ಕೋವಿಡ್​ ರೋಗಿಗಳಿಗೆ ಆಹಾರ, ಔಷಧ ಪೂರೈಸಲು ರೋಬೋಟ್‌ಗಳ ಮರುವಿನ್ಯಾಸ

ಕೋವಿಡ್​ ರೋಗಿಗಳ ಚಿಕಿತ್ಸೆಯಲ್ಲಿ ತೊಡಗಿರುವ ವೈದ್ಯರು, ನರ್ಸ್​ಗಳು ಮತ್ತು ಇತರ ವೈದ್ಯಕೀಯ ಸಿಬ್ಬಂದಿಗೆ ಸಹಾಯವಾಗಲಿ ಎಂದು ಅಸ್ಸೋಂನ ಗುವಾಹಟಿಯ ರೆಸ್ಟೋರೆಂಟ್​ವೊಂದರ ಮಾಲೀಕರೊಬ್ಬರು ರೋಬೋಟ್‌ಗಳನ್ನು ಮರು ವಿನ್ಯಾಸಗೊಳಿಸಿದ್ದಾರೆ.

ಗುವಾಹಟಿ (ಅಸ್ಸೋಂ):ಕೊರೊನಾ ರೋಗಿಗಳಿಗೆ ಆಹಾರ ಮತ್ತು ಔಷಧಗಳನ್ನು ಪೂರೈಸಲು ಮತ್ತು ವೈದ್ಯರು ನಡೆಸುವ ವರ್ಚುವಲ್​ ಸಭೆಗಳಿಗೆ ಅನುಕೂಲವಾಗುವಂತೆ ಗುವಾಹಟಿಯ ರೆಸ್ಟೋರೆಂಟ್​ವೊಂದರ ಮಾಲೀಕರೊಬ್ಬರು ರೋಬೋಟ್‌ಗಳನ್ನು ಮರುವಿನ್ಯಾಸಗೊಳಿಸಿದ್ದಾರೆ.

ಗ್ರಾಹಕರಿಗೆ ಪಾನೀಯಗಳನ್ನು ಪೂರೈಸಲು ನಾವು ಒಂದೂವರೆ ವರ್ಷಗಳಿಂದ ರೋಬೋಟ್‌ಗಳನ್ನು ಬಳಸುತ್ತಿದ್ದೇವೆ. ಕೋವಿಡ್​ ರೋಗಿಗಳ ಚಿಕಿತ್ಸೆಯಲ್ಲಿ ತೊಡಗಿರುವ ವೈದ್ಯರು, ನರ್ಸ್​ಗಳು ಮತ್ತು ಇತರ ವೈದ್ಯಕೀಯ ಸಿಬ್ಬಂದಿ ಸೋಂಕಿಗೆ ಒಳಗಾಗುತ್ತಿದ್ದಾರೆ. ಅಲ್ಲದೇ ರೋಬೋಟ್‌ನಿಂದ ವೈರಸ್ ಹರಡುವ ಸಾಧ್ಯತೆ ತೀರಾ ಕಡಿಮೆ ಇರುತ್ತದೆ. ಹೀಗಾಗಿ ವೈದ್ಯಕೀಯ ಸಿಬ್ಬಂದಿಗೆ ಸಹಾಯ ಮಾಡಲು ಅವುಗಳನ್ನೀಗ ಮರುವಿನ್ಯಾಸಗೊಳಿಸಿದ್ದೇವೆ ಎಂದು ರೆಸ್ಟೋರೆಂಟ್ ಮಾಲೀಕ ಎಸ್.ಎನ್. ಫರೀದ್ ಹೇಳುತ್ತಾರೆ.

ರೋಬೋಟ್‌ಗಳ ಮರುವಿನ್ಯಾಸ

ಪ್ರಪಂಚದಾತ್ಯಂತ ಕೊರೊನಾ ಹರಡುತ್ತಿದ್ದಂತೆಯೇ ವೈದ್ಯಕೀಯ ಸಿಬ್ಬಂದಿಗೆ ಸಹಾಯ ಮಾಡಲು ಅಮೆರಿಕ, ಚೀನಾ, ಇಟಲಿ ಸೇರಿದಂತೆ ಕೆಲ ದೇಶಗಳ ಆಸ್ಪತ್ರೆಗಳಲ್ಲಿ ರೋಬೋಟ್‌ಗಳನ್ನು ನಿಯೋಜಿಸಲಾಗಿದೆ. ಕೇರಳದ ಕಣ್ಣೂರಿನ ಅಂಜರಕಂಡಿಯ ಜಿಲ್ಲಾ ಕೋವಿಡ್​ ಕೇಂದ್ರದಲ್ಲಿ, ರಾಜಸ್ಥಾನ ಮತ್ತು ತಮಿಳುನಾಡಿನ ಆಸ್ಪತ್ರೆಗಳ ಐಸೋಲೇಷನ್​​ ವಾರ್ಡ್​ಗಳಲ್ಲಿ ಕೊರೊನಾ ರೋಗಿಗಳಿಗೆ ಆಹಾರ, ಔಷಧ ತಲುಪಿಸಲು ರೋಬೋಟ್​ಗಳನ್ನು ಬಳಸಲಾಗುತ್ತಿದೆ.

ಅಸ್ಸೋಂನಲ್ಲಿ ಈವರೆಗೆ 5,006 ಕೊರೊನಾ ಪ್ರಕರಣಗಳು ಹಾಗೂ 9 ಸಾವುಗಳು ವರದಿಯಾಗಿವೆ.