ಪಾಟ್ನಾ(ಬಿಹಾರ್): ಸುಶಾಂತ್ ಸಿಂಗ್ ರಜಪೂತ್ ಸಾವಿನ ಪ್ರಕರಣದಲ್ಲಿ ಕೇಂದ್ರೀಯ ತನಿಖಾ ದಳ (ಸಿಬಿಐ) ನಡೆಸಿದ ತನಿಖೆಯು ಡ್ರಗ್ ಕಾರ್ಟೆಲ್‌ಗಳನ್ನು ಮತ್ತು ಹಲವಾರು ಪ್ರಭಾವಿಗಳ ಹೆಸರುಗಳನ್ನು ಬಹಿರಂಗಪಡಿಸುತ್ತದೆ ಎಂದು ಭೋಜ್‌ಪುರಿ ನಟ ಮತ್ತು ಬಿಜೆಪಿ ಸಂಸದ ರವಿ ಕಿಶನ್ ಭಾನುವಾರ ಹೇಳಿದ್ದಾರೆ.
ಸಿಬಿಐ ವಿಚಾರಣೆಯು ಡ್ರಗ್ ಕಾರ್ಟೆಲ್‌ಗಳನ್ನು ಬಹಿರಂಗಪಡಿಸಲಿದೆ: ಬಿಜೆಪಿ ಸಂಸದ ರವಿ ಕಿಶನ್
'ಈ ವಿಚಾರ ಆರಂಭದಲ್ಲಿ ನನಗೆ ಸಾಕಷ್ಟು ಆಘಾತಕಾರಿಯೆನಿಸಿತು. ಆದರೆ ಉದ್ಯಮದಲ್ಲಿ ಇಂತಹ ಸಂಗತಿಗಳು ಆಗಾಗ್ಗೆ ನಡೆಯುತ್ತಿರುತ್ತವೆ ಎಂದು ತಿಳಿದಿತ್ತು. ಈ ಡ್ರಗ್ ಜಾಲವು ಹಲವಾರು ನೂರು ಕೋಟಿಗಳ ಮೌಲ್ಯದ್ದಾಗಿದೆ. ಇದು ಎಲ್ಎಸ್ಡಿ, ಕೊಕೇನ್, ಎಂಡಿ ಮುಂತಾದ ವಿಧಗಳಲ್ಲಿ ಲಭ್ಯವಿದೆ. ಇನ್ನೂ ರೇವ್ ಪಾರ್ಟಿಗಳಲ್ಲಿ ಸುಲಭವಾಗಿ ದೊರೆಯುವ ಇವು ಸಾಮಾನ್ಯ ಜನರ ವ್ಯಾಪ್ತಿಯಲ್ಲಿಲ್ಲ. ತನಿಖೆಯಿಂದ ಅನೇಕ ದೊಡ್ಡ ಹೆಸರುಗಳು ಬಹಿರಂಗಗೊಳ್ಳಲಿವೆ' ಎಂದು ಕಿಶನ್ ಮಾಧ್ಯಮದವರಿಗೆ ತಿಳಿಸಿದರು.