ ಇಶ್ರತ್​ ಜಹಾನ್​ ಗುರುವಾರದಂದು ರಕ್ಷಾ ಬಂಧನದ ಸಲುವಾಗಿ ಪ್ರಧಾನಿ ನರೇಂದ್ರ ಮೋದಿಗೆ ರಾಖಿ ಕಟ್ಟಿ ಸಂಭ್ರಮಾಚರಿಸಿದ್ದಾರೆ. ಜೊತೆಗೆ ಹಲವಾರು ಮಹಿಳೆಯರು ಹಾಗೂ ಮಕ್ಕಳು ಪ್ರಧಾನಿಯೊಂದಿಗೆ ಸಂಭಾಷಣೆ ನಡೆಸಿ ಅವರ ರಕ್ಷಣೆಗೆಂದು ಕೈಗೆ ಪವಿತ್ರ ದಾರ ಕಟ್ಟಿಸಿಕೊಂಡರು.

ನವದೆಹಲಿ: ಟ್ರಿಪಲ್​ ತಲಾಖ್​​ನ ಅರ್ಜಿದಾರರಲ್ಲಿ ಪ್ರಮುಖರಾದ ಇಶ್ರತ್​ ಜಹಾನ್​ ಗುರುವಾರದಂದು ರಕ್ಷಾ ಬಂಧನದ ಸಲುವಾಗಿ ಪ್ರಧಾನಿ ನರೇಂದ್ರ ಮೋದಿಗೆ ರಾಖಿ ಕಟ್ಟಿ ಸಂಭ್ರಮಿಸಿದರು.

2014ರಲ್ಲಿ ಇಶ್ರತ್​ ಜಹಾನ್​ನ ಪತಿ ದುಬಾಯಿನಿಂದಲೇ ಫೋನ್​ ಕಾಲ್​ ಮೂಲಕ ಮೂರು ಬಾರಿ ತಲಾಖ್​ ಹೇಳಿದ್ದು, ಈ ವಿರುಧ್ಧ ಜಹಾನ್​ ಸುಪ್ರೀಂಕೋರ್ಟ್​ ಮೆಟ್ಟಲೇರಿದ್ದರು. ಇತ್ತೀಚೆಗೆ, ತ್ವರಿತ ಟ್ರಿಪಲ್​ ತಲಾಖ್ ನೀಡುವ ಪತಿಗೆ ಆಗಸ್ಟ್​ 1ರಿಂದ ಮೂರು ವರ್ಷಗಳ ಜೈಲು ಶಿಕ್ಷೆಯನ್ನು ನೀಡಲಾಗುವ ವಿವಾಹದ ಹಕ್ಕುಗಳ ರಕ್ಷಣೆ ಮಸೂದೆಗೆ ಸಂಸತ್ತು 2019 ಜುಲೈ 30ರಂದು ಅನುಮೋದನೆ ನೀಡಿದೆ.

ಪಾಕಿಸ್ತಾನದಿಂದ ಆಗಮಿಸಿದ ಇನ್ನೋರ್ವ ರಾಖಿ ಸಹೋದರಿ ಖಮರ್​ ಮೊಹಸಿನ್​ ಶೈಕ್ ಕೂಡಾ ಪ್ರಧಾನಿಗೆ ರಾಖಿ ಕಟ್ಟಿ ಅವರ ಉತ್ತಮ ಆರೋಗ್ಯಕ್ಕೆ ಪ್ರಾರ್ಥಿಸಿದ್ದಾರೆ. ಪ್ರತಿ ವರ್ಷ ರಾಖಿ ಕಟ್ಟುವ ಅವಕಾಶ ಸಿಗುವುದು ಸಂತಸದ ವಿಷಯ, ಮುಂಬರುವ 5 ವರ್ಷಗಳಲ್ಲಿ ಪ್ರಧಾನಿಯ ಕಾರ್ಯ ಜೊತೆಗೆ ಅವರು ತೆಗೆದುಕೊಳ್ಳುವ ನಿರ್ಧಾರವನ್ನು ಗುರುತಿಸುವಂತಾಗಲಿ ಎಂದು ಪ್ರಾರ್ಥಿಸಿದರು. ಜೊತೆಗೆ, ಮುಸ್ಲಿಂ ಮಹಿಳೆಯರ ಹಿತದೃಷ್ಟಿಯಿಂದ ಪ್ರಧಾನಿ ಟ್ರಿಪಲ್​ ತಲಾಖ್​ ವಿರುದ್ಧ ಉತ್ತಮ ನಿರ್ಧಾರ ಕೈಗೊಂಡಿದ್ದಾರೆಂದು ಶ್ಲಾಘಿಸಿದರು.

ಅಷ್ಟೇ ಅಲ್ಲದೇ, ಮಹಿಳೆಯರು ಮತ್ತ ವಿವಿಧ ಕೌಶಲ್ಯವುಳ್ಳ ಮಕ್ಕಳು ಪ್ರಧಾನಿಯೊಂದಿಗೆ ಸಂವಹನ ನಡೆಸಿ, ಅವರ ರಕ್ಷಣೆಗೆಂದು ಪವಿತ್ರ ದಾರವನ್ನು ಕಟ್ಟಿದ್ದಾರೆ.

ರಕ್ಷಾ ಬಂಧನ​ ಒಡಹುಟ್ಟಿದವರ ನಡುವಿನ ಬಾಂಧವ್ಯವನ್ನು ಆಚರಿಸುವ ಹಬ್ಬವಾಗಿದ್ದು, ದೇಶದಾದ್ಯಂತ ಪ್ರೀತಿ ಉತ್ಸಾಹದಿಂದ ಆಚರಿಸಲಾಯಿತು. ಸಾಂಪ್ರದಾಯಿಕವಾಗಿ ಈ ದಿನದಂದು, ಸಹೋದರಿಯರು ಸಹೋದರನ ಕೈಗೆ ರಾಖಿ ಕಟ್ಟುವ ಮೂಲಕ ತಮ್ಮ ಪ್ರೀತಿಯನ್ನು ವ್ಯಕ್ತಪಡಿಸುತ್ತಾರೆ.