ಕಾಂಗ್ರೆಸ್​ ನಾಯಕ, ಲೇಖಕ ಶಶಿ ತರೂರ್​​ಗೆ ಪ್ರತಿಷ್ಠಿತ ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ

ಕಾಂಗ್ರೆಸ್ ಸಂಸದ ಶಶಿ ತರೂರ್​ ಅವರ 'ಆನ್ ಎರಾ ಆಫ್ ಡಾರ್ಕ್​ನೆಸ್​​​' ಪುಸ್ತಕಕ್ಕಾಗಿ ಪ್ರಸಕ್ತ ಸಾಲಿನ ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಸಿಕ್ಕಿದೆ.

ನವದೆಹಲಿ:ಕಾಂಗ್ರೆಸ್​​​ ಸಂಸದ, ಲೇಖಕ ಶಶಿ ತರೂರ್​ ಪ್ರಸಕ್ತ ಸಾಲಿನ ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿಗೆ ಭಾಜನರಾಗಿದ್ದು, An Era of Darkness ಎಂಬ ಪುಸ್ತಕಕ್ಕಾಗಿ ಅವರಿಗೆ ಈ ಪ್ರತಿಷ್ಠಿತ ಗೌರವ ಸಿಕ್ಕಿದೆ.

ತಿರುವನಂತಪುರದ ಸಂಸದರಾಗಿರುವ ಶಶಿ ತರೂರ್​​​ 2016ರಲ್ಲಿ An Era of Darkness ಪುಸ್ತಕ ಪ್ರಕಟಿಸಿದ್ದರು. ಇದೇ ಕೃತಿ ಇಂಗ್ಲೆಂಡ್​​ನಲ್ಲೂ ಮುದ್ರಣಗೊಂಡು ಪ್ರಕಟಗೊಂಡಿತ್ತು. ಜತೆಗೆ ಕಡಿಮೆ ಅವಧಿಯಲ್ಲಿ 50 ಸಾವಿರಕ್ಕೂ ಅಧಿಕ ಪ್ರತಿಗಳು ಮಾರಾಟಗೊಂಡಿದ್ದವು.

23 ಭಾಷೆಗಳಲ್ಲಿ ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪ್ರಕಟಗೊಂಡಿದ್ದು, ಅದರಲ್ಲಿ ಆಂಗ್ಲ ಭಾಷೆಯ ಕೃತಿಗಾಗಿ ಶಶಿ ತರೂರ್​ ಅವರು ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಈ ಪ್ರಶಸ್ತಿಯು 1 ಲಕ್ಷ ರೂ. ನಗದು ಹಾಗೂ ಸ್ಮರಣಿಕೆಯನ್ನು ಒಳಗೊಂಡಿದೆ.