ಅನಂತನಾಗ್: ಪ್ರೀತಿಯ ತಂದೆ ಎದ್ದು ಬಂದು ಮುದ್ದು ಮಾಡುತ್ತಿಲ್ಲವೇಕೆ ಎಂದು ಆ ಮಗು ನೋಡುತ್ತಲೇ ಇತ್ತು. ಪುಟ್ಟ ಮಗುವಿನ ಕಣ್ಣುಗಳಲ್ಲಿ ಸಾವಿರ ಪ್ರಶ್ನೆಗಳಿದ್ದವು. ತಂದೆ ಬಾರದ ಲೋಕಕ್ಕೆ ತೆರಳಿದ್ದಾರೆ ಎಂಬುದನ್ನು ಊಹಿಸಲೂ ಆಗದ ವಯಸ್ಸದು. ಆದರೆ ಈ ದೃಶ್ಯವನ್ನು ಕಂಡವರ ಕಣ್ಣುಗಳು ತುಂಬಿಬಂದವು.
ಹೌದು, ಜಮ್ಮು ಮತ್ತು ಕಾಶ್ಮೀರದ ಅನಂತ್ನಾಗ್ನಲ್ಲಿ ಉಗ್ರನ ಪೈಶಾಚಿಕ ದಾಳಿಯಿಂದ ಹುತಾತ್ಮರಾದ ಪೊಲೀಸ್ ಅಧಿಕಾರಿಗೆ ಅಂತಿಮ ನಮನ ಸಲ್ಲಿಸಿದ ಸಂದರ್ಭ ಕಲ್ಲೆದೆಯನ್ನೂ ಕರಗಿಸುವಂತಿತ್ತು ಈ ದೃಶ್ಯ. ಉಗ್ರನ ದಾಳಿಯಿಂದ ತೀವ್ರವಾಗಿ ಗಾಯಗೊಂಡು ಭಾನುವಾರ ಆಸ್ಪತ್ರೆಯಲ್ಲಿ ಹುತಾತ್ಮರಾದ ಎಸ್ಹೆಚ್ಒ ಅರ್ಷದ್ ಖಾನ್ ಅವರ ಮಗ ತಂದೆಯ ಪಾರ್ಥಿವ ಶರೀರವನ್ನೇ ನೋಡುತ್ತಿದ್ದ ದೃಶ್ಯ ಮನಕಲಕುವಂತಿತ್ತು.