ಫೋನ್​​ ಮೂಲಕ ತುಂಬು ಗರ್ಭಿಣಿಗೆ ತಲಾಖ್​ ಕೊಟ್ಟ ವ್ಯಕ್ತಿ... ಮಹಿಳೆಯಿಂದ ದೂರು

ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ವ್ಯಕ್ತಿಯೋರ್ವ ಗರ್ಭಿಣಿ ಪತ್ನಿಗೆ ಫೋನ್​ ಮೂಲಕ ತಲಾಖ್​ ನೀಡಿರುವ ಘಟನೆ ನಡೆದಿದೆ.

ನವದೆಹಲಿ: ವರದಕ್ಷಿಣೆ ವಿಚಾರವಾಗಿ ಗಂಡನೋರ್ವ ಕಟ್ಟಿಕೊಂಡ ಹೆಂಡತಿಗೆ ಫೋನ್​ ಮೂಲಕ ತಲಾಖ್​ ನೀಡಿರುವ ಘಟನೆ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ನಡೆದಿದೆ.

ಗರ್ಭಿಣಿಯಾಗಿರುವ ಈಕೆ ಇದೀಗ ಪೊಲೀಸ್​ ಠಾಣೆ ಮೆಟ್ಟಿಲೇರಿದ್ದು, ಹೊಟ್ಟೆಯಲ್ಲಿರುವ ಭ್ರೂಣ ತೆಗೆಸುವಂತೆ ಮೇಲಿಂದ ಮೇಲೆ ನನಗೆ ಅತ್ತೆ ಹಾಗೂ ಗಂಡ ಕಿರುಕುಳ ನೀಡುತ್ತಿರುವುದಾಗಿ ಆರೋಪ ಮಾಡಿದ್ದಾಳೆ. ಜತೆಗೆ ಭ್ರೂಣ ಕೊಲ್ಲಲು ಮಾತ್ರೆ ತೆಗೆದುಕೊಳ್ಳುವಂತೆ ಒತ್ತಾಯಿಸಿದ್ದು, ಅನೇಕ ಸಲ ನನ್ನ ಮೇಲೆ ಹಲ್ಲೆ ಮಾಡಿದ್ದಾರೆ ಎಂದು ದೂರಿದ್ದಾಳೆ.

ಇದರ ಜತೆಗೆ ಬೈಕ್​ ಕೊಡಿಸುವಂತೆ ನನ್ನ ಮೇಲೆ ಒತ್ತಡ ಹಾಕುತ್ತಿದ್ದು, ಇದೀಗ ನನಗೆ ತಲಾಖ್​ ನೀಡಿ ಇನ್ನೊಂದು ಮದುವೆ ಮಾಡಿಕೊಳ್ಳಲು ಯೋಜನೆ ರೂಪಿಸಿದ್ದಾನೆ ಎಂದಿದ್ದಾಳೆ.

ಕಳೆದ ಮೂರು ತಿಂಗಳ ಹಿಂದೆ ದೈಹಿಕವಾಗಿ ಕಿರುಕುಳ ನೀಡಿರುವ ವಿಚಾರಕ್ಕೆ ಸಂಬಂಧಿಸಿದಂತೆ ನಾನು ದೂರು ದಾಖಲು ಮಾಡಿದ್ದೇನೆ ಎಂದು ಮಹಿಳೆ ಹೇಳಿಕೊಂಡಿದ್ದಾಳೆ.