ಲಾಕ್​ಡೌನ್​ ನಡುವೆ ದಾಖಲೆ ಪ್ರಮಾಣದ ಗೋಧಿ ಸಂಗ್ರಹಿಸಿದ ಪಂಜಾಬ್​..!

20 ದಿನಗಳಲ್ಲಿ ಪಂಜಾಬ್​ 100 ಲಕ್ಷ ಮೆಟ್ರಿಕ್ ಟನ್ ಗೋಧಿ ಸಂಗ್ರಹಿಸಿದೆ ಎಂದು ಪಂಜಾಬ್ ಸಿಎಂ ಅಮರಿಂದರ್​ ಸಿಂಗ್​ ಟ್ವೀಟ್​ ಮಾಡಿದ್ದಾರೆ

ಚಂಡೀಗಡ್​: ಕೃಷಿ ರಾಜ್ಯ ಪಂಜಾಬ್ 20 ದಿನಗಳಲ್ಲಿ 100 ಲಕ್ಷ ಮೆಟ್ರಿಕ್ ಟನ್ ಗೋಧಿ ಸಂಗ್ರಹಿಸಿದೆ ಎಂದು ಮುಖ್ಯಮಂತ್ರಿ ಅಮರಿಂದರ್ ಸಿಂಗ್ ಬುಧವಾರ ಹೇಳಿದ್ದಾರೆ.

"ನಾವು 100 ಲಕ್ಷ ಮೆಟ್ರಿಕ್ ಟನ್ ಗೋಧಿ ಸಂಗ್ರಹವನ್ನು ಪೂರ್ಣಗೊಳಿಸಿದ್ದೇವೆ" ಅಲ್ಲದೇ ಮುಂದಿನ ದಿನಗಳಲ್ಲಿ ಹೆಚ್ಚುವರಿ 35 ಲಕ್ಷ ಮೆಟ್ರಿಕ್ ಟನ್ ಸಂಗ್ರಹಿಸುವ ನಿರೀಕ್ಷೆಯಿದೆ. ಇದನ್ನು ಸಾಧ್ಯವಾಗಿಸಿದ ರೈತರು ಹಾಗೂ ಎಲ್ಲಾ ಸರ್ಕಾರಿ ಇಲಾಖೆಗಳನ್ನು ನಾನು ಅಭಿನಂದಿಸುತ್ತೇನೆ" ಎಂದು ಟ್ವಿಟರ್​ನಲ್ಲಿ ಅವರು ಬರೆದುಕೊಂಡಿದ್ದಾರೆ.

ದೇಶಕ್ಕೆ ಶೇ 30-35 ರಷ್ಟು ಗೋಧಿ ಕೊಡುಗೆ ನೀಡುವ ಪಂಜಾಬ್, ಈ ಬಾರಿ ಸುಮಾರು 185 ಲಕ್ಷ ಟನ್ ಗೋಧಿ ಕೊಯ್ಲು ಮಾಡುವ ನಿರೀಕ್ಷೆಯಿದೆ ಮತ್ತು ಮಾರುಕಟ್ಟೆ ಆಗಮನವು ಸುಮಾರು 135 ಲಕ್ಷ ಟನ್ ಆಗುವ ಸಾಧ್ಯತೆ ಇದ್ದು, ಇದರ ಒಟ್ಟು ಮೊತ್ತ 26,000 ಕೋಟಿ ರೂ. ಆಗಿದೆ.

ಲಾಕ್​ಡೌನ್​ ನಡುವೆಯೂ ಗೋಧಿಯ ಕಣಜ ಎಂದು ಕರೆಯುವ ಪಂಜಾಬ್​ನಲ್ಲಿ ದಾಖಲೆ ಮಟ್ಟದಲ್ಲಿ ಗೋಧಿ ಸಂಗ್ರಹಿಸಲಾಗಿರುವುದು ಇಡೀ ದೇಶಕ್ಕೇ ಆಶಾದಾಯಕ ಸಂಗತಿಯಾಗಿದೆ.