ತುಲಾಭಾರ ನಡೆಸುವಾಗ ಮುರಿದು ಬಿದ್ದ ತಕ್ಕಡಿ: ಕೈ ನಾಯಕ ಶಶಿ ತರೂರ್​ ತಲೆಗೆ ಗಾಯ

ತುಲಾಭಾರ ನಡೆಸುವಾಗ ತಕ್ಕಡಿ ಮುರಿದು ಬಿದ್ದ ಪರಿಣಾಮ ಕಾಂಗ್ರೆಸ್​ ನಾಯಕ ಶಶಿ ತರೂರ್ ಗಂಭೀರವಾಗಿ ಗಾಯಗೊಂಡಿದ್ದಾರೆ.

ತಿರುವನಂತಪುರಂ:ಇಲ್ಲಿನ ಲೋಕಸಭಾ ಕ್ಷೇತ್ರದ ಸಂಸದ ಮತ್ತು ಕಾಂಗ್ರೆಸ್​ ಅಭ್ಯರ್ಥಿ ಶಶಿ ತರೂರ್, ಗಾಂಧಾರಿ ಅಮ್ಮನ್ ಕೋವಿಲ್ ದೇವಸ್ಥಾನದಲ್ಲಿ ತುಲಾಭಾರ ನಡೆಸುವ ವೇಳೆ ತಕ್ಕಡಿ ಮುರಿದು ಬಿದ್ದ ಪರಿಣಾಮ ಗಂಭೀರವಾಗಿ ಗಾಯಗೊಂಡಿದ್ದಾರೆ.

ಕೇರಳ ರಾಜ್ಯದಾದ್ಯಂತ ಹೊಸ ವರ್ಷ 'ವಿಷು' ಹಬ್ಬವನ್ನು ಆಚರಿಸಲಾಗುತ್ತಿದ್ದು, ಜನರು ಪ್ರಾರ್ಥನೆ ಸಲ್ಲಿಸಲು ದೇವಾಲಯಗಳಿಗೆ ಭೇಟಿ ನೀಡುತಿದ್ದಾರೆ. ಇತ್ತ ಶಶಿ ತರೂರ್​ ಕೂಡ ಪೂಜೆ ಸಲ್ಲಿಸಲು ಗಾಂಧಾರಿ ಅಮ್ಮನ್ ಕೋವಿಲ್ ದೇವಾಲಯಕ್ಕೆ ಭೇಟಿ ನೀಡಿದ್ದರು. ದೇವಾಲಯದಲ್ಲಿ ತುಲಾಭಾರ ನಡೆಸುವ ವೇಳೆ ಏಕಾಏಕಿ ತಕ್ಕಡಿ ಮುರಿದು ಬಿದ್ದ ಪರಿಣಾಮ ಕೆಳಗೆ ಬಿದ್ದ ಶಶಿ ತರೂರು ಗಂಭೀರವಾಗಿ ಗಾಯಗೊಂಡಿದ್ದಾರೆ.

ತಕ್ಷಣ ಅವರನ್ನ ಸ್ಥಳೀಯ ಆಸ್ಪತ್ರೆಗೆ ಕೊಂಡೊಯ್ಯಲಾಗಿದೆ. ತಲೆ ಭಾಗದಲ್ಲಿ ಗಂಭೀರ ಗಾಯವಾಗಿದ್ದು, 6 ಹೊಲಿಗೆಗಳನ್ನ ಹಾಕಲಾಗಿದೆ. ಸದ್ಯ ಶಶಿ ತರೂರ್​ ಆರೋಗ್ಯವಾಗಿದ್ದು, ಯಾವುದೇ ಅಪಾಯಯವಿಲ್ಲ ಎಂದು ವೈದ್ಯರು ತಿಳಿಸಿದ್ದಾರೆ.

ಎರಡು ಬಾರಿ ತಿರುವನಂತಪುರಂ ಕ್ಷೇತ್ರದಿಂದ ಲೋಕಸಭೆಗೆ ಆಯ್ಕೆಯಾಗಿದ್ದ ಶಶಿ ತರೂರ್​ ಹ್ಯಾಟ್ರಿಕ್​ ಗೆಲುವಿನ ನಿರೀಕ್ಷೆಯಲ್ಲಿದ್ದಾರೆ. ತರೂರ್​ ವಿರುದ್ಧ ಮಿಜೋರಾಂನ ಮಾಜಿ ಗವರ್ನರ್​, ಬಿಜೆಪಿ ನಾಯಕ ಕುಮ್ಮಾನಂ ರಾಜಶೇಖರನ್ ಸ್ಪರ್ಧಿಸಿದ್ದಾರೆ.