ಮಂಡನೆಯಾಗದ ವಿಧೇಯಕಗಳು: ಸಂಸತ್​ ಅಧಿವೇಶನ ಆಗಸ್ಟ್ 7ರವರೆಗೆ ವಿಸ್ತರಣೆ

ಸಂಸತ್​ ಅಧಿವೇಶನವನ್ನು ಆಗಸ್ಟ್ 7ರವೆಗೆ ವಿಸ್ತರಿಸಿ ಸಂಸದೀಯ ವ್ಯವಹಾರಗಳ ಸಮಿತಿ ನಿರ್ಧಾರ ಕೈಗೊಂಡಿದೆ.

ನವದೆಹಲಿ: ಕೆಲವು ಮಸೂದೆಗಳು ಮಂಡನೆಗೆ ಬಾಕಿ ಉಳಿದಿರುವುದರಿಂದ ಸಂಸತ್​ ಅಧಿವೇಶನ ಆಗಸ್ಟ್ 7ರವರೆಗೆ ವಿಸ್ತರಣೆಯಾಗಿದೆ.
ಸಂಸದೀಯ ವ್ಯವಹಾರಗಳ ಸಮಿತಿ ಸಭೆ ಬಳಿಕ ಈ ನಿರ್ಧಾರವನ್ನು ಕೈಗೊಳ್ಳಲಾಗಿದೆ ಎಂಬ ಮಾಹಿತಿ ಲಭ್ಯವಾಗಿದೆ.

ಈ ಬಗ್ಗೆ ಮಾಹಿತಿ ನೀಡಿದ ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ಪ್ರಕಾಶ್ ಜಾವ್ಡೇಕರ್, ವಿರೋಧ ಪಕ್ಷ ಸಂಸತ್​ ಅಧಿವೇಶನದ ದಿನಗಳನ್ನು ವಿಸ್ತರಿಸಬೇಕೆಂದು ಸದಾ ಪಟ್ಟು ಹಿಡಿಯುತ್ತಿತ್ತು, ನಾವು ಈಗ ಅದನ್ನು ಮಾಡಿದ್ದೇವೆ ಎಂದರು.

ಸಂಸತ್​ ಅಧಿವೇಶನವು ಜೂನ್ 17 ಕ್ಕೆ ಆರಂಭಗೊಂಡಿದ್ದು ಜುಲೈ 26ಕ್ಕೆ ಮುಕ್ತಾಯಗೊಳ್ಳಬೇಕಿತ್ತು. ಈಗ ನಡೆಯುತ್ತಿರುವ ಅಧಿವೇಶನವನ್ನು ವಿಸ್ತರಿಸಬಹುದು ಎಂದು ಸರ್ಕಾರ ಬುಧವಾರ ತಿಳಿಸಿತ್ತು. ಇದೀಗ ಸಂಸದೀಯ ವ್ಯವಹಾರಗಳ ಸಮಿತಿ ಅಧಿವೇಶನವನ್ನು ಆಗಸ್ಟ್ 7 ರವರೆಗೆ ವಿಸ್ತರಿಸಲು ನಿರ್ಧರಿಸಿದೆ.