ನಾಳೆಯಿಂದ ಸಂಸತ್ ಅಧಿವೇಶನ : ಯಾವ ಯಾವ ವಿಚಾರಗಳ ಬಗ್ಗೆ ಚರ್ಚೆ..?

ಈಗಾಗಲೇ ಆಡಳಿತರೂಢ ಬಿಜೆಪಿ ಸೇರಿ ಎಲ್ಲ ಪಕ್ಷಗಳು ತಂತ್ರ, ಪ್ರತಿತಂತ್ರವನ್ನು ರೂಪಿಸಿದ್ದು ನಾಳೆಯ ಮಾನ್ಸೂನ್ ಅಧಿವೇಶನ ಯಾವ ರೀತಿಯ ಅಧಿವೇಶನ ನಡೆಯಲಿದೆ ಎಂಬ ಕುತೂಹಲ ಎಲ್ಲರಲ್ಲಿದೆ.

ನವದೆಹಲಿ:ಸಂಸತ್ತಿನ ಮುಂಗಾರು ಅಧಿವೇಶನ ಸೋಮವಾರದಿಂದ ಶುರುವಾಗಲಿದ್ದು, ಅಕ್ಟೋಬರ್ 1ರವರೆಗೆ ನಡೆಯಲಿದೆ. ಈಗಾಗಲೇ ಆಡಳಿತರೂಢ ಬಿಜೆಪಿ ಸೇರಿ ಎಲ್ಲಾ ಪಕ್ಷಗಳು ತಂತ್ರ, ಪ್ರತಿತಂತ್ರವನ್ನು ರೂಪಿಸಿದ್ದು, ಯಾವ ರೀತಿಯ ಅಧಿವೇಶನ ನಡೆಯಲಿದೆ ಎಂಬುದು ಎಲ್ಲರನ್ನೂ ಕುತೂಹಲದಲ್ಲಿ ಇರಿಸಿದೆ.

ಕೊರೊನಾ ಕಾರಣಕ್ಕೆ ಸಂಸತ್ತಿನ ಅಧಿವೇಶನವನ್ನು ಎರಡು ಪಾಳಿಗಳಲ್ಲಿ ನಡೆಸಲು ನಿರ್ಧರಿಸಲಾಗಿದೆ. ಬೆಳಗ್ಗೆ 9ರಿಂದ ಮಧ್ಯಾಹ್ನ 1ರವರೆಗೆ ಲೋಕಸಭೆ ಮತ್ತು ಮಧ್ಯಾಹ್ನ 3ರಿಂದ ಸಂಜೆ 7ರವರೆಗೆ ರಾಜ್ಯಸಭೆ ಕಲಾಪದ ಮಾದರಿಯಲ್ಲಿ ನಡೆಸಲಾಗುತ್ತದೆ.

ಅಧಿವೇಶನಲ್ಲಿ ಚರ್ಚೆ ನಡೆಯಬಹುದು ಎಂದು ಅಂದಾಜಿಲಾದ ವಿಷಯಗಳು..

• ಕೊರೊನಾ ಸೋಂಕು
• ಭಾರತ, ಚೀನಾ ಗಡಿ ಸಮಸ್ಯೆ
• ಆರ್ಥಿಕ ಸಮಸ್ಯೆಯಿಂದ ಜಿಡಿಪಿ ಕುಸಿತ
• ಉದ್ಯೋಗ ಕಡಿತ
• ಎಪಿಎಂಸಿ ಕಾಯ್ದೆ
• ಪ್ರಶ್ನೋತ್ತರ ಹಾಗೂ ಶೂನ್ಯ ವೇಳೆ ರದ್ದು ವಿಚಾರ

ಮಾರ್ಚ್ 23ರಂದು ಸಂಸತ್ ಅಧಿವೇಶನ ನಡೆದಿದ್ದು, ಸಂವಿಧಾನದ ಪ್ರಕಾರ ಇದಾದ ಆರು ತಿಂಗಳಲ್ಲಿ ಮತ್ತೊಂದು ಅಧಿವೇಶನ ನಡೆಸಬೇಕಾದ ಅನಿವಾರ್ಯತೆ ಇತ್ತು. ಹೀಗಾಗಿ ನಾಳೆಯಿಂದ ಸಂಸತ್ ಅಧಿವೇಶನ ನಡೆಸಲು ತೀರ್ಮಾನ ಮಾಡಲಾಗಿದೆ.

ಈಗಾಗಲೇ ನಾಳೆಯ ಅಧಿವೇಶನಕ್ಕಾಗಿ ಮುಂಚಿತವಾಗಿ ಸಾಂಪ್ರದಾಯಿಕವಾಗಿ ನಡೆಯುವ ಸರ್ವಪಕ್ಷ ಸಭೆ ರದ್ದುಗೊಂಡಿದೆ. ಶೂನ್ಯ ವೇಳೆ ಹಾಗೂ ಪ್ರಶ್ನೋತ್ತರ ವೇಳೆಯೂ ರದ್ದುಗೊಂಡಿರುವ ಕಾರಣದಿಂದ ಅಧಿವೇಶನ ಯಾವ ರೀತಿ ನಡೆಯಲಿದೆ ಎಂಬುದು ಕುತೂಹಲ ಮೂಡಿಸಿದೆ.

ಕೊರೊನಾ ಭೀತಿಯಿಂದಾಗಿ ಸಂಸದರನ್ನು ತಪಾಸಣೆ ಮಾಡಿದ ಬಳಿಕವೇ ಸಂಸತ್​ ಒಳಗಡೆ ಕಳಿಸಲಾಗುತ್ತದೆ. ಈಗಾಗಲೇ ಸಂಸತ್ ಭವನಕ್ಕೆ ಸ್ಯಾನಿಟೈಸ್ ಮಾಡಿ ಕೆಲವು ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ.