ಎಸ್​​ಪಿಬಿ ನಿಧನ: ಬಾಲು ಸರ್​​ಗೆ ಸಂತಾಪ ಸೂಚಿಸಿದ ಸೂಪರ್​ ಸ್ಟಾರ್​ ರಜನಿಕಾಂತ್​

ಗಾನ ಗಂಧರ್ವ ಎಸ್​ಪಿಬಿ ನಿಧನಕ್ಕೆ ಸೂಪರ್​ ಸ್ಟಾರ್​ ರಜನಿಕಾಂತ್​ ಕಂಬನಿ ಮಿಡಿದಿದ್ದು, ಸಂತಾಪ ಸೂಚಿಸಿ ವಿಡಿಯೋ ಟ್ವೀಟ್​ ಮಾಡಿದ್ದಾರೆ.

ಚೆನ್ನೈ:ಗಾನ ಸಾಮ್ರಾಟ, ಭಾರತೀಯ ಚಿತ್ರರಂಗದ ಮೇರು ಗಾಯಕ ಎಸ್​​.ಪಿ ಬಾಲಸುಬ್ರಹ್ಮಣಂ ನಿಧನಕ್ಕೆ ಇಡೀ ದೇಶವೇ ಕಂಬನಿ ಮಿಡಿಯುತ್ತಿದೆ. ದೇಶದ 16 ಭಾಷೆಗಳಲ್ಲಿ 40 ಸಾವಿರಕ್ಕೂ ಹೆಚ್ಚು ಹಾಡು ಹಾಡಿರುವ ಎಸ್​ಪಿಬಿ ನಿಧನಕ್ಕೆ ಸ್ಯಾಂಡಲ್​ವುಡ್​, ಬಾಲಿವುಡ್, ಕಾಲಿವುಡ್, ಟಾಲಿವುಡ್​ನ ಅನೇಕ ದಿಗ್ಗಜರು ಸಂತಾಪ ಸೂಚಿಸಿದ್ದಾರೆ.

ಎಸ್​​ಪಿಬಿ ನಿಧನಕ್ಕೆ ತಮಿಳುನಾಡಿನ ಸೂಪರ್​ ಸ್ಟಾರ್​ ರಜನಿಕಾಂತ್​ ಕೂಡ ಕಂಬನಿ ಮಿಡಿದಿದ್ದಾರೆ. RIP ಬಾಲು ಸರ್ ನೀವು ಅನೇಕ ವರ್ಷಗಳಿಂದ ನನ್ನ ಧ್ವನಿಯಾಗಿದ್ದೀರಿ.. ನಿಮ್ಮ ಧ್ವನಿ ಮತ್ತು ನೆನಪು ನನ್ನೊಂದಿಗೆ ಶಾಶ್ವತವಾಗಿ ಇರಲಿದೆ. ಖಂಡಿತವಾಗಿ ನಿಮ್ಮನ್ನು ಮಿಸ್​ ಮಾಡಿಕೊಳ್ಳಲಿದ್ದೇನೆ ಎಂದಿದ್ದಾರೆ.

ಇಂದು ಎಲ್ಲರಿಗೂ ತುಂಬಾ ದುಃಖದ ದಿನ. ಕೊನೆಯ ಕ್ಷಣದವರೆಗೆ ತಮ್ಮ ಪ್ರಾಣಕ್ಕಾಗಿ ಎಸ್​​ಪಿಬಿ ಹೋರಾಟ ನಡೆಸಿ, ಇಹಲೋಕ ತ್ಯಜಿಸಿದ್ದಾರೆ. ಅವರ ಅಗಲಿಕೆ ಅತ್ಯಂತ ನೋವಿನಿಂದ ಕೂಡಿದೆ. ಭಾರತದಲ್ಲಿ ಅನೇಕ ಪ್ರಸಿದ್ದ ವ್ಯಕ್ತಿಗಳಿದ್ದಾರೆ. ಆದರೆ, ಎಸ್​​ಪಿಬಿಯಂತೆ ಯಾರೂ ಇಲ್ಲ. ಎಲ್ಲ ಭಾಷೆಗಳಲ್ಲಿ ಹಾಡುವ ಮೂಲಕ ಅಭಿಮಾನಿಗಳನ್ನ ರಂಜಿಸಿದ್ದಾರೆ. ಅವರ ಮಧುರ, ಭವ್ಯವಾದ ಧ್ವನಿ ನೂರಾರು ವರ್ಷಗಳ ಕಾಲ ನಮ್ಮ ಕಿವಿಯಲ್ಲಿ ಮೊಳಗುತ್ತಲೇ ಇರುತ್ತದೆ. ದುಃಖಿತ ಕುಟುಂಬಕ್ಕೆ ನಾನು ಸಂತಾಪ ಸೂಚಿಸುತ್ತೇನೆ ಎಂದಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ರಜನಿಕಾಂತ್​ ವಿಡಿಯೋ ಹಂಚಿಕೊಂಡಿದ್ದು, ನೆಚ್ಚಿನ ಗಾಯಕನ ನಿಧನಕ್ಕೆ ಕಂಬನಿ ಮಿಡಿದಿದ್ದಾರೆ.