ನಿಮ್ಮ ಕಾರಿಗೆ ಇನ್ಮುಂದೆ ಸೂಪರ್‌ ಮಾರುಕಟ್ಟೆಗಳಲ್ಲಿ ಪೆಟ್ರೋಲ್,ಡೀಸೆಲ್ ತುಂಬಬಹುದು!

ಇಲ್ಲಿಯತನಕ ಪೆಟ್ರೋಲ್ ಮತ್ತು ಡೀಸೆಲ್ ತೈಲಗಳು ಪ್ರತ್ಯೇಕ ಬಂಕ್ ಗಳಲ್ಲಿ ಮಾತ್ರ ಸಿಗುತ್ತಿತ್ತು. ಆದ್ರೆ, ಇನ್ನು ಮುಂದೆ ನೀವು ಪೆಟ್ರೋಲ್ ಬಂಕುಗಳಿಗೇ ಹೋಗಬೇಕೆಂದೇನಿಲ್ಲ. ಸೂಪರ್ ಮಾರುಕಟ್ಟೆಗಳಲ್ಲಿ ಇಂಧನ ತೈಲಗಳನ್ನು ಮಾರಾಟ ಮಾಡುವ ಬಗ್ಗೆ ಸರ್ಕಾರ ಚಿಂತನೆ ನಡೆಸುತ್ತಿದೆ.

ನವದೆಹಲಿ: ಪೆಟ್ರೋಲ್, ಡೀಸೆಲ್ ಮುಂತಾದ ಇಂಧನ ತೈಲಗಳ ಮಾರಾಟ ಸಂಬಂಧ ಕೇಂದ್ರ ಸರ್ಕಾರ ವಿನೂತನ ಪ್ರಸ್ತಾಪವನ್ನು ಸಚಿವ ಸಂಪುಟದ ಮುಂದಿಡಲು ಚಿಂತನೆ ನಡೆಸಿದೆ. ಇಲ್ಲಿಯತನಕ ದೇಶದೆಲ್ಲೆಡೆ ಇಂಧನ ತೈಲಗಳನ್ನು ಪ್ರತ್ಯೇಕ ಬಂಕುಗಳಲ್ಲಿ ಮಾರಾಟ ಮಾಡಲಾಗುತ್ತಿತ್ತು. ಆದ್ರೆ, ಎಲ್ಲಾ ಅಂದುಕೊಂಡಂತೆ ಆದರೆ, ಭವಿಷ್ಯದಲ್ಲಿ ಸೂಪರ್ ಮಾರುಕಟ್ಟೆಗಳಲ್ಲಿ ಪೆಟ್ರೋಲ್, ಡೀಸೆಲ್, ನೈಸರ್ಗಿಕ ತೈಲಗಳು ಮಾರಾಟ ವಾಗಲಿವೆ.

ಸೂಪರ್‌ ಮಾರುಕಟ್ಟೆಗಳಲ್ಲಿ ಪೆಟ್ರೋಲ್,ಡೀಸೆಲ್ ಲಭ್ಯ?

ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ ಇಂಥದ್ದೊಂದು ಪ್ರಸ್ತಾಪವನ್ನು ಕ್ಯಾಬಿನೆಟ್ ಮುಂದಿಡಲಿದ್ದು, ಈಗಿರುವ ನಿಯಮಗಳನ್ನು ಸರಳೀಕರಣಗೊಳಿಸಲು ನಿರ್ಧರಿಸಿದೆ. ಇಂಧನ ತೈಲಗಳನ್ನು ಸೂಪರ್ ಮಾರುಕಟ್ಟೆಗಳು, ಶಾಪಿಂಗ್ ಮಾಲ್‌ಗಳು ಹಾಗು ಇನ್ನಿತರ ಕಮರ್ಷಿಯಲ್ ಕಾಂಪ್ಲೆಕ್ಸ್‌ ಗಳಲ್ಲೂ ಸೇಲ್ ಮಾಡಲು ಕೇಂದ್ರ ಉತ್ಸುಕತೆ ತೋರಿಸಿದೆ.ಈ ಮೂಲಕ ಪೆಟ್ರೋಲ್, ಡೀಸೆಲ್ ಹಾಗು ನೈಸರ್ಗಿಕ ಅನಿಲಗಳು ಚಿಲ್ಲರೆ ಮಾರುಕಟ್ಟೆಗಳಲ್ಲಿ ಸುಲಭವಾಗಿ ಲಭ್ಯವಾಗುವಂತೆ ಮಾಡಲು ಸರ್ಕಾರ ಮುಂದಾಗಿದೆ.

ನಿಯಮಗಳ ಸರಳೀಕರಣ ಮಾಡಲಿದೆ ಸರ್ಕಾರ:

ಚಿಲ್ಲರೆ ಮಾರುಕಟ್ಟೆಗಳಲ್ಲಿ ಕಂಪನಿಗಳು ವ್ಯಾಪಾರ ವಹಿವಾಟು ಮಾಡಲು ಬೇಕಾಗಿರುವ ಕನಿಷ್ಟ ಅರ್ಹತೆಗಳು ಹಾಗು ಮಾನದಂಡಗಳನ್ನು ಸರಳೀಕರಣಗೊಳಿಸಲಿದೆ. ದೇಶೀಯ ಮಾರುಕಟ್ಟೆಗಳಲ್ಲಿ ಕನಿಷ್ಠ ಮೂಲಸೌಕರ್ಯ ಹೂಡಿಕೆ ಮಟ್ಟ 2,000 ಕೋಟಿ ರೂಪಾಯಿವರೆಗಿನ ನಿಯಮವನ್ನು ಸರಳೀಕರಣಗೊಳಿಸಲು ಸರ್ಕಾರ ಆಸಕ್ತಿ ತೋರಿಸಿದೆ. ಅದೇ ರೀತಿ 30 ಲಕ್ಷ ಕಚ್ಚಾ ತೈಲಕ್ಕೆ ಸಂಬಂಧಿಸಿದ ಬ್ಯಾಂಕು ಗ್ಯಾರಂಟಿ ನಿಯಮವನ್ನೂ ಸಡಿಲಗೊಳಿಸಲಾಗುತ್ತದೆ ಎಂದು ವಿಶ್ವಸನೀಯ ಮೂಲಗಳು ಮಾಹಿತಿ ನೀಡಿವೆ.

ಸರ್ಕಾರದ ಈ ಪ್ರಸ್ತಾಪ ಜಾರಿಗೆ ಬಂದಲ್ಲಿ ಬೃಹತ್ ಮಲ್ಟಿ ಬ್ರಾಂಡ್ ಕಂಪನಿಗಳಾದ ಫ್ಯೂಚರ್ ಗ್ರೂಪ್, ರಿಲಾಯನ್ಸ್‌ ಸೇರಿದಂತೆ ಅಂತರಾಷ್ಟ್ರೀಯ ಕಂಪನಿಗಳಾದ ಸೌದಿ ಅರಾಮ್ಕೋಗಳು ಇಂಧನ ತೈಲಗಳ ಚಿಲ್ಲರೆ ಮಾರುಕಟ್ಟೆ ಮಾರಾಟಕ್ಕೆ ಇಳಿಯಲಿವೆ.