ಪಶ್ಚಿಮ ಬಂಗಾಳದಲ್ಲಿ ಮೋದಿ: ಪ್ರತಿಮೆ ಅನಾವರಣ, ಹೌರಾ ಬ್ರಿಡ್ಜ್ ಬಳಿ ಧ್ವನಿ-ಬೆಳಕಿನ ಕಾರ್ಯಕ್ರಮ

ಕೋಲ್ಕತ್ತಾ ಬಂದರಿನ 150ನೇ ವಾರ್ಷಿಕೋತ್ಸವ ಪ್ರಯುಕ್ತ ಐತಿಹಾಸಿಕ ರವೀಂದ್ರ ಸೇತು (ಹೌರಾ ಬ್ರಿಡ್ಜ್) ಬಳಿ ಆಕರ್ಷಕ ಧ್ವನಿ ಬೆಳಕಿನ ಕಾರ್ಯಕ್ರಮಕ್ಕೆ ಪ್ರಧಾನಿ ಮೋದಿ ಚಾಲನೆ ನೀಡಿದರು.

ಕೋಲ್ಕತ್ತಾ:ಎರಡು ದಿನಗಳ ಕಾಲ ಪಶ್ಚಿಮ ಬಂಗಾಳ ಪ್ರವಾಸ ಕೈಗೊಂಡಿರುವ ಪ್ರಧಾನಿ ನರೇಂದ್ರ ಮೋದಿ, ಕೋಲ್ಕತ್ತಾದಲ್ಲಿನ ಓಲ್ಡ್​ ಕರೆನ್ಸಿ ಕಟ್ಟಡದಲ್ಲಿರುವ ಪ್ರತಿಮೆಯನ್ನು ಹಾಗೂ ಹೌರಾ ಬ್ರಿಡ್ಜ್​​ನ ಡೈನಾಮಿಕ್ ಆರ್ಕಿಟೆಕ್ಚರಲ್ ಇಲ್ಯೂಮಿನೇಷನ್ ಅನಾವರಣಗೊಳಿಸಿದ್ದಾರೆ.

ಕೋಲ್ಕತ್ತಾ ಬಂದರಿನ 150ನೇ ವಾರ್ಷಿಕೋತ್ಸವ ಪ್ರಯುಕ್ತ ಐತಿಹಾಸಿಕ ರವೀಂದ್ರ ಸೇತು (ಹೌರಾ ಬ್ರಿಡ್ಜ್) ಬಳಿ ಆಕರ್ಷಕ ಧ್ವನಿ,ಬೆಳಕಿನ ಕಾರ್ಯಕ್ರಮಕ್ಕೆ ಪ್ರಧಾನಿ ಮೋದಿ ಚಾಲನೆ ನೀಡಿದರು. ಬಳಿಕ ಬ್ರಿಡ್ಜ್ ಸಮೀಪವಿರುವ ಮಿಲೇನಿಯಮ್ ಪಾರ್ಕ್​ನಲ್ಲಿ ನಡೆದ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ವೀಕ್ಷಿಸಿದರು. ಕಾರ್ಯಕ್ರಮದಲ್ಲಿ ಪಶ್ಚಿಮ ಬಂಗಾಳ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಹಾಗೂ ರಾಜ್ಯಪಾಲ ಜಗದೀಪ್ ಧಂಕರ್ ಉಪಸ್ಥಿತರಿದ್ದರು.

ಓಲ್ಡ್​ ಕರೆನ್ಸಿ ಕಟ್ಟಡದಲ್ಲಿರುವ ಪ್ರತಿಮೆ ಅನಾವರಣದ ಬಳಿಕ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಮಾತನಾಡಿದ ಮೋದಿ, ಕೋಲ್ಕತ್ತಾದ ಇಂಡಿಯನ್ ಮ್ಯೂಸಿಯಂ ಸೇರಿದಂತೆ ದೇಶದ ಐದು ಅಪ್ರತಿಮ ವಸ್ತುಸಂಗ್ರಹಾಲಯಗಳನ್ನು ಅಂತರಾಷ್ಟ್ರೀಯ ಮಟ್ಟದಲ್ಲಿ ಗುರುತಿಸುವಂತೆ ಮಾಡಲಾಗುವುದು ಎಂದು ಭರವಸೆ ನೀಡಿದರು.

ಇನ್ನು ನಾಳೆ ರಾಮಕೃಷ್ಣ ಮಿಷನ್​ಗೆ ಭೇಟಿ ನೀಡಲಿರುವ ಅವರು ಕೋಲ್ಕತ್ತಾ ಬಂದರಿನ 150ನೇ ವಾರ್ಷಿಕೋತ್ಸವ ಕಾರ್ಯಕ್ರಮದಲ್ಲಿ ಭಾಗಿಯಾಗಲಿದ್ದಾರೆ.