ವೈದ್ಯ- ಚಾರ್ಟರ್ಡ್ ಅಕೌಂಟೆಂಟ್ಸ್ ದಿನಕ್ಕೆ ಶುಭಕೋರಿದ ಪ್ರಧಾನಿ ಮೋದಿ

ಇಂದು ವೈದ್ಯ ಮತ್ತು ಚಾರ್ಟರ್ಡ್ ಅಕೌಂಟೆಂಟ್ಸ್ ದಿನದ ಹಿನ್ನೆಲೆ ಎರಡೂ ಕ್ಷೇತ್ರದವರಿಗೂ ಟ್ವೀಟ್​ ಮೂಲಕ ಪ್ರಧಾನಿ ನರೇಂದ್ರ ಮೋದಿ ಶುಭಾಶಯ ತಿಳಿಸಿದ್ದಾರೆ.

ನವದೆಹಲಿ :ಕೋವಿಡ್ ವಿರುದ್ಧದ ಹೋರಾಟದಲ್ಲಿ ವೈದ್ಯರ ಪಾತ್ರವನ್ನು ಪ್ರಧಾನಿ ನರೇಂದ್ರ ಮೋದಿ ಶ್ಲಾಘಿಸಿದ್ದಾರೆ.

ಭಾರತವು ನಮ್ಮ ವೈದ್ಯರಿಗೆ ನಮಿಸುತ್ತದೆ. ವೈದ್ಯರು ಕೋವಿಡ್​ ವಿರುದ್ಧದ ಉತ್ಸಾಹಭರಿತ ಹೋರಾಟದಲ್ಲಿ ಮುಂಚೂಣಿಯಲ್ಲಿರುವ ಅಸಾಧಾರಣ ವ್ಯಕ್ತಿಗಳು ಎಂದು ವೈದ್ಯರ ದಿನಾಚರಣೆಗೆ ಶುಭಕೋರಿ ಪ್ರಧಾನಿ ಮೋದಿ ಟ್ವೀಟ್​ ಮಾಡಿದ್ದಾರೆ. ಅಲ್ಲದೇ, ತಾಯಿಯು ಜನ್ಮ ನೀಡುತ್ತಾಳೆ, ವೈದ್ಯರು ನಮಗೆ ಪುನರ್ಜನ್ಮ ನೀಡುತ್ತಾರೆ ಎಂದು ಹೇಳುವ ಭಾಷಣದ ತುಣುಕೊಂದನ್ನು ಹಂಚಿಕೊಂಡಿದ್ದಾರೆ.

ಡಾ.ಬಿ.ಸಿ ರಾಯ್ ಅವರ ಜನ್ಮ ದಿನವನ್ನ ವೈದ್ಯರ ದಿನ ಎಂದು ಆಚರಿಸಲಾಗುತ್ತದೆ. ಅಲ್ಲದೇ ಜುಲೈ-1 ಅನ್ನು ಚಾರ್ಟರ್ಡ್​ ​ ಅಕೌಂಟೆಂಟ್ಸ್ ಡೇ ಎಂದು ಸಹ ಆಚರಿಸಲಾಗುತ್ತದೆ.

ಆರೋಗ್ಯಕರ ಮತ್ತು ಪಾರದರ್ಶಕ ಆರ್ಥಿಕತೆ ಖಾತರಿಪಡಿಸುವಲ್ಲಿ ನಮ್ಮ ಶ್ರಮಶೀಲ ಸಿಎ ಸಮುದಾಯದ ಪ್ರಮುಖ ಪಾತ್ರವಿದೆ. ರಾಷ್ಟ್ರಕ್ಕೆ ಅವರ ಸೇವೆಗಳು ಬಹಳ ಮೌಲ್ಯಯುತವಾಗಿವೆ. ಚಾರ್ಟರ್ಡ್ ಅಕೌಂಟೆಂಟ್ಸ್ ದಿನದ ಶುಭಾಶಯಗಳು ಎಂದು ಪ್ರಧಾನಿ ಹೇಳಿದ್ದಾರೆ.