ಕೋವಿಡ್-19 ಕಾಳ್ಗಿಚ್ಚಿನಂತೆ ಜಗತ್ತಿನಲ್ಲಿ ಹರಡುತ್ತಿರುವ ಈ ಸಮಯದಲ್ಲಿ ಕೋವಿಡ್ ಸೋಂಕು ಪತ್ತೆ ಪರೀಕ್ಷೆಗಳು ಪ್ರಾಮುಖ್ಯತೆ ಪಡೆದುಕೊಂಡಿವೆ. ಕೋವಿಡ್ ಸೋಂಕು ಪತ್ತೆಗಾಗಿ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಕುರಿತು ಆಗಾಗ ಒಂದಿಲ್ಲೊಂದು ಮಾಧ್ಯಮದಲ್ಲಿ ವರದಿಯಾಗುತ್ತಲೇ ಇದೆ. ಹಾಗಾದರೆ ಈ ಆ್ಯಂಟಿಬಾಡಿ ಟೆಸ್ಟ್ ಎಂದರೇನು, ಏತಕ್ಕಾಗಿ ಅದನ್ನು ಮಾಡುತ್ತಾರೆ ಅನ್ನೋದನ್ನು ತಿಳಿಯೋಣ.
ಏ.20 ರಿಂದ ದೇಶದ ಕೆಲ ರಾಜ್ಯಗಳಲ್ಲಿ ಕೋವಿಡ್ ಸೋಂಕು ಪತ್ತೆಗಾಗಿ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ಗಳನ್ನು ಆರಂಭಿಸಲಾಗುತ್ತಿದೆ.
ಸೆರಾಲಜಿ ಕಿಟ್ಗಳನ್ನೇ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟಿಂಗ್ ಕಿಟ್ ಎಂದು ಸಾಮಾನ್ಯವಾಗಿ ಕರೆಯಲಾಗುತ್ತದೆ. ರಕ್ತದ ಸೀರಮ್ಗಳ ವೈಜ್ಞಾನಿಕ ಅಧ್ಯಯನವೇ ಸೆರಾಲಜಿ. ಕೊರೊನಾ ಸೋಂಕು ತಗುಲಿದಾಗ ಆರಂಭದಲ್ಲಿ ವೈರಸ್ ಮೂಗಿನ ದ್ರಾವಣ ಹಾಗೂ ಫೆರಿಂಜಿಯಲ್ ದ್ರಾವಣದಲ್ಲಿ ಕಂಡುಬರುತ್ತದೆ. ಎಂಟು ದಿನಗಳ ನಂತರ ಗಂಟಲು ಹಾಗೂ ಮೂಗಿನಲ್ಲಿ ಸೋಂಕಿನ ಲಕ್ಷಣಗಳು ಹೆಚ್ಚಾಗಿ ಕಾಣಿಸಿಕೊಳ್ಳಲಾರಂಭಿಸುತ್ತವೆ.
ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಎಂದರೇನು?
ಯಾವುದಾದರೂ ವೈರಸ್ ಅಥವಾ ರೋಗಕಾರಕ ಜೀವಿ ದೇಹ ಹೊಕ್ಕಿದಾಗ ಅದರ ವಿರುದ್ಧ ಹೋರಾಡಲು ಶರೀರದಲ್ಲಿ ಪ್ರತಿಕಾಯಗಳು (ಆ್ಯಂಟಿಬಾಡಿ) ಹುಟ್ಟಿಕೊಳ್ಳುತ್ತವೆ. ಹೀಗೆ ರಕ್ತದಲ್ಲಿ ಇರುವ ಆ್ಯಂಟಿಬಾಡಿಗಳನ್ನು ಪತ್ತೆ ಮಾಡುವುದೇ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಆಗಿದೆ. ವ್ಯಕ್ತಿಯೊಬ್ಬನಿಗೆ ಕೊರೊನಾ ಸೋಂಕು ತಗುಲಿದೆಯಾ ಅಥವಾ ಇಲ್ಲ ಎಂಬುದನ್ನು ಮಾತ್ರ ಈ ಟೆಸ್ಟ್ನಿಂದ ಕಂಡುಹಿಡಿಯಬಹುದು.
ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಹೇಗೆ ಮಾಡಲಾಗುತ್ತದೆ?
ಶಂಕಿತ ವ್ಯಕ್ತಿಯ ರಕ್ತದ ಮಾದರಿಯನ್ನು ಪಡೆದು ಟೆಸ್ಟ್ ಮಾಡಲಾಗುತ್ತದೆ. ಸಾಮಾನ್ಯವಾಗಿ 20 ರಿಂದ 30 ನಿಮಿಷಗಳಲ್ಲಿ ಫಲಿತಾಂಶ ಸಿಗುತ್ತದೆ.
ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ನಲ್ಲಿ ಪತ್ತೆಯಾಗುವ ಅಂಶಗಳೇನು?
ವ್ಯಕ್ತಿಯ ರಕ್ತದಲ್ಲಿರಬಹುದಾದ ಕೊರೊನಾ ವೈರಸ್ ವಿರುದ್ಧ ಆ್ಯಂಟಿಬಾಡಿ ಹೋರಾಡುತ್ತಿದೆಯಾ ಎಂಬುದು ಫಲಿತಾಂಶದಿಂದ ತಿಳಿದುಬರುತ್ತದೆ.
ಟೆಸ್ಟ್ ವರದಿ ಪಾಸಿಟಿವ್ ಅಥವಾ ನೆಗೆಟಿವ್ ಬಂದಾಗ ಏನಾಗುತ್ತದೆ?
ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ನೆಗೆಟಿವ್:
ಟೆಸ್ಟ್ ವರದಿ ನೆಗೆಟಿವ್ ಬಂದಾಗ ಅವಶ್ಯಕತೆ ಕಂಡುಬಂದಲ್ಲಿ ಮೂಗಿನ ಅಥವಾ ಗಂಟಲಿನ ದ್ರವ ಮಾದರಿಯ ರೀಯಲ್ ಟೈಂ RT-PCR ಟೆಸ್ಟ್ ಮಾಡಲಾಗುತ್ತದೆ. ಇದೂ ನೆಗೆಟಿವ್ ಆದಲ್ಲಿ ಕೊರೊನಾ ಸೋಂಕು ನೆಗೆಟಿವ್ ಎಂದರ್ಥ.
RT-PCR ಪಾಸಿಟಿವ್ ಬಂದಲ್ಲಿ ಕೋವಿಡ್-19 ಸೋಂಕು ತಗುಲಿರುವುದು ಖಚಿತವಾದಂತೆ. ಈ ಹಂತದಲ್ಲಿ ರೋಗಿಯನ್ನು ನಿರ್ದಿಷ್ಟ ನಿಯಮಾನುಸಾರ ಐಸೊಲೇಷನ್ಗೊಳಪಡಿಸಿ, ಚಿಕಿತ್ಸೆ ಆರಂಭಿಸಲಾಗುತ್ತದೆ. ಜೊತೆಗೆ ವ್ಯಕ್ತಿಯ ಸಂಪರ್ಕಕ್ಕೆ ಬಂದವರ ಕುಡುಕಾಟ (ಕಾಂಟ್ಯಾಕ್ಟ್ ಟ್ರೇಸಿಂಗ್) ಆರಂಭಿಸಲಾಗುತ್ತದೆ.
ಅಥವಾ, ಒಂದು ವೇಳೆ RT-PCR ಟೆಸ್ಟ್ ಮಾಡದಿದ್ದರೆ ವ್ಯಕ್ತಿಗೆ ಹೋಂ ಕ್ವಾರಂಟೈನ್ ವಿಧಿಸಿ, ಹಿಂದಿನ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ನ 10 ದಿನಗಳ ನಂತರ ಮತ್ತೆ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಮಾಡಲಾಗುತ್ತದೆ. ಈ ಹಂತದಲ್ಲಿ ರ್ಯಾಪಿಡ್ ಆ್ಯಂಟಿಬಾಡಿ ನೆಗೆಟಿವ್ ಬಂದಲ್ಲಿ ಬಹುತೇಕ ಸೋಂಕು ಬಂದಿಲ್ಲ ಎಂದರ್ಥ. ಒಂದೊಮ್ಮೆ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಪಾಸಿಟಿವ್ ತೋರಿಸಿದಲ್ಲಿ ಇತ್ತೀಚೆಗೆ ಸೋಂಕು ತಗುಲಿರುವ ಸಾಧ್ಯತೆ ಇದ್ದು, ಮತ್ತೆ ಹತ್ತು ದಿನಗಳ ಕ್ವಾರಂಟೈನ್ ವಿಧಿಸಲಾಗುತ್ತದೆ.
ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಪಾಸಿಟಿವ್:
ವೈದ್ಯಕೀಯ ತಪಾಸಣೆಗಳ ನಂತರ ರೋಗಿಯನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಿಸಲಾಗುತ್ತದೆ ಅಥವಾ ನಿಯಮಾನುಸಾರ ಐಸೊಲೇಷನ್ನಲ್ಲಿಡಲಾಗುತ್ತದೆ. ಹಾಗೆಯೇ ಮಾರ್ಗಸೂಚಿಗಳ ಅನುಸಾರ ವ್ಯಕ್ತಿಯ ಸಂಪರ್ಕಕ್ಕೆ ಬಂದವರ ಹುಡುಕಾಟ ಆರಂಭಿಸಲಾಗುತ್ತದೆ.
ಫಲಿತಾಂಶ ಏನು ಹೇಳುತ್ತದೆ?
ಈ ಮುನ್ನ ವ್ಯಕ್ತಿಯು ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ಗೆ ಒಳಗಾಗಿಲ್ಲದಿರುವುದನ್ನು ಅಥವಾ ಸೋಂಕು ತಗುಲಿ ತಾನಾಗಿಯೇ ಗುಣಮುಖವಾಗಿದ್ದರೂ ಟೆಸ್ಟ್ನಲ್ಲಿ ತಿಳಿದು ಬರುತ್ತದೆ.
ದೇಶದ ಯಾವೆಲ್ಲ ಭಾಗಗಳಲ್ಲಿ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಮಾಡಲಾಗುತ್ತಿದೆ?
ಕೊರೊನಾ ಸೋಂಕಿನ ಹಾಟ್ಸ್ಪಾಟ್ ವಲಯಗಳಲ್ಲಿನ ಹಾಗೂ ಇವುಗಳ ಸಂಪರ್ಕಕ್ಕೆ ಬಂದಿರುವ ವ್ಯಕ್ತಿಗಳಿಗೆ ಮಾತ್ರ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಮಾಡಲಾಗುತ್ತದೆ ಎಂದು ಭಾರತೀಯ ವೈದ್ಯಕೀಯ ಮಂಡಳಿ ತಿಳಿಸಿದೆ.
ನನಗೂ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಮಾಡಿ ಎಂದು ಕೇಳಬಹುದೇ?
ಇಲ್ಲ. ಬೇಕಾದವರು ತಮಗೆ ಈ ಟೆಸ್ಟ್ ಮಾಡಿ ಎಂದು ಕೇಳುವಂತಿಲ್ಲ. ಈ ಪರೀಕ್ಷೆಯನ್ನು ಕೊರೊನಾ ತನಿಖೆಗೆ ಮಾಡದೇ ಕೇವಲ ಸೋಂಕಿನ ಹರಡುವಿಕೆಯ ಪ್ರಮಾಣವನ್ನು ನಿರ್ಧರಿಸಲು ಮಾತ್ರ ಕೈಗೊಳ್ಳಲಾಗುತ್ತಿದೆ.
ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಏಕೆ ಬೇಕು?
ಇಲ್ಲಿಯವರೆಗೆ RT-PCR ಟೆಸ್ಟ್ಗಳನ್ನು ಮಾಡಲಾಗುತ್ತಿತ್ತು. ಗಂಟಲು ಅಥವಾ ಮೂಗಿನ ದ್ರವ ಮಾದರಿ ಬಳಸುವ ಈ ಟೆಸ್ಟ್ಗಳು ತೀರಾ ದುಬಾರಿಯಾಗಿದ್ದು, ಅತಿ ಹೆಚ್ಚು ಸಮಯ ತೆಗೆದುಕೊಳ್ಳುತ್ತವೆ. ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ಗಳು ಅಗ್ಗವಾಗಿದ್ದು, ಬೇಗನೆ ಫಲಿತಾಂಶವೂ ಸಿಗುತ್ತದೆ.
