ನವದೆಹಲಿ:1919 ರಲ್ಲಿ ಪಂಜಾಬ್ ಅಮೃತಸರದಲ್ಲಿ ನಡೆದ ಅತ್ಯಂತ ಘೋರ ಎನ್ನಲಾದ ಜಲಿಯನ್ ವಾಲಾಬಾಗ್ ಹತ್ಯಾಕಾಂಡದ ಹುತಾತ್ಮರಿಗೆ ಪ್ರಧಾನಿ ನರೇಂದ್ರ ಮೋದಿ ಗೌರವ ನಮನ ಸಲ್ಲಿಸಿದ್ದು, ಅವರ ಶೌರ್ಯವು ಭಾರತೀಯರಿಗೆ ಸ್ಫೂರ್ತಿ ಎಂದು ಕೊಂಡಾಡಿದ್ದಾರೆ.
ಈ ಬಗ್ಗೆ ಟ್ವೀಟ್ ಮಾಡಿರುವ ಪ್ರಧಾನಿ, "ಜಲಿಯನ್ ವಾಲಾಬಾಗ್ ದುರಂತದಲ್ಲಿ ನಿರ್ದಯವಾಗಿ ಕೊಲ್ಲಲ್ಪಟ್ಟ ಹುತಾತ್ಮರಿಗೆ ನಾನು ನಮಸ್ಕರಿಸುತ್ತೇನೆ. ಅವರ ಧೈರ್ಯ, ತ್ಯಾಗವನ್ನು ನಾವೆಂದಿಗೂ ಮರೆಯುವುದಿಲ್ಲ" ಎಂದಿದ್ದಾರೆ.
ನಿರ್ದಯಿ ಹತ್ಯಾಕಾಂಡದ ಆ ದಿನ:
1919 ಏಪ್ರಿಲ್ 13 ರಂದು ಸುಗ್ಗಿಯ ಬೈಸಾಖಿ ಹಬ್ಬಾಚರಿಸಲು ಸಾವಿರಾರು ಭಾರತೀಯರು ಪಂಜಾಬ್ನ ಅಮೃತಸರದ ಜಲಿಯನ್ ವಾಲಾಬಾಗ್ ಪಾರ್ಕ್ನಲ್ಲಿ ಸೇರಿದ್ದರು. ಈ ವೇಳೆ ಬ್ರಿಟೀಷ್ ಜನರಲ್ ಡಯರ್, ನೆರೆದಿದ್ದ ಜನರ ಮೇಲೆ ತನ್ನ ಬಂದೂಕಿನಿಂದ ಗುಂಡಿನ ಮಳೆಗರೆದನು. ಈ ಘಟನೆಯಲ್ಲಿ ಸುಮಾರು 400ಕ್ಕೂ ಹೆಚ್ಚು ಭಾರತೀಯರು ಹುತಾತ್ಮರಾದರು. ಸಾವಿರಾರು ಮಂದಿ ಗಾಯಗೊಂಡರು. ಇದು ಭಾರತದ ಇತಿಹಾಸದಲ್ಲಿ ನಡೆದ ಅತ್ಯಂತ ನಿರ್ದಯಿ ಹತ್ಯಾಕಾಂಡ.