ಜುನಾಗಢ (ಗುಜರಾತ್):ಅಕ್ಟೋಬರ್ 24ರಂದು ಗುಜರಾತ್ನ ಜುನಾಗಢದ ಗಿರ್ನಾರ್ನಲ್ಲಿ ನಿರ್ಮಾಣವಾಗಿರುವ ಏಷಿಯಾದ ಅತಿ ದೊಡ್ಡ ರೋಪ್ವೇ ಅನ್ನು ವಿಡಿಯೋ ಕಾನ್ಫರೆನ್ಸ್ ಮೂಲಕ ಪ್ರಧಾನಿ ನರೇಂದ್ರ ಮೋದಿ ಉದ್ಘಾಟನೆ ಮಾಡಲಿದ್ದಾರೆ.
ರೋಪ್ವೇ ಉದ್ಘಾಟನೆ ವೇಳೆ ಗುಜರಾತ್ ಸಿಎಂ ವಿಜಯ್ ರೂಪಾಣಿ ಜುನಾಗಢದಿಂದ ಹಾಗೂ ಉಪ ಮುಖ್ಯಮಂತ್ರಿ ನಿತಿನ್ ಪಟೇಲ್ ಅಹಮದಾಬಾದ್ನಿಂದ ಭಾಗಿಯಾಗಲಿದ್ದಾರೆ ಎಂದು ತಿಳಿದುಬಂದಿದೆ.
ಮೋದಿ ಕನಸಿನ ಯೋಜನೆ ಇದಾಗಿದ್ದು, ಅವರು ಗುಜರಾತ್ ಸಿಎಂ ಆಗಿದ್ದಾಗ ಈ ಯೋಜನೆಯ ಶಂಕುಸ್ಥಾಪನೆ ನಡೆಸಿದ್ದರು. ಅಧಿಕೃತ ಮೂಲಗಳ ಪ್ರಕಾರ ಈ ರೋಪ್ ವೇ 2.3 ಕಿಲೋಮೀಟರ್ ಉದ್ದವಿದ್ದು, ಸುಮಾರು 130 ಕೋಟಿ ರೂಪಾಯಿಗಳನ್ನು ವ್ಯಯಿಸಲಾಗಿದೆ.
ಈ ರೋಪ್ವೇ ಮೂಲಕ ಒಂದು ಗಂಟೆಗೆ 800 ಮಂದಿ ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ತಲುಪಬಹುದಾಗಿದೆ. ಕೇವಲ 8 ನಿಮಿಷಗಳಲ್ಲಿ 2.13 ಕಿಲೋಮೀಟರ್ ರೋಪ್ವೇ ಮೂಲಕ ಪ್ರಯಾಣಿಸಬಹುದಾಗಿದೆ.
ರೋಪ್ವೇ ಮೂಲಕ ಭವನಾಥ್ ದೇವಾಲಯದಿಂದ ಅಂಬಾಜಿ ದೇವಾಲಯಕ್ಕೆ ಕೇವಲ 10 ನಿಮಿಷಗಳಲ್ಲಿ ತಲುಪಬಹುದಾಗಿದೆ. ಒಬ್ಬರಿಗೆ 700 ರೂಪಾಯಿ ಟಿಕೆಟ್ ಅನ್ನು ನಿಗದಿಪಡಿಸುವ ಸಾಧ್ಯತೆ ಇದ್ದು, ಇನ್ನೂ ಅಧಿಕೃತವಾಗಿ ನಿರ್ಧಾರ ತೆಗೆದುಕೊಂಡಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಯೋಜನೆ ಮೇ ತಿಂಗಳಲ್ಲಿ ಆರಂಭವಾಗಬೇಕಿತ್ತು. ಆದರೆ ಕೊರೊನಾ ಕಾರಣದಿಂದ ಇದನ್ನು ಮುಂದೂಡಲಾಗಿತ್ತು. ಸೆಪ್ಟೆಂಬರ್ನಲ್ಲಿ ಪ್ರಾಯೋಗಿಕವಾಗಿ ಓಡಾಟ ಆರಂಭಿಸಲಾಗಿತ್ತು. ಈಗ ಉದ್ಘಾಟನೆಗೆ ದಿನಾಂಕ ನಿಗದಿಯಾಗಿದೆ.
