ಗಂಡನಿಲ್ಲದಿದ್ದರೂ ಗುರಿ ಸಾಧಿಸುವ ಹಂಬಲ.. ಅದೃಷ್ಟ ಪರೀಕ್ಷೆಗಿಳಿದ ರೈತನ ಮಡದಿ

ಲೋಕಸಭೆ ಚುನಾವಣೆಗಾಗಿ ಈಗಾಗಲೇ ಎಲ್ಲ ಕ್ಷೇತ್ರಗಳಿಂದ ಅಭ್ಯರ್ಥಿಗಳ ಹೆಸರು ಘೋಷಣೆಯಾಗುತ್ತಿವೆ. ಇದರ ಮಧ್ಯೆ ಮಹಾರಾಷ್ಟ್ರದಲ್ಲಿ ಮೃತ ರೈತನ ಪತ್ನಿಯೊಬ್ಬರು ಸ್ಪರ್ಧೆ ಮಾಡುತ್ತಿದ್ದು,ಕುತೂಹಲ ಹೆಚ್ಚಿಸಿದ್ದಾರೆ.

ಯಾವತ್ನಾಲ್​(ಮಹಾರಾಷ್ಟ್ರ): ಮುಂಬರುವ ಲೋಕಸಭಾ ಚುನಾವಣೆ ಅಖಾಡ ಈಗಾಗಲೇ ಸಜ್ಜಾಗಿದೆ. ವಿವಿಧ ಕ್ಷೇತ್ರಗಳಿಂದ ಸ್ಪರ್ಧೆ ಮಾಡಲು ಅಭ್ಯರ್ಥಿಗಳು ತಮ್ಮ ತಮ್ಮ ಪಕ್ಷದಿಂದ ಟಿಕೆಟ್​ ಪಡೆದುಕೊಳ್ಳಲು ಹರಸಾಹಸ ಪಡುತ್ತಿದ್ದಾರೆ. ಇದರ ಮಧ್ಯೆ ಮೃತ ರೈತನ ಪತ್ನಿಗೆ ಪಕ್ಷವೊಂದು ಟಿಕೆಟ್​ ನೀಡಿದೆ.

ಮಹಾರಾಷ್ಟ್ರದ ಯಾವತ್ನಾಲ್​-ವಾಸೀಂ ಲೋಕಸಭೆ ಕ್ಷೇತ್ರದಿಂದ ಕಣಕ್ಕಿಳಿಯಲು ಆತ್ಮಹತ್ಯೆ ಮಾಡಿಕೊಂಡಿದ್ದ ಮೃತಸುಧಾಕರ್​ ಯಡ್ಡಿ ಎಂಬ ರೈತನ ಪತ್ನಿವೈಶಾಲಿ ಸುಧಾಕರ್​ ಯಡ್ಡಿ ನಿರ್ಧರಿಸಿದ್ದಾರೆ. ಶಾಸಕ ಬಚ್ಚು ಕಾಡು ನೇತೃತ್ವದ ಪ್ರಾಹರ್​ ಪಾರ್ಟಿ ಕೆಲ ತಿಂಗಳ ಹಿಂದೆಅಸ್ತಿತ್ವಕ್ಕೆ ಬಂದಿತ್ತು. ಅದೇ ಪಕ್ಷದಿಂದಲೇ ವೈಶಾಲಿ ಟಿಕೆಟ್ ಪಡೆದು ಅದೃಷ್ಟ ಪರೀಕ್ಷೆಗಿಳಿದಿದ್ದಾರೆ.

2011ರಲ್ಲಿ ವೈಶಾಲಿ ಗಂಡ ಸಾಲದ ಸುಳಿಗೆ ಸಿಲುಕಿ ಆತ್ಮಹತ್ಯೆಗೆ ಶರಣಾಗಿದ್ದರು. ಇದಾದ ಬಳಿಕ ಪತ್ನಿ ವೈಶಾಲಿ ಅನೇಕ ಸಂಘಟನೆಗಳೊಂದಿಗೆ ಕೈಜೋಡಿಸಿ, ರೈತರ ಅಭಿವೃದ್ಧಿಗಾಗಿ ಶ್ರಮಿಸುತ್ತಿದ್ದಾರೆ. ಈ ಸಲದ ಚುನಾವಣೆಯಲ್ಲಿ ರೈತರ ಸಮಸ್ಯೆಗಳನ್ನ ಮುಂದಿಟ್ಟುಕೊಂಡು ಎಲೆಕ್ಷನ್​ ಎದುರಿಸುವುದಾಗಿ ವೈಶಾಲಿ ಹೇಳಿದ್ದಾರೆ.

ಈಗಾಗಲೇ ಈ ಕ್ಷೇತ್ರದಲ್ಲಿ ಐದು ಸಾವಿರ ಕಾರ್ಯಕರ್ತರು ಕ್ಯಾಂಪೇನ್​ ಆರಂಭ ಮಾಡಿದ್ದು, ಮಾರ್ಚ್​ 23ರಂದು ವೈಶಾಲಿ ನಾಮಪತ್ರ ಸಲ್ಲಿಕೆ ಮಾಡಲಿದ್ದಾರೆ. ಮಹಾರಾಷ್ಟ್ರದಲ್ಲಿ ಏಪ್ರಿಲ್​ 10,17 ಹಾಗೂ 24ರಂದು ಚುನಾವಣೆ ನಡೆಯಲಿದ್ದು, ಮೇ 23ರಂದು ಫಲಿತಾಂಶ ಹೊರಬೀಳಲಿದೆ.