ಕೊರೊನಾ ವಿರುದ್ಧ ಹೋರಾಡುತ್ತಿರುವ ದಾದಿಯರಿಗೆ ಕೃತಜ್ಞತೆ ಅರ್ಪಿಸಿದ ರಾಜಕೀಯ ನಾಯಕರು

ದೇಶಾದ್ಯಂತ ಕೊರೊನಾ ರೋಗಿಗಳ ಸೇವೆ ಸಲ್ಲಿಸುತ್ತಿರುವ ದಾದಿಯರಿಗೆ ಗೃಹ ಸಚಿವ ಅಮಿತ್ ಷಾ ಸೇರಿದಂತೆ ಇತರ ರಾಜಕೀಯ ನಾಯಕರು ಕೃತಜ್ಞತೆ ಅರ್ಪಿಸಿದ್ದಾರೆ. ನರ್ಸ್​ಗಳೇ ನಿಜವಾದ ಹೀರೋಗಳು ಎಂದು ಹೊಗಳಿದ್ಧಾರೆ.

ಇಂದು ವಿಶ್ವ ದಾದಿಯರ ದಿನ. ಈ ವಿಶೇಷ ದಿನದಂದು ಕೇಂದ್ರ ಗೃಹ ಸಚಿವ ಅಮಿತ್ ಷಾ ಹಾಗೂ ಮಾಜಿ ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಕೊರೊನಾ ವಿರುದ್ಧ ಹೋರಾಡುತ್ತಿರುವ ದಾದಿಯರಿಗೆ ಶುಭ ಕೋರಿದ್ದಾರೆ. ಅಲ್ಲದೆ ದಾದಿಯರನ್ನು ಕೊಂಡಾಡುವ ಮೂಲಕ ಅವರೇ ನಿಜವಾದ ಹಿರೋಗಳು ಎಂದು ಹೊಗಳಿದ್ಧಾರೆ.

ಈ ಬಗ್ಗೆ ಟ್ವೀಟ್ ಮಾಡಿರುವ ಗೃಹಸಚಿವ ಅಮಿತ್ ಷಾ, 'ಪ್ರಪಂಚಾದ್ಯಂತ ತಮ್ಮ ಅಮೂಲ್ಯ ಸೇವೆ ಸಲ್ಲಿಸುತ್ತಿರುವ ದಾದಿಯರಿಗೆ ಕೃತಜ್ಞತೆ ವ್ಯಕ್ತಪಡಿಸಿದ್ದಾರೆ. ದಾದಿಯರು ವೈದ್ಯಕೀಯ ವಲಯದ ಬೆನ್ನುಲುಬು ಇದ್ದಂತೆ, ತಮ್ಮ ಪ್ರಾಣವನ್ನೂ ಲೆಕ್ಕಿಸದೆ ಕೋವಿಡ್-19 ವಿರುದ್ಧ ಹೋರಾಡುತ್ತಿರುವ ಅವರ ಸೇವಾ ಮನೋಭಾವ ನಿಜಕ್ಕೂ ಅವಿಸ್ಮರಣೀಯ, ದಾದಿಯರ ಈ ತ್ಯಾಗ, ಶ್ರಮರಹಿತ ಸೇವೆಗೆ ಇಡೀ ದೇಶವೇ ವಂದಿಸಲು ಬಯಸುತ್ತಿದೆ ಎಂದು ಟ್ವೀಟ್ ಮಾಡಿದ್ದಾರೆ.

ರಾಹುಲ್ ಗಾಂಧಿ ಕೂಡಾ ಟ್ವೀಟ್ ಮಾಡಿ, ಕೊರೊನಾ ರೋಗಿಗಳನ್ನು ಗುಣಪಡಿಸಲು ನರ್ಸ್​ಗಳು ಮಾಡುತ್ತಿರುವ ಸೇವೆಯನ್ನು ಶ್ಲಾಘಿಸಿದ್ಧಾರೆ. ದಣಿವರಿಯದ ಕೆಲಸ ಮಾಡುತ್ತಿರುವ ದಾದಿಯರಿಗೆ ಧನ್ಯವಾದ ಅರ್ಪಿಸಿದ್ದಾರೆ.

ಕೇರಳದ ವಯನಾಡಿನ ಕಾಂಗ್ರೆಸ್​ ಸಂಸದರೊಬ್ಬರು ಟ್ವೀಟ್ ಮಾಡಿ, ದೇಶಾದ್ಯಂತ ನಮ್ಮ ದಾದಿಯರು ಜೀವಗಳನ್ನು ಉಳಿಸಲು ದಣಿವರಿಯದ ಸೇವೆ ಸಲ್ಲಿಸುತ್ತಿದ್ದಾರೆ. ದಾದಿಯರೇ ನಿಜವಾದ ಹೀರೋಗಳು. ವಿಶ್ವ ದಾದಿಯರ ದಿನವಾದ ಇಂದು ಕಠಿಣ ಪರಿಶ್ರಮ ಹಾಗೂ ಸಮರ್ಪಣಾ ಮನೋಭಾವದಿಂದ ಕೆಲಸ ನಿರ್ವಹಿಸುತ್ತಿರುವ ದಾದಿಯರಿಗೆ ಕೃತಜ್ಞತೆ ಅರ್ಪಿಸಿದ್ದಾರೆ.