ಬ್ಯಾಟ್‌ನಿಂದ ಹಲ್ಲೆ ಮಾಡಿದ್ದಕ್ಕೆ ಬಿಜೆಪಿ ಎಂಎಲ್‌ಎ ಸಮರ್ಥನೆ.. ವಿಜಯವರ್ಗಿಯಾರಿಗೆ ಪಾಪಪ್ರಜ್ಞೆ ಇಲ್ವಂತೆ!

ಸರ್ಕಾರಿ ಅಧಿಕಾರಿಗೆ ಸಾರ್ವಜನಿಕವಾಗಿ ಬ್ಯಾಟ್​ನಿಂದ ಹೊಡೆದು ಜೈಲು ಸೇರಿದ್ದ ಬಿಜೆಪಿ ಶಾಸಕ ಆಕಾಶ್​ ವಿಜಯವರ್ಗಿಯಾಗೆ ನಿನ್ನೆ ಭೋಪಾಲ್​ ಕೋರ್ಟ್​ ಜಾಮೀನು ಮಂಜೂರು ಮಾಡಿದ್ದರಿಂದ ಅವರು ಇಂದು ಜೈಲಿನಿಂದ ಹೊರಬಂದರು. ಪಕ್ಷದ ಕಾರ್ಯಕರ್ತರು ಅವರಿಗೆ ಹೂವಿನ ಹಾರ ಹಾಕಿ ಸ್ವಾಗತ ಕೋರಿದರು.

ಇಂದೋರ್​​:ಸರ್ಕಾರಿ ಅಧಿಕಾರಿಗೆ ಸಾರ್ವಜನಿಕವಾಗಿ ಬ್ಯಾಟ್​ನಿಂದ ಹೊಡೆದು ಜೈಲು ಸೇರಿದ್ದ ಬಿಜೆಪಿ ಶಾಸಕ ಆಕಾಶ್​ ವಿಜಯವರ್ಗಿಯಾ ಇಂದು ಬಿಡುಗಡೆಯಾದರು. ಮತ್ತೊಮ್ಮೆ ಬ್ಯಾಟ್​ ಹಿಡಿಯುವಂತೆ ಸನ್ನಿವೇಶ ಬರದಿರಲಿ ಎಂದು ದೇವರಲ್ಲಿ ಪ್ರಾರ್ಥಿಸುವೆ ಎಂದೂ ಹೇಳಿದರು.

ನಿನ್ನೆ ಆಕಾಶ್​ಗೆ ಭೋಪಾಲ್​ ಕೋರ್ಟ್​ ಜಾಮೀನು ಮಂಜೂರು ಮಾಡಿದ್ದರಿಂದ ಅವರು ಇಂದು ಜೈಲಿನಿಂದ ಹೊರಬಂದರು. ಪಕ್ಷದ ಕಾರ್ಯಕರ್ತರು ಅವರಿಗೆ ಸ್ವಾಗತ ಕೋರಿದರು. ಆನಂತರ ತಮ್ಮ ಮನದಾಳ ಬಿಚ್ಚಿಟ್ಟ ಆಕಾಶ್​, ಸಾರ್ವಜನಿಕ ಹಿತಾಸಕ್ತಿಯಿಂದ ಈ ಕೆಲಸ ಮಾಡಿದ್ದರಿಂದ ನನಗೆ ಪಾಪಪ್ರಜ್ಞೆ ಇಲ್ಲ. ಜನರ ಹಿತಕ್ಕಾಗಿ ಕೆಲಸ ಮುಂದುವರೆಸುವೆ. ಮತ್ತೊಮ್ಮೆ ಬ್ಯಾಟ್​ ಹಿಡಿಯುವ ಅವಕಾಶ ಬಾರದಿರಲಿ ಎಂದು ದೇವರಲ್ಲಿ ಪ್ರಾರ್ಥಿಸುತ್ತೇನೆ ಎಂದರು ಹೇಳಿದ್ದಾರೆ.

ನಾನು ಸಾಕಷ್ಟು ಯೋಚಿಸಿ, ಜವಾಬ್ದಾರಿಯಿಂದಲೇ ಆ ಕೃತ್ಯ ಎಸಗಿದೆ. ಇಲ್ಲವಾಗಿದ್ದರೆ ಮಹಿಳೆಯ ಘನತೆಗೆ ಧಕ್ಕೆಯಾಗುತ್ತಿತ್ತು. ಬಿಜೆಪಿಯಲ್ಲಿ ನಾವು ಕಲಿತಿದ್ದು, ಮೊದಲು ಮನವಿ, ಆನಂತರ ದಾಳಿ ಎಂಬ ಪಾಠವನ್ನು ಎಂದು ಸಮರ್ಥಿಸಿಕೊಂಡಿದ್ದಾರೆ.

ಇಂದೋರ್​-3 ವಿಧಾನಸಭಾ ಕ್ಷೇತ್ರದ ಶಾಸಕ ಆಕಾಶ್​, ಬಿಜೆಪಿ ನಾಯಕ ಕೈಲಾಶ್​ ವಿಜಯ್​ವರ್ಗಿಯಾ ಅವರ ಪುತ್ರ. ಕಳೆದ ಬುಧವಾರ ಆಕಾಶ್, ಅಧಿಕಾರಿಯೊಬ್ಬರ ಮೇಲೆ ಬ್ಯಾಟ್​ನಿಂದ ಹಲ್ಲೆ ಮಾಡುತ್ತಿರುವ ವಿಡಿಯೋ ಸಖತ್​ ವೈರಲ್ ಆಗಿತ್ತು. ಈ ಪ್ರಕರಣದಲ್ಲಿ ಬಂಧಿತರಾಗಿ ವಿಜಯ್‌ವರ್ಗಿಯಾ ಜೈಲು ಸೇರಿದ್ದರು.