ನಿಮ್ಮ ಟಿಕೆಟ್​ ಹಣ ನೀಡಿದ್ದು ಸೋನಿಯಾ ಗಾಂಧಿ; ಕರಪತ್ರ ಹಂಚಿಕೆ ಮಾಡಿದ ಕಾಂಗ್ರೆಸ್​ ಶಾಸಕ

ವಲಸೆ ಕಾರ್ಮಿಕರು ಇದೀಗ ಶ್ರಮಿಕ್​​ ರೈಲುಗಳ ಮೂಲಕ ತಮ್ಮ ತಮ್ಮ ರಾಜ್ಯಗಳಿಗೆ ಪ್ರಯಾಣ ಬೆಳೆಸುತ್ತಿದ್ದು, ಇದರ ಮಧ್ಯೆ ಅದನ್ನು ರಾಜಕೀಯಗೊಳಿಸುವ ಕೆಲಸ ಸಹ ನಡೆಯುತ್ತಿವೆ.

ನವದೆಹಲಿ:ವಿವಿಧ ರಾಜ್ಯಗಳಲ್ಲಿ ಉಳಿದುಕೊಂಡಿದ್ದ ವಲಸೆ ಕಾರ್ಮಿಕರು ಇದೀಗ ರೈಲುಗಳ ಮೂಲಕ ತವರು ರಾಜ್ಯ ಸೇರಿಕೊಳ್ತಿದ್ದಾರೆ. ಇದೇ ವಿಷಯವನ್ನಿಟ್ಟುಕೊಂಡು ಕೆಲವರು ರಾಜಕೀಯ ಮಾಡ್ತಿದ್ದು, ಅಂತಹ ಪ್ರಕರಣವೊಂದು ಪಂಜಾಬ್​ನಲ್ಲಿ ನಡೆದಿದೆ.

ವಲಸೆ ಕಾರ್ಮಿಕರು ಪ್ರಯಾಣಿಸುತ್ತಿದ್ದ ರೈಲಿನಲ್ಲಿ ಅನೇಕ ಕರಪತ್ರ ಸಿಕ್ಕಿದ್ದು, ಅದರಲ್ಲಿ ನಿಮ್ಮ ಟಿಕೆಟ್​ ಹಣ ನೀಡಿದ್ದು ಸೋನಿಯಾ ಗಾಂಧಿ ಎಂದು ಬರೆಯಲಾಗಿದೆ. ಪಂಜಾಬ್​​ನಲ್ಲಿ ಕಾಂಗ್ರೆಸ್​ ಸರ್ಕಾರವಿದೆ. ಅಲ್ಲಿನ ಶಾಸಕ ಅಮರೀಂದರ್​​ ರಾಜ್​​ ಈ ಕರಪತ್ರ ಹಂಚಿಕೆ ಮಾಡಿದ್ದಾರೆ ಎಂದು ತಿಳಿದು ಬಂದಿದೆ.

ಕರಪತ್ರದಲ್ಲಿ ಸೋನಿಯಾ ಗಾಂಧಿ, ಪಂಜಾಬ್​ ಸಿಎಂ ಅಮರೀಂದರ್​​ ಸಿಂಗ್​ ಸೇರಿದಂತೆ ಅನೇಕ ಕಾಂಗ್ರೆಸ್​ ಮುಖಂಡರ ಫೋಟೊಗಳಿವೆ.

ವಲಸೆ ಕಾರ್ಮಿಕರು ರೈಲಿನಲ್ಲಿ ಹತ್ತಿ ಪ್ರಯಾಣ ಬೆಳೆಸುವುದಕ್ಕೂ ಮುಂಚಿತವಾಗಿ ರೈಲ್ವೆ ನಿಲ್ದಾಣದಲ್ಲಿ ಭಾಷಣ ಸಹ ಮಾಡಿದ್ದಾರೆ ಎಂದು ವರದಿಯಾಗಿದೆ.ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯೆ ನೀಡಿರುವ ಕೇಂದ್ರ ರೈಲ್ವೆ ಇಲಾಖೆ ಶೇ. 85ರಷ್ಟು ನಾವು ಸಬ್ಸಿಡಿ ನೀಡಿದ್ದು, ಉಳಿದ ಹಣ ತದನಂತರ ರಾಜ್ಯ ಸರ್ಕಾರಗಳಿಂದ ಬರಲಿದೆ ಎಂದಿದೆ.