'ಅಂತರ್ಜಾಲ ಬಳಸುವುದು ಮೂಲಭೂತ ಹಕ್ಕು': ಕೇರಳ ಹೈಕೋರ್ಟ್​ ಪ್ರತಿಪಾದನೆ

ಅಂತರ್ಜಾಲ (Internet) ಬಳಸುವುದು ಸಂವಿಧಾನದಡಿ 'ಮೂಲಭೂತ ಹಕ್ಕು' ಎಂದು ಕೇರಳ ಹೈಕೋರ್ಟ್​ ಪ್ರತಿಪಾದಿಸಿದೆ. ಹಾಸ್ಟೆಲ್​ನಲ್ಲಿದ್ದ ನಿಯಮಗಳನ್ನು ವಿರೋಧಿಸಿ ವಿದ್ಯಾರ್ಥಿನಿಯೊಬ್ಬಳು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ಕೇರಳ ಹೈಕೋರ್ಟ್​ ನ್ಯಾಯಮೂರ್ತಿ ಪಿ ವಿ ಆಶಾ ಈ ತೀರ್ಪು ಪ್ರಕಟಿಸಿದ್ದಾರೆ.

ತಿರುವನಂತಪುರಂ:ಅಂತರ್ಜಾಲ ಬಳಕೆ ಸಂವಿಧಾನದಡಿಯಲ್ಲಿ 'ಮೂಲಭೂತ ಹಕ್ಕು' ಎಂದು ಕೇರಳ ಹೈಕೋರ್ಟ್​ ಪ್ರತಿಪಾದಿಸಿದೆ.

ಕೇರಳ ಹೈಕೋರ್ಟ್ ನ್ಯಾಯಮೂರ್ತಿ ಪಿ. ವಿ. ಆಶಾ ಈ ತೀರ್ಪು ಪ್ರಕಟಿಸಿದ್ದಾರೆ.

ಕೇರಳದ ಕೋಯಿಕೋಡ್‌ನ ಶ್ರೀ ನಾರಾಯಣ ಕಾಲೇಜಿನ ಬಾಲಕಿಯರ ವಿದ್ಯಾರ್ಥಿ ನಿಲಯದಲ್ಲಿ ವಿದ್ಯಾರ್ಥಿನಿಯರು ಸಂಜೆ 6 ರಿಂದ 10 ರವರೆಗೆ ಮೊಬೈಲ್ ಬಳಸುವುದನ್ನು ನಿಷೇಧಿಸಲಾಗಿತ್ತು. ಅಲ್ಲದೆ ಹಾಸ್ಟೆಲ್ ಆವರಣದಲ್ಲಿ ಪದವಿ ಪೂರ್ವ ಕಾಲೇಜಿನ ವಿದ್ಯಾರ್ಥಿನಿಯರು ಲ್ಯಾಪ್​ಟಾಪ್​ ಬಳಸುವುದಕ್ಕೂ ನಿಷೇಧ ಹೇರಲಾಗಿತ್ತು. ಹಾಸ್ಟೆಲ್​ ಆಡಳಿತ ಮಂಡಳಿಯ ಈ ನಿರ್ಧಾರಕ್ಕೆ ಭಾರಿ ವಿರೋಧ ವ್ಯಕ್ತವಾಗಿತ್ತು.

ನಿಯಮ ಸಡಿಲಿಸುವಂತೆ, ವಿದ್ಯಾರ್ಥಿನಿಯೋರ್ವಳು ಕಾಲೇಜು ಪ್ರಾಂಶುಪಾಲರಿಗೆ ಮನವಿ ಸಲ್ಲಿಸಿದ್ದಳು. ಇದಕ್ಕೆ ಒಪ್ಪದ ಆಡಳಿತ ಮಂಡಳಿ, ವಿದ್ಯಾರ್ಥಿನಿಗೆ ತನ್ನ ಹಾಸ್ಟೆಲ್ ಕೊಠಡಿಯನ್ನು 12 ಗಂಟೆಗಳೊಳಗೆ ಖಾಲಿ ಮಾಡುವಂತೆ ಸೂಚಿಸಿತು. ಬಳಿಕ ಆಕೆಯ ಹಾಸ್ಟೆಲ್​ ಕೋಣೆಗೆ ಬೀಗ ಜಡಿಯಲಾಗಿತ್ತು. ಆಕೆಗೆ ತನ್ನ ವೈಯಕ್ತಿಕ ವಸ್ತುಗಳನ್ನು ಸಂಗ್ರಹಿಸಲು ಕೂಡಾ ಅವಕಾಶ ನೀಡಲಿಲ್ಲ.

ಇದನ್ನು ವಿರೋಧಿಸಿದ ಬಾಲಕಿ, ಹಾಸ್ಟೆಲ್​ ಆಡಳಿತ ಮಂಡಳಿಯು ಸಂವಿಧಾನದ 14 ಮತ್ತು 19 ನೇ ವಿಧಿಗಳನ್ನು ಉಲ್ಲಂಘಿಸಿದೆ ಎಂದು ಹೈಕೋರ್ಟ್​ ಮೆಟ್ಟಿಲೇರಿದ್ದಳು. ಬಾಲಕಿ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಪಿ.ವಿ. ಆಶಾ ಮಹತ್ವದ ತೀರ್ಪು ಪ್ರಕಟಿಸಿದ್ದಾರೆ.