ಡ್ರೋನ್ ಕಂಡು ದಿಕ್ಕಾಪಾಲಾಗಿ ಓಡಿದ ಜೂಜುಕೋರರು !

ಲಾಕ್​ಡೌನ್​ ಸಮಯದಲ್ಲಿ ಅಪರಾಧ ಚಟುವಟಿಕೆಗಳ ನಿಯಂತ್ರಣಕ್ಕೆ ಡ್ರೋನ್​ ಕ್ಯಾಮೆರಾಗಳು ಪೊಲೀಸರಿಗೆ ಬಹಳ ಅನುಕೂಲಕರವಾಗುತ್ತಿವೆ. ಉತ್ತರ ಪ್ರದೇಶದ ಗಾಜಿಯಾಬಾದ್ ಬಳಿ ಮನೆ ಮೇಲೆ ಜೂಜಾಡುತ್ತಿದ್ದವರು ಡ್ರೋನ್ ಕ್ಯಾಮೆರಾದಿಂದಾಗಿ ಸಿಕ್ಕಿ ಬಿದ್ದಿದ್ದಾರೆ.

ಗಾಜಿಯಾಬಾದ್ (ಉತ್ತರ ಪ್ರದೇಶ): ಲಾಕ್​ಡೌನ್​ ಅನ್ನು ಕಟ್ಟುನಿಟ್ಟಾಗಿ ಜಾರಿಯಲ್ಲಿರಿಸಲು ಉತ್ತರ ಪ್ರದೇಶ ಪೊಲೀಸರು ಡ್ರೋನ್ ಕ್ಯಾಮೆರಾ ಮೊರೆ ಹೋಗಿದ್ದು, ಮನೆ ಮಾಳಿಗೆ ಮೇಲೆ ಗುಂಪಾಗಿ ಜೂಜಾಡುತ್ತಿದ್ದವರು ಪೊಲೀಸರ ಡ್ರೋನ್ ಕ್ಯಾಮೆರಾಗೆ ಸಿಕ್ಕಿಬಿದ್ದಿದ್ದಾರೆ.

ಗಾಜಿಯಾಬಾದ್​ನ ಖೋಡಾ ಪ್ರದೇಶದ ಮನೆಯೊಂದರ ಮಾಳಿಗೆ ಮೇಲೆ ಜೂಜುಕೋರರ ಗುಂಪೊಂದು ಜೂಜಾಟದಲ್ಲಿ ಮೈಮರೆತಿತ್ತು. ಆದರೆ ಆಕಾಶ ಮಾರ್ಗದಲ್ಲಿ ಬಂದ ಡ್ರೋನ್ ಇವರ ಕರಾಮತ್ತನ್ನು ಕ್ಷಣಾರ್ಧದಲ್ಲಿ ಬಹಿರಂಗಪಡಿಸಿತು. ಡ್ರೋನ್​ ನೋಡುತ್ತಲೇ ದಿಕ್ಕಾಪಾಲಾಗಿ ಕೆಲವರು ಓಡಿ ಹೋದರಾದರೂ, ತಕ್ಷಣ ಕಾರ್ಯಪ್ರವೃತ್ತರಾದ ಪೊಲೀಸರು ಮಾಳಿಗೆ ಮೇಲಿದ್ದ 8 ಜನ ಜೂಜುಕೋರರನ್ನು ಬಂಧಿಸಿ ಜೈಲಿಗಟ್ಟಿದ್ದಾರೆ.

ಲಾಕ್​ಡೌನ್​ ಇದ್ದಾಗಲೂ ಪೊಲೀಸರ ಕಣ್ಣಿಗೆ ಮಣ್ಣೆರಚಿ ಅಕ್ರಮ ಚಟುವಟಿಕೆಗಳಲ್ಲಿ ನಿರತರಾಗುವವರು ಇದರಿಂದ ಪಾಠ ಕಲಿಯುವುದು ಒಳಿತು. ಡ್ರೋನ್​ನ ಹದ್ದಿನ ಕಣ್ಣಿಂದ ತಪ್ಪಿಸಿಕೊಳ್ಳಲು ಸಾಧ್ಯವೇ ಇಲ್ಲ ಎಂಬುದು ಸಾಬೀತಾಗುತ್ತಿದೆ.

ಇತ್ತೀಚಿನ ದಿನಗಳಲ್ಲಿ ಕಾನೂನು ಉಲ್ಲಂಘನೆ ಪ್ರಕರಣಗಳನ್ನು ಪತ್ತೆ ಮಾಡುವಲ್ಲಿ ಡ್ರೋನ್​ ಕ್ಯಾಮೆರಾ ಪೊಲೀಸರಿಗೆ ವರದಾನವಾಗಿ ಪರಿಣಮಿಸಿವೆ. ಗಾಜಿಯಾಬಾದ್​ನ ಶಹೀದ್​ ನಗರದಲ್ಲಿ ತಲೆಮರೆಸಿಕೊಂಡಿದ್ದ 10 ಜನ ಇಂಡೊನೇಶಿಯಾ ನಾಗರಿಕರನ್ನು ಡ್ರೋನ್​ ಸಹಾಯದಿಂದಲೇ ಬಂಧಿಸಲಾಗಿತ್ತು.