ಕೊರೊನಾ ಹರಡದಂತೆ ತಡೆಯಲು ಸೋಂಕು ನಿವಾರಕ ಸುರಂಗ: ಭಾರತದಲ್ಲಿದು ಮೊದಲ ಪ್ರಯತ್ನ

ಭಾರತದಲ್ಲೇ ಮೊದಲ ಕೊರೊನಾ ಸೋಂಕು ನಿವಾರಕ ಸುರಂಗವನ್ನು ತಮಿಳುನಾಡಿನ ತಿರುಪ್ಪುರ್​ನಲ್ಲಿ ಅನುಷ್ಠಾನಗೊಳಿಸಲಾಗಿದೆ.

ತಿರುಪ್ಪುರ್​​ (ತಮಿಳುನಾಡು):ಕೊರೊನಾ ಸೋಂಕು ಹರಡದಂತೆ ತಡೆಯಲು ಎಲ್ಲಾ ರಾಜ್ಯಗಳು ತಮ್ಮದೇ ಆದ ಕ್ರಮಗಳನ್ನು ತೆಗೆದುಕೊಂಡಿದೆ. ಈಗ ತಮಿಳುನಾಡಿನ ತಿರುಪ್ಪುರ್​​​ ಜಿಲ್ಲಾಡಳಿತ ಸೋಂಕು ಹರಡದಂತೆ ತಡೆಯಲು ಸೋಂಕು ನಿವಾರಕ ಸುರಂಗವನ್ನು ಅನುಷ್ಠಾನಗೊಳಿಸಿದೆ. ಭಾರತದಲ್ಲೇ ಇದು ಮೊದಲ ಸೋಂಕು ನಿವಾರಕ ಸುರಂಗವಾಗಿದ್ದು ತಿರುಪ್ಪುರ್​​ ಜಿಲ್ಲಾಧಿಕಾರಿ ಕೆ.ವಿಜಯ ಕಾರ್ತಿಕೇಯನ್​ ಉದ್ಘಾಟಿಸಿದ್ದಾರೆ.

ಉಝಾವರ್​​ ಸಂಥೈ ಪ್ರದೇಶದಲ್ಲಿರುವ ಈ ಸೋಂಕು ನಿವಾರಕ ಘಟಕದಲ್ಲಿ ಸೋಡಿಯಂ ಹೈಪೋಕ್ಲೋರೈಟ್​ ಅನ್ನು ಉಪಯೋಗಿಸಲಾಗುತ್ತಿದ್ದು, ವೈದ್ಯರು ಪರೀಕ್ಷಿಸಿದ್ದಾರೆ ಎಂದು ವಿಜಯ್​ ಕಾರ್ತಿಕೇಯನ್ ತಿಳಿಸಿದ್ದಾರೆ.

ಈ ಸೋಂಕು ನಿವಾರಕ ಘಟಕವನ್ನು ಕಾನ್ಫಡರೇಷನ್​ ಆಫ್​​​ ಇಂಡಿಯನ್​ ಇಂಡಸ್ಟ್ರಿ ಸಂಘಟನೆಯ ಭಾಗವಾದ ಯೂತ್​ ಇಂಡಿಯನ್​ ಹಾಗೂ ತಿರುಪ್ಪುರ್​​​ ಜಿಲ್ಲಾಡಳಿತದ ಸಹಯೋಗದಿಂದ ಸ್ಥಾಪನೆ ಮಾಡಲಾಗಿದೆ. ಮೂಲಭೂತವಾಗಿ ಅವಶ್ಯಕವಿರುವ ಮುಂಜಾಗ್ರತೆಯನ್ನು ಮಾತ್ರ ಇಲ್ಲಿ ಕೈಗೊಳ್ಳಲಾಗಿದೆ.

ನಿನ್ನೆ ಒಂದೇ ದಿನದಲ್ಲಿ 110 ಕೊರೊನಾ ಸೋಂಕಿತರು ದೃಢಪಟ್ಟಿದ್ದು ತಮಿಳುನಾಡು ಆತಂಕಕ್ಕೀಡಾಗಿತ್ತು. ಇದರಿಂದಾಗಿ ತಮಿಳುನಾಡಿನಲ್ಲಿ ಕೊರೊನಾ ಪೀಡಿತರ ಸಂಖ್ಯೆ 234ಕ್ಕೆ ಏರಿಕೆಯಾಗಿತ್ತು.