ಹಿಂದುತ್ವ ಪ್ರತಿಪಾದಕ ಬಾಳಾ ಸಾಹೇಬ್​ ಠಾಕ್ರೆ ಜನ್ಮದಿನ: ಪಿಎಂ ಮೋದಿ ನಮನ

ಬಾಳಾ ಸಾಹೇಬ್​ ಠಾಕ್ರೆ ಅವರ 95ನೇ ಜನ್ಮದಿನದ ಅಂಗವಾಗಿ ಪ್ರಧಾನಿ ನರೇಂದ್ರ ಮೋದಿ ಟ್ವೀಟ್​ ಮಾಡಿ ನಮಿಸಿದ್ದಾರೆ.

ನವದೆಹಲಿ: ಶಿವಸೇನಾ ಸಂಸ್ಥಾಪಕ, ಹಿಂದುತ್ವ ಪ್ರತಿಪಾದಕ ದಿ. ಬಾಳಾ ಸಾಹೇಬ್​ ಠಾಕ್ರೆ ಅವರ 95ನೇ ಜನ್ಮದಿನದ ಅಂಗವಾಗಿ ಪ್ರಧಾನಿ ನರೇಂದ್ರ ಮೋದಿ ಗೌರವ ಸಲ್ಲಿಸಿದ್ದಾರೆ.

"ಶ್ರೀ ಬಾಳಾ ಸಾಹೇಬ್​ ಠಾಕ್ರೆ ಅವರಿಗೆ ನಮನಗಳು. ಠಾಕ್ರೆ ಅವರು ಅಚಲರಾಗಿ ತಮ್ಮ ಆದರ್ಶಗಳನ್ನು ಎತ್ತಿಹಿಡಿದಿದ್ದರು. ಜನರ ಕಲ್ಯಾಣಕ್ಕಾಗಿ ದಣಿವಿಲ್ಲದೆ ಸೇವೆ ಸಲ್ಲಿಸಿದ್ದರು" ಎಂದು ಪಿಎಂ ಮೋದಿ ಟ್ವೀಟ್​ ಮಾಡಿದ್ದಾರೆ.

1926ರ ಜನವರಿ 23 ರಂದು ಜನಿಸಿದ ಠಾಕ್ರೆ, 'ಫ್ರೀ ಪ್ರೆಸ್​ ಜರ್ನಲ್​'ನಲ್ಲಿ ಕಾರ್ಟೂನಿಸ್ಟ್ ಆಗಿ ತಮ್ಮ ವೃತ್ತಿ ಜೀವನ ಪ್ರಾರಂಭಿಸಿದ್ದರು. ಶಿವಸೇನೆ ಪಕ್ಷ ಸ್ಥಾಪಿಸಲೆಂದೇ 1960ರಲ್ಲಿ ತಮ್ಮ ಉದ್ಯೋಗ ತೊರೆದು, 1966ರ ಜೂನ್​ 19ರಂದು ಶಿವಸೇನೆ ಸ್ಥಾಪಿಸಿದರು. ಮರಾಠ ಜನತೆ ಹಾಗೂ ಮಹಾರಾಷ್ಟ್ರದ ಕಲ್ಯಾಣಕ್ಕಾಗಿ ಹೋರಾಡಿದರು.

2012ರ ನವೆಂಬರ್​ 17ರಂದು ತಮ್ಮ 86ನೇ ವಯಸ್ಸಿನಲ್ಲಿ ಹೃದಯಾಘಾತದಿಂದ ಕೊನೆಯುಸಿರೆಳೆದರು.