ಆಗ್ರಾದ ಕ್ವಾರಂಟೈನ್ ನಿಜಬಣ್ಣ ಬಯಲು: ಈ ಕೇಂದ್ರದಲ್ಲಿ ಎಲ್ಲವೂ ಅಯೋಮಯ

ಇಲ್ಲಿನ ಆಗ್ರಾ ಹಿಂದೂಸ್ತಾನ್ ಇಂಜಿನಿಯರಿಂಗ್ ಕಾಲೇಜನ್ನು ಕ್ವಾರಂಟೈನ್​ ಕೇಂದ್ರವಾಗಿ ಪರಿವರ್ತಿಸಲಾಗಿದೆ. ಆದರೆ, ಈ ಕೇಂದ್ರದಲ್ಲೇ ಅವ್ಯವಸ್ಥೆ ಕಂಡುಬಂದಿದೆ. ಕ್ವಾರಂಟೈನ್ ಆಗಿರುವ ವ್ಯಕ್ತಿಗಳಿಗೆ ಹೊರಗಿನಿಂದ ನೀರು, ಬಿಸ್ಕೇಟ್​​ಗಳನ್ನು ಎಸೆಯುತ್ತಿರುವ ಶಾಕಿಂಗ್ ವಿಡಿಯೋ ಈಗ ವೈರಲ್​ ಆಗುತ್ತಿದೆ. ಅಲ್ಲದೇ ಕ್ವಾರಂಟೈನ್​ನಲ್ಲಿ ಬಂಧಿಯಾಗಿರುವ ವ್ಯಕ್ತಿಗಳು ಸಾಮಾಜಿಕ ಅಂತರ ಕಾಯ್ದುಕೊಳ್ಳದೇ ನಿರ್ಲಕ್ಷ್ಯ ವಹಿಸಲಾಗಿದೆ.

ಆಗ್ರಾ (ಉತ್ತರ ಪ್ರದೇಶ): ಉತ್ತರ ಪ್ರದೇಶದ ಆಗ್ರಾ ಕೊರೊನಾ ವೈರಸ್ ತಡೆಗಟ್ಟುವ ನಿಟ್ಟಿನಲ್ಲಿ ಈ ಮೊದಲು ಪ್ರಧಾನಿ ಮೋದಿ ಅವರಿಂದಲೇ ಪ್ರಶಂಸೆಗೆ ಒಳಗಾಗಿತ್ತು. ಆದರೆ, ಇದೀಗ ಇಲ್ಲಿನ ಕ್ವಾರಂಟೈನ್​​​ನಲ್ಲಿ ಸೆರೆಹಿಡಿಯಲಾದ ವಿಡಿಯೋವೊಂದು ಆಗ್ರಾದ ನಿಜ ಬಣ್ಣ ಬಯಲು ಮಾಡಿದೆ.

ವಿಡಿಯೋದಲ್ಲಿ ಹೊರಗಿನಿಂದ ನಿಂತಿರುವ ವ್ಯಕ್ತಿ ಕ್ವಾರಂಟೈನ್​ನಲ್ಲಿರುವವರಿಗೆ ನೀರು, ಬಿಸ್ಕೆಟ್​ ಪ್ಯಾಕೆಟ್​​ಗಳನ್ನು ಹೊರಗಿನಿಂದ ಎಸೆಯುತ್ತಿರುವ ದೃಶ್ಯ ಸೆರೆಯಾಗಿದೆ.ಇದಲ್ಲದೇ ಹೊರಗಿರುವ ವ್ಯಕ್ತಿ ಅಗತ್ಯ ರಕ್ಷಣಾ ಕವಚ ಬಳಸಿರುವುದು ಕಂಡುಬಂದಿದೆ. ಆದರೆ ಕ್ವಾರಂಟೈನ್​ನಲ್ಲಿರುವ ವ್ಯಕ್ತಿಗಳು ಸಾಮಾಜಿಕ ಅಂತರ ಕಾಯ್ದುಕೊಳ್ಳದೇ ಒಬ್ಬರ ಮೇಲೊಬ್ಬರು ನೂಕುನುಗ್ಗಲಲ್ಲಿ ಆಹಾರ ಪದಾರ್ಥ ಕಿತ್ತುಕೊಳ್ಳಲು ಪ್ರಯತ್ನಸುತ್ತಿರುವುದು ಕಂಡುಬಂದಿದೆ.

ಸದ್ಯ ಈ ವಿಡಿಯೋ ಇಲ್ಲಿನ ಆಗ್ರಾ ಹಿಂದೂಸ್ತಾನ್ ಇಂಜಿನೀಯರಿಂಗ್ ಕಾಲೇಜಿನ ಬಳಿ ಚಿತ್ರೀಕರಿಸಿದ್ದು ಎನ್ನಲಾಗ್ತಿದೆ. ಈ ಕಾಲೇಜನ್ನು ಜಿಲ್ಲಾಡಳಿತ ಕ್ವಾರಂಟೈನ್ ಸ್ಥಳವಾಗಿ ಪರಿವರ್ತಿಸಿತ್ತು. ಈ ಕ್ವಾರಂಟೈನ್ ಕೇಂದ್ರದಲ್ಲಿ ಜನರನ್ನು ಸಾಮಾಜಿಕ ಅಂತರದಲ್ಲಿ ಇಡಲಾಗಿಲ್ಲ. ಅಲ್ಲದೇ ಜನರು ನೀರಿನ ಬಾಟಲಿ ತೆಗೆದುಕೊಳ್ಳಲು ಗೇಟ್​ನ ಸಂದಿಯಿಂದ ಕೈ ಹಾಕಿ ತೆಗೆದುಕೊಳ್ಳುತ್ತಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ.ಇನ್ನೂ ಈ ಕುರಿತು ಕೇಂದ್ರ ಉಸ್ತುವಾರಿ ಡಾ. ಜಿತೇಂದ್ರ ಲವಾನಿಯಾ ಅವರ ಬಳಿ ಮಾತನಾಡಲು ಈಟಿವಿ ಭಾರತ್ ಪ್ರಯತ್ನಿಸಿತ್ತು.

ಆದರೆ, ಅವರ ಮೊಬೈಲ್​​ ಸಂಪರ್ಕ ಸಾಧ್ಯವಾಗಿಲ್ಲ. ಈ ನಡುವೆ ಉತ್ತರ ಪ್ರದೇಶದಲ್ಲಿ ವೈರಸ್ ಪ್ರಕರಣಗಳು 1,868ಕ್ಕೆ ತಲುಪಿದ್ದು, ಸಾವಿನ ಸಂಖ್ಯೆ 29ಕ್ಕೆ ಏರಿಕೆಯಾಗಿದೆ.