ಟಿಮ್ಸ್ ಆಸ್ಪತ್ರೆ ಡಂಪಿಂಗ್ ಯಾರ್ಡ್​ ತರ ಇದೆ: ರೇವಂತ್ ರೆಡ್ಡಿ ಆರೋಪ

ರಾಜ್ಯ ಸರ್ಕಾರ ಕೋವಿಡ್​ ಆಸ್ಪತ್ರೆಯಾಗಿ ಘೋಷಿಸಿರುವ ತೆಲಂಗಾಣ ಇನ್ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸಸ್ (ಟಿಮ್ಸ್) ಗೆ ಟಿಪಿಸಿಸಿ ಕಾರ್ಯಕಾರಿ ಅಧ್ಯಕ್ಷ ಮತ್ತು ಸಂಸದ ರೇವಂತ್ ರೆಡ್ಡಿ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ಹೈದರಾಬಾದ್ : ತೆಲಂಗಾಣ ಇನ್ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸಸ್ (ಟಿಮ್ಸ್) ಗೆ ಭಾನುವಾರ ಭೇಟಿ ನೀಡಿದ ತೆಲಂಗಾಣ ಪ್ರದೇಶ ಕಾಂಗ್ರೆಸ್​​ ಕಮಿಟಿ (ಟಿಪಿಸಿಸಿ)ಯ ಕಾರ್ಯಕಾರಿ ಅಧ್ಯಕ್ಷ ಮತ್ತು ಸಂಸದ ರೇವಂತ್ ರೆಡ್ಡಿ ಆಸ್ಪತ್ರೆಯ ಸ್ಥಿತಿ ಡಂಪಿಂಗ್ ಯಾರ್ಡ್ ತರ ಇದೆ ಎಂದು ಹೇಳಿದ್ದಾರೆ.

ಇತ್ತೀಚೆಗೆ ಟಿಮ್ಸ್​ನ್ನು ಕೋವಿಡ್​ ವಿಶೇಷ ಆಸ್ಪತ್ರೆ ಎಂದು ಘೋಷಿಸಿರುವ ರಾಜ್ಯ ಸರ್ಕಾರ ಆರ್ಥಿಕ ಸಹಾಯ ನೀಡಿ ಸಿಬ್ಬಂದಿಯನ್ನ ನೇಮಿಸಿತ್ತು. ಈ ಮೊದಲು ಗಾಂಧಿ ಆಸ್ಪತ್ರೆಯನ್ನು ಮಾತ್ರ ಕೋವಿಡ್​ ರೋಗಿಗಳಿಗಾಗಿ ಮೀಸಲಿಡಲಾಗಿತ್ತು.

ಆಸ್ಪತ್ರೆಗೆ ಭೇಟಿ ನೀಡಿದ ಬಳಿಕ ಮಾತನಾಡಿದ ರೇವಂತ್​ ರೆಡ್ಡಿ, ನೀವೇ ನೋಡಬಹುದು, ಕೋವಿಡ್​ ಬಗ್ಗೆ ಸರ್ಕಾರ ಎಷ್ಟೊಂದು ಗಂಭೀರವಾಗಿದೆ ಎಂದು. ರಾಜ್ಯ ಸರ್ಕಾರ ಸೋಂಕು​ ನಿಯಂತ್ರಿಸುವ ವಿಷಯದಲ್ಲಿ ಸಂಪೂರ್ಣ ವಿಫಲವಾಗಿದೆ, ಯಾವುದೇ ರೊಗಿಗೂ ಚಿಕಿತ್ಸೆ ನೀಡಲು ಪ್ರಯತ್ನಿಸುತ್ತಿಲ್ಲ. ಆದರೂ ಟಿಮ್ಸ್​ 1,500 ಹಾಸಿಗೆ ಮತ್ತು 100 ವೈದ್ಯರೊಂದಿಗೆ ಮಾರ್ಚ್​ 27 ರಿಂದಲೇ ಕೋವಿಡ್ ಆಸ್ಪತ್ರೆಯಾಗಿ ಕಾರ್ಯಾರಂಭ ಮಾಡಿದೆ ಎಂದು ಸರ್ಕಾರ ಹೇಳುತ್ತಿದೆ. ಮೂರು ತಿಂಗಳಾಯಿತು, ಆಸ್ಪತ್ರೆ ಡಂಪಿಂಗ್ ಯಾರ್ಡ್​ನಂತಿದೆ. ನಾಲ್ಕು ಗಾರ್ಡ್​ಗಳನ್ನು ಹೊರತುಪಡಿಸಿದರೆ ಇಲ್ಲಿ ಯಾವುದೇ ರೋಗಿಗಳೂ ಇಲ್ಲ ವೈದ್ಯರೂ ಇಲ್ಲ ಎಂದಿದ್ದಾರೆ.