ಕೊಯ್ಲು ಮಾಡಿದ ಬೆಳೆಗೆ ಬೆಂಕಿ ಇಟ್ಟರೆ ಜೋಕೆ... ಮೂರು ರಾಜ್ಯದ ನಾಗರಿಕರಿಗೆ ಸುಪ್ರೀಂ ಎಚ್ಚರಿಕೆ!

ಉತ್ತರಪ್ರದೇಶ, ಪಂಜಾಬ್​, ಹರಿಯಾಣ ರಾಜ್ಯಗಳ ಮುಖ್ಯ ಕಾರ್ಯದರ್ಶಿಗಳು ಸುಪ್ರೀಂಕೋರ್ಟ್​ ಎದುರು ಹಾಜರಾಗಿ ವಿವರಣೆ ನೀಡುವಂತೆ ಸಮನ್ಸ್​ ಜಾರಿಗೊಳಿಸಿದೆ.

ನವದೆಹಲಿ: ಕಳೆದ ಕೆಲ ದಿನಗಳಿಂದ ರಾಷ್ಟ್ರ ರಾಜಧಾನಿ ನವದೆಹಲಿಯ ವಾತಾವರಣ ಮತ್ತಷ್ಟು ವಿಷಮಗೊಂಡಿದೆ. ಹೆಚ್ಚುತ್ತಿರುವ ವಾಯು ಮಾಲಿನ್ಯದಿಂದ ಜನ ಮನೆಯಿಂದ ಹೊರ ಬಾರದ ಪರಿಸ್ಥಿತಿ ಇದೆ.

ಈ ನಡುವೆ ವಾಯು ಮಾಲಿನ್ಯ ಕಡಿತ ಮಾಡುವ ದೃಷ್ಟಿಯಿಂದ ಸರಿ- ಬೆಸ(ಒಡ್​ -ಈವನ್) ಯೋಜನೆ ಜಾರಿಗೊಳಿಸಿದೆ. ಈ ಬಗ್ಗೆ ಅಂದರೆ ಯೋಜನೆ ಜಾರಿಯಿಂದ ಎಷ್ಟು ಪ್ರಮಾಣದಲ್ಲಿ ಪರಿಸರ ಮಾಲಿನ್ಯ ಕಡಿಮೆ ಆಗಿದೆ ಎಂಬುದನ್ನ ದಾಖಲೆ ಸಮೇತ ಶುಕ್ರವಾರದ ಒಳಗೆ ವರದಿ ಸಲ್ಲಿಸುವಂತೆ ದೆಹಲಿ ರಾಜ್ಯ ಸರ್ಕಾರಕ್ಕೆ ಸುಪ್ರೀಂಕೋರ್ಟ್​​ ಸೂಚನೆ ನೀಡಿದೆ.

ಇನ್ನು ಎನ್​ಆರ್​ಸಿಯಲ್ಲಿ ಕಟ್ಟಡ ನಿರ್ಮಾಣ ಹಾಗೂ ಕಟ್ಟಡಗಳನ್ನು ತೆರವುಗೊಳಿಸುವ ಕೆಲಸಗಳನ್ನ ಕೋರ್ಟ್​ ನಿರ್ದೇಶನ ನೀಡುವವರೆಗೂ ಸ್ಥಗಿತಗೊಳಿಸುವಂತೆ ಕಟ್ಟುನಿಟ್ಟಿನ ಸೂಚನೆ ನೀಡಿದೆ. ಇಂತಹ ಚಟುವಟಿಕೆಗಳೇನಾದರೂ ಕಂಡು ಬಂದರೆ ಅಂತಹವರ ಮೇಲೆ 1 ಲಕ್ಷ ರೂ. ವರೆಗೂ ದಂಡ ವಿಧಿಸಲಾಗುವುದು ಎಂದು ಆದೇಶ ಹೊರಡಿಸಿದೆ.

ಇನ್ನು ಯಾರಾದರೂ ಕೊಯ್ಲು ಬೆಳೆಗೆ ಬೆಂಕಿ ಇಟ್ಟು ಇನ್ನಷ್ಟು ವಾತಾವರಣ ಕಲುಷಿತಗೊಳಿಸಿದರೆ ಅವರನ್ನ ನ್ಯಾಯಾಂಗ ನಿಂದನೆ ಕೇಸ್​ ನಡಿ ವಿಚಾರಣೆಗೆ ಒಳಪಡಿಸಲಾಗುವುದು ಎಂದು ಸುಪ್ರೀಂಕೋರ್ಟ್​​ ಗ್ರಾಮ ಪಂಚಾಯ್ತಿ ಸರ್​ಪಂಚ್ಗಳಿಗೆ ಸೂಚನೆ ನೀಡುವಂತೆ ರಾಜ್ಯ ಮುಖ್ಯ ಕಾರ್ಯದರ್ಶಿಗಳ ಮೂಲಕ ಮಾಹಿತಿ ರವಾನಿಸಿದೆ.

ಮತ್ತೊಂದು ಕಡೆ ಉತ್ತರಪ್ರದೇಶ, ಪಂಜಾಬ್​, ಹರಿಯಾಣ ರಾಜ್ಯಗಳ ಮುಖ್ಯ ಕಾರ್ಯದರ್ಶಿಗಳು ಸುಪ್ರೀಂಕೋರ್ಟ್​ ಎದುರು ಹಾಜರಾಗಿ ವಿವರಣೆ ನೀಡುವಂತೆ ಸಮನ್ಸ್​ ಜಾರಿಗೊಳಿಸಿದೆ.