ಟಿ-20 ವಿಶ್ವಕಪ್​ ನಡೆಯುವುದು ವಾಸ್ತವಕ್ಕೆ ದೂರದ ಮಾತು: ಕ್ರಿಕೆಟ್ ಆಸ್ಟ್ರೇಲಿಯಾ ಅಧ್ಯಕ್ಷ

ಈ ಬಾರಿ ಆಸ್ಟ್ರೇಲಿಯಾದಲ್ಲಿ ನಡೆಯಬೇಕಿದ್ದ ಟಿ-20 ವಿಶ್ವಕಪ್ ಈ ವರ್ಷ ನಡೆಯುವುದು ವಾಸ್ತವಕ್ಕೆ ದೂರವಾದ ಮಾತು ಎಂದು ಕ್ರಿಕೆಟ್​ ಆಸ್ಟ್ರೇಲಿಯಾ ಅಧ್ಯಕ್ಷ ಎರ್ಲ್​ ಎಡ್ಡಿಂಗ್ಸ್​ ಅಭಿಪ್ರಾಯಪಟ್ಟಿದ್ದಾರೆ.

ಕ್ಯಾನ್​ಬೆರಾ (ಆಸ್ಟ್ರೇಲಿಯಾ):ಕೊರೊನಾ ವೈರಸ್​ ಹಾವಳಿ ತೀವ್ರವಾಗುತ್ತಿರುವಾಗ ಈ ವರ್ಷ ಟಿ-20 ಕ್ರಿಕೆಟ್​ ವಿಶ್ವಕಪ್​ ನಡೆಯುವುದು ವಾಸ್ತವಕ್ಕೆ ದೂರವಾಗಿದೆ ಎಂದು ಕ್ರಿಕೆಟ್​ ಆಸ್ಟ್ರೇಲಿಯಾ ಅಧ್ಯಕ್ಷ ಎರ್ಲ್​ ಎಡ್ಡಿಂಗ್ಸ್​ ಅಭಿಪ್ರಾಯಪಟ್ಟಿದ್ದಾರೆ.

ಈ ಬಾರಿಯ ಟಿ-20 ವಿಶ್ವಕಪ್​ ಟೂರ್ನಿ ಅಕ್ಟೋಬರ್ 18ರಿಂದ ನವೆಂಬರ್ 15ರವರೆಗೆ ನಡೆಯಬೇಕಿತ್ತು. ಆದರೆ ಕೊರೊನಾ ಹಾಗೂ ಲಾಕ್​ಡೌನ್​ ಹಿನ್ನೆಲೆಯಲ್ಲಿ ಅಂತಾರಾಷ್ಟ್ರೀಯ ಗಡಿಗಳು ಮುಚ್ಚಿವೆ. ಒಂದು ರಾಷ್ಟ್ರದಿಂದ ಮತ್ತೊಂದು ರಾಷ್ಟ್ರಕ್ಕೆ ಪ್ರಯಾಣ ಬೆಳೆಸುವುದು ಕಷ್ಟವಾಗಲಿದ್ದು, ಟೂರ್ನಿಯನ್ನು ಮುಂದೂಡಲು ಚಿಂತನೆ ನಡೆಸಲಾಗಿದೆ.

ಟಿ-20 ವಿಶ್ವಕಪ್​ ಟೂರ್ನಿ ರದ್ದಾಗದಿದ್ದರೆ ಅಥವಾ ಮುಂದೂಡಿಕೆಯಾಗದಿದ್ದರೆ, ಕ್ರಿಕೆಟ್​ನಲ್ಲಿ ಭಾಗವಹಿಸುವ ಒಟ್ಟು 16 ರಾಷ್ಟ್ರಗಳನ್ನು ಆಸ್ಟ್ರೇಲಿಯಾಗೆ ಕರೆತರುವ ಕೆಲಸ ಮಾಡಬೇಕಾಗುತ್ತದೆ. ಆದರೆ ಕ್ರಿಕೆಟ್​ ಆಡುವ ಬಹುತೇಕ ರಾಷ್ಟ್ರಗಳಲ್ಲಿ ಕೊರೊನಾ ಗಂಭೀರವಾಗಿ ಆವರಿಸಿದೆ. ಅದ್ದರಿಂದ ಈ ವರ್ಷ ಕ್ರಿಕೆಟ್​ ಟೂರ್ನಿ ಆಯೋಜನೆ ಅವಾಸ್ತವ ಹಾಗೂ ತುಂಬಾ ಕಠಿಣ ಎಂದು ಎರ್ಲ್​ ಎಡ್ಡಿಂಗ್ಸ್​ ತಿಳಿಸಿದ್ದಾರೆ.

ಕ್ರಿಕೆಟ್​ ಆಸ್ಟ್ರೇಲಿಯಾ ಐಸಿಸಿ ಮುಂದೆ ಸಾಕಷ್ಟು ಅಭಿಪ್ರಾಯಗಳನ್ನು ಇರಿಸಿದ್ದು, ಸಭೆ ನಡೆಸಿ ಐಸಿಸಿ ಯಾವುದಾದರೊಂದು ತೀರ್ಮಾನ ತೆಗೆದುಕೊಳ್ಳುವ ಸಾಧ್ಯತೆಯಿದೆ.

ಮಂಗಳವಾರ ಕ್ರಿಕೆಟ್​ ಆಸ್ಟ್ರೇಲಿಯಾದ ಮಧ್ಯಂತರ ಕಾರ್ಯಕಾರಿ ಮುಖ್ಯಸ್ಥರಾಗಿ ಅಧಿಕಾರ ವಹಿಸಿಕೊಂಡ ಟಿ-20 ವಿಶ್ವಕಪ್​ನ ಕಾರ್ಯಕಾರಿ ಮುಖ್ಯಸ್ಥ ನಿಕ್​ ಹಾಕ್ಲೆ ಐಸಿಸಿ ಈ ಕುರಿತು ನಿರ್ಧಾರ ತೆಗೆದುಕೊಳ್ಳುತ್ತದೆ. ನಮ್ಮ ಬಳಿ ಅತ್ಯದ್ಭುತವಾದ ಸ್ಥಳೀಯ ಆಯೋಜಕರ ಮಂಡಳಿಯಿದೆ. ಐಸಿಸಿ ಟೂರ್ನಿಗೆ ಅನುಮತಿ ಕೊಟ್ಟರೆ ಅತ್ಯಂತ ಸುವ್ಯವಸ್ಥಿತಾಗಿ ಟೂರ್ನಿ ಆಯೋಜಿಸುತ್ತಾರೆ ಎಂದಿದ್ದಾರೆ.

ಕೆಲವೊಂದು ಮೂಲಗಳ ಪ್ರಕಾರ, ಈ ವರ್ಷ ಟಿ-20 ವಿಶ್ವಕಪ್​ ನಡೆಯುವುದು ಸಾಧ್ಯವಿಲ್ಲ ಎನ್ನಲಾಗುತ್ತಿದ್ದು, ಮುಂದಿನ ವರ್ಷಕ್ಕೆ ಮುಂದೂಡಿಕೆಯಾಗುವ ಸಾಧ್ಯತೆಯಿದೆ.