ಚಂದನ್​​ವಾಡಿ ಸ್ಮಶಾನದಲ್ಲಿ ನಟ ರಿಷಿ ಕಪೂರ್​ ಅಂತ್ಯಕ್ರಿಯೆ... ಕೆಲವರಷ್ಟೇ ಭಾಗಿ!

ಬಾಲಿವುಡ್​ ಹಿರಿಯ ನಟ ರಿಷಿ ಕಪೂರ್​​ ಅಂತ್ಯಕ್ರಿಯೆ ಸರಳವಾಗಿ ನಡೆಯಿತು. ದೇಶದಲ್ಲಿ ಲಾಕ್​ಡೌನ್​ ಹೇರಿಕೆ ಹಿನ್ನೆಲೆಯಲ್ಲಿ ಕೆಲವರು ಮಾತ್ರ ಅಂತ್ಯ ಸಂಸ್ಕಾರದಲ್ಲಿ ಭಾಗಿಯಾಗಿದ್ದರು.

ಮುಂಬೈ: ಇಂದು ಬೆಳಗ್ಗೆ ನಿಧನರಾದ ಬಾಲಿವುಡ್​ನ ಹಿರಿಯ ನಟ ರಿಷಿ ಕಪೂರ್​ ಅಂತ್ಯ ಸಂಸ್ಕಾರ ದಕ್ಷಿಣ ಮುಂಬೈನಲ್ಲಿರುವ ಚಂದನ್​ವಾಡಿ ಶವಾಗಾರದಲ್ಲಿ ನಡೆಯಿತು.

ಕಳೆದ ಎರಡು ವರ್ಷದಿಂದ ಕ್ಯಾನ್ಸರ್​ನಿಂದ ಬಳಲುತ್ತಿದ್ದ ಬಾಲಿವುಡ್​ನ ಹಿರಿಯ ನಟ ರಿಷಿ ಕಪೂರ್​ ಇಂದು ಬೆಳಗ್ಗೆ ಮುಂಬೈನ ಖಾಸಗಿ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದರು. ಆಸ್ಪತ್ರೆಯಿಂದ ನೇರವಾಗಿ ಶವಾಗಾರಕ್ಕೆ ಅವರ ಪಾರ್ಥಿವ ಶರೀರ ಆ್ಯಂಬುಲೆನ್ಸ್​​ನಲ್ಲಿ ತೆಗೆದುಕೊಂಡು ಬಂದು ಅಂತ್ಯ ಸಂಸ್ಕಾರ ನೆರವೇರಿಸಲಾಯಿತು.

ಖ್ಯಾತ ಹಿರಿಯ ನಟ ರಿಷಿ ಕಪೂರ್ ನಿಧನ: ಭಾರತೀಯ ಚಿತ್ರರಂಗಕ್ಕೆ ಆಘಾತ

ದೇಶದಲ್ಲಿ ಲಾಕ್​ಡೌನ್​ ಹೇರಲಾಗಿರುವ ಕಾರಣ ಪಾರ್ಥಿವ ಶರೀರದ ವೀಕ್ಷಣೆ ಮಾಡಲು ಯಾವುದೇ ರೀತಿಯ ವ್ಯವಸ್ಥೆ ಮಾಡಿರಲಿಲ್ಲ. ಅಂತ್ಯ ಸಂಸ್ಕಾರದ ವೇಳೆ ಮಗಳು ರಿಧಿಮಾ ಕಪೂರ್​ ಭಾಗಿಯಾಗಿರಲಿಲ್ಲ. ಪತ್ನಿ ನೀತು ಸಿಂಗ್​, ಮಗ ರಣಬೀರ್​ ಕಪೂರ್​, ಸಹೋದರ ರಣಧೀರ್​, ಕರಿನಾ ಕಪೂರ್ ಖಾನ್​, ನಟ ಸೈಫ್​ ಅಲಿ ಖಾನ್​, ಅಭಿಷೇಕ್​ ಬಚ್ಚನ್​, ಆಲಿಯಾ ಭಟ್ಟ ಹಾಗೂ ಅನಿಲ್​ ಅಂಬಾನಿ ಈ ವೇಳೆ ಭಾಗಿಯಾಗಿದ್ದರು.