'ವಂದೇ ಭಾರತ್​ ಎಕ್ಸ್​ಪ್ರೆಸ್​'ಗೆ ಮನಸೋತ ದ.ಅಮೆರಿಕ,ಏಷ್ಯಾ!ದೇಶಿ ನಿರ್ಮಿತ ಕೋಚ್​ಗೆ ಫುಲ್‌ ಡಿಮ್ಯಾಂಡ್‌

ರೈಲ್ವೆ ಅಧಿಕಾರಿಗಳು ನೀಡಿದ ಮಾಹಿತಿ ಅನ್ವಯ,ದೇಶಿ ನಿರ್ಮಿತ ರೈಲ್ವೇ ಕೋಚ್​ಗಳಿಗೆ ಇದೇ ಮೊದಲ ಬಾರಿಗೆ ಹೊರ ರಾಷ್ಟ್ರಗಳಿಂದ ಬೇಡಿಕೆ ಬರುತ್ತಿದೆ.

ನವದೆಹಲಿ:ದೇಶದ ರೈಲ್ವೆ ಇಲಾಖೆಯಲ್ಲಿನ ಅತ್ಯಂತ ವೇಗದ ಟ್ರೈನ್‌​ 'ವಂದೇ ಭಾರತ್ ಎಕ್ಸ್​ಪ್ರೆಸ್'​ ಸಂಚಾರ ಯಶಸ್ವಿಯಾಗಿ ಸಾಗುತ್ತಿರುವ ಬೆನ್ನಲ್ಲೇ ದಕ್ಷಿಣ ಏಷ್ಯಾ ರಾಷ್ಟ್ರಗಳಿಂದ ಭಾರತದಲ್ಲಿ ತಯಾರಾಗುತ್ತಿರುವ ಕೋಚ್‌ಗಳಿಗೆ ಬೇಡಿಕೆ ಬಂದಿದೆ.

ಚಾಲಕ ರಹಿತ ರೈಲುಗಳನ್ನು ತಯಾರಿಸುತ್ತಿರುವ ರಾಷ್ಟ್ರೀಯ ಸಂಚಾರ ಪ್ರಸ್ತುತ ನೂತನ ಯೋಜನೆ ಹಾಕಿಕೊಂಡಿದೆ.ರೈಲ್ವೆ ಅಧಿಕಾರಿಗಳು ನೀಡಿದ ಮಾಹಿತಿ ಅನ್ವಯ, ಗಂಟೆಗೆ 180 ಕಿ.ಮೀ. ವೇಗದ ರೈಲ್ವೆ ಕೋಚ್​ಗಳಿಗೆ ಪ್ರಥಮ ಬಾರಿಗೆ ಹೊರ ರಾಷ್ಟ್ರಗಳಿಂದ ಬೇಡಿಕೆ ಬರುತ್ತಿದೆ. ಸದ್ಯದ ತಯಾರಿಕೆಯನ್ನು ಇನ್ನಷ್ಟು ವೇಗಗೊಳಿಸಿ ಭವಿಷ್ಯದಲ್ಲಿ 'ಟ್ರೈನ್​ 18' ಗಳನ್ನು ರಫ್ತು ಮಾಡಲಾಗುತ್ತದೆ ಎಂಬುದು ತಿಳಿದುಬಂದಿದೆ.

ಚೆನ್ನೈನ 'ಇಂಟೆಗ್ರಲ್ ಕೋಚ್ ಫ್ಯಾಕ್ಟರಿನಲ್ಲಿ (ಐಸಿಎಫ್) ಅಭಿವೃದ್ಧಿಪಡಿಸಿರುವ ಅತ್ಯಾಧುನಿಕ ರೈಲು 'ಟ್ರೈನ್‌ 18' ಶೀಘ್ರದಲ್ಲಿ ದಕ್ಷಿಣ ಏಷ್ಯಾ ಹಾಗೂ ದಕ್ಷಿಣ ಅಮೆರಿಕದಲ್ಲಿ ಓಡಾಡಲಿದೆ. ಈ ಯೋಜನೆ ಕಾರ್ಯಗತಗೊಂಡರೆ ಮೇಕ್​ ಇನ್ ಇಂಡಿಯಾ ಅಭಿಯಾನಕ್ಕೆ ಮತ್ತಷ್ಟು ಉತ್ತೇಜನ ದೊರೆಯಲಿದೆ.

'ಟ್ರೈನ್​ 18'ಗೆ ದೇಶಿಯವಾಗಿ ಹೆಚ್ಚಿನ ಬೇಡಿಕೆ ಇದೆ. ನಮ್ಮ ಸ್ಥಳೀಯ ಬೇಡಿಕೆ ಪೂರೈಸಿದ ಬಳಿಕವಷ್ಟೇ ವಿದೇಶಗಳಿಗೆ ರಫ್ತು ಮಾಡಲಾಗುವುದು' ಎಂದು ರೈಲ್ವೆ ಅಧಿಕಾರಿಯೊಬ್ಬರು ಹೇಳಿದ್ದಾರೆ.