ರಕ್ಷಣಾ ಪಡೆಗಳ ಆಧುನೀಕರಣಕ್ಕೆ 90 ಸಾವಿರ ಕೋಟಿ ರೂ. ಮೀಸಲು!

ಚೀನಾ ಹಾಗೂ ಭಾರತದ ನಡುವಿನ ಗಡಿ ಪ್ರದೇಶದಲ್ಲಿ ಉದ್ವಿಗ್ನತೆ ಹಿನ್ನೆಲೆಯಲ್ಲಿ ಸಶಸ್ತ್ರ ಪಡೆಗಳ ಆಧುನೀಕರಣಕ್ಕಾಗಿ 90 ಸಾವಿರ ಕೋಟಿ ರೂ. ಮೀಸಲಿಡಲಾಗಿದೆ.

ನವದೆಹಲಿ: 2020-2021ರಲ್ಲಿ ಸಶಸ್ತ್ರ ಪಡೆಗಳ ಆಧುನೀಕರಣಕ್ಕಾಗಿ ಸುಮಾರು 90,048 ಕೋಟಿ ರೂಪಾಯಿ ಬಂಡವಾಳವನ್ನು ಮೀಸಲಿಡಲಾಗಿದೆ ಎಂದು ರಕ್ಷಣಾ ಸೇವೆಗಳ ಅಂದಾಜು ವರದಿ ಮಾಹಿತಿ ನೀಡಿದೆ.

ಈ ಮೊತ್ತ ಹಿಂದಿನ ವರ್ಷಕ್ಕಿಂತ 9 ಸಾವಿರ ಕೋಟಿ ಏರಿಕೆಯಾಗಿದ್ದು, ಸೇನೆಗೆ ಹೊಸ ಸಾಮಗ್ರಿಗಳ ಸಂಗ್ರಹಣೆ, ಸದ್ಯಕ್ಕೆ ಇರುವ ಸಾಮಗ್ರಿಗಳನ್ನು ಹಾಗೂ ವ್ಯವಸ್ಥೆಯನ್ನು ಉನ್ನತೀಕರಿಸಲು ಈ ಬಂಡವಾಳವನ್ನು ಬಳಸಲಾಗುತ್ತದೆ.

ರಕ್ಷಣಾ ಇಲಾಖೆಯ ರಾಜ್ಯ ಸಚಿವ ಶ್ರೀಪಾದ್ ನಾಯಕ್​ ಈ ಕುರಿತು ಪ್ರತಿಕ್ರಿಯೆ ನೀಡಿದ್ದು, ಬಂಡವಾಳ ಸಂಗ್ರಹಣೆ ಯೋಜನೆಡಿಯಲ್ಲಿ ಒಪ್ಪಿಗೆಯಾದ ಸಶಸ್ತ್ರ ಪಡೆಗಳ ಆಧುನೀಕರಣ ಪ್ರಕ್ರಿಯೆ ನಡೆಯುತ್ತಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಸೋಮವಾರ ರಾಜ್ಯಸಭಾ ಸದಸ್ಯರಾದ ಪಿ. ಭಟ್ಟಾಚಾರ್ಯ ಹಾಗೂ ವಿಜಯ್​ಪಾಲ್ ಸಿಂಗ್ ತೋಮರ್ ಅವರ ಪ್ರಶ್ನೆಗೆ ಈ ರೀತಿಯಾಗಿ ಉತ್ತರಿಸಿದ್ದಾರೆ. ಸಂಸತ್​ನ ಮಾನ್ಸೂನ್ ಅಧಿವೇಶನ ಸೋಮವಾರದಿಂದ ಆರಂಭವಾಗಿದ್ದು, ಅಕ್ಟೋಬರ್ 1ರವರೆಗೆ ನಡೆಯಲಿದೆ.