ನವದೆಹಲಿ :ಜಮ್ಮು ಮತ್ತು ಕಾಶ್ಮೀರದಲ್ಲಿ ಗಡಿ ಮೂಲಕ ನುಸುಳಲು ಯತ್ನಿಸಿದ್ದ ಐವರು ಭಯೋತ್ಪಾದಕರನ್ನು ಹೊಡೆದುರುಳಿಸಿ ಐವರು ಭಾರತೀಯ ಯೋಧರು ಹುತಾತ್ಮರಾದ ಘಟನೆ ಕುಪ್ವಾರ ಜಿಲ್ಲೆಯ ಗಡಿ ನಿಯಂತ್ರಣ ರೇಖೆಯ ಬಳಿ ನಡೆದಿದೆ. ಹಿಮಾಚಲಪ್ರದೇಶ ಮೂಲದ ಸುಬೇದಾರ್ ಸಂಜೀವ್‌ಕುಮಾರ್, ಉತ್ತರಾಖಂಡ್ ಮೂಲದ ಹವಾಲ್ದಾರ್ ದವೇಂದ್ರ ಸಿಂಗ್, ಪ್ಯಾರಾಟ್ರೂಪರ್ಗಳಾಗಿದ್ದ ಹಿಮಾಚಲಪ್ರದೇಶ ಮೂಲದ ಸಿಪಾಯಿ ಬಾಲಕೃಷ್ಣ, ಉತ್ತರಾಖಂಡ ಮೂಲದ ಸಿಪಾಯಿ ಅಮೀತ್‌ಕುಮಾರ್ ಹಾಗೂ ಸಿಪಾಯಿ ಛತ್ರಪಾಲ್‌ ಸಿಂಗ್ ಗಡಿ ನುಸುಳಲು ಯತ್ನಿಸಿದ ಭಯೋತ್ಪಾದಕರನ್ನು ಕೊಂದು ತಾವೂ ಹುತಾತ್ಮರಾಗಿದ್ದಾರೆ.
ಘಟನೆಯ ವಿವರ ಹೀಗಿದೆ :ಏಪ್ರಿಲ್ 1ರಂದು ಲೈನ್ ಆಫ್ ಕಂಟ್ರೋಲ್ ಬಳಿ ಭಯೋತ್ಪಾದಕರು ದೇಶದೊಳಗೆ ನುಸುಳುವ ಅನುಮಾನ ರಕ್ಷಣಾ ಇಲಾಖೆಗೆ ಬಂದಿತ್ತು. ಭಾರೀ ಹಿಮಪಾತ ಮತ್ತು ಪ್ರತಿಕೂಲ ಹವಾಮಾನದ ಪ್ರಯೋಜನ ಪಡೆದು ದೇಶದ ಒಳ ನುಸುಳಿ ವಿಧ್ವಂಸಕ ಕೃತ್ಯ ಎಸಗಲು ಭಯೋತ್ಪಾದಕರು ಮುಂದಾಗಿದ್ದರು. ಇದನ್ನು ತಡೆಯುವ ಸಲುವಾಗಿ ಆ ಸ್ಥಳಕ್ಕೆ ವಿಶೇಷ ಮಿಲಿಟರಿ ಪಡೆ ನಿಯೋಜಿಸಿ ಭಯೋತ್ಪಾದಕರಿಗಾಗಿ ಎರಡು ದಿನಗಳ ಕಾಲ ಶೋಧ ಕಾರ್ಯ ಮುಂದುವರೆಸಲಾಗಿತ್ತು.
ಏಪ್ರಿಲ್ 1ರಂದು ಶೋಧ ಕಾರ್ಯ ನಡೆಸುತ್ತಿರುವ ವೇಳೆ ಐದು ಬ್ಯಾಗ್ ಸಿಕ್ಕಿ ಭಯೋತ್ಪಾದಕರ ಸುಳಿವನ್ನು ಬಿಟ್ಟುಕೊಟ್ಟಿದ್ದವು. ಈ ವೇಳೆ ಮತ್ತಷ್ಟು ಸೇನೆಯನ್ನು ಕರೆಸಿಕೊಳ್ಳಲಾಯಿತು. ಆದರೆ, ಶೋಧ ಕಾರ್ಯ ವಿಫಲವಾಗಿತ್ತು. ಏಪ್ರಿಲ್ 3ರ ಸಂಜೆ 4.30ಕ್ಕೆ ಹಾಗೂ ಮತ್ತೆ ಏಪ್ರಿಲ್ 4ರ ಸಂಜೆ 6.30ಕ್ಕೆ ಭಯೋತ್ಪಾದಕರ ಜಾಡು ಪತ್ತೆ ಹಚ್ಚಲಾಯಿತು. ಜಾಡು ಪತ್ತೆ ಹಚ್ಚಿದ ನಂತರ ಭಯೋತ್ಪಾದಕರ ವಿರುದ್ಧ ಹೋರಾಡಲು ನೈಪುಣ್ಯತೆ ಪಡೆದ ಪ್ಯಾರಾ ಸ್ಪೆಷಲ್ ಫೋರ್ಸ್‌ನ ಸ್ಥಳಕ್ಕೆ ನಿಯೋಜಿಸಲಾಯಿತು. ವೈಮಾನಿಕ ವಾಹನವೊಂದರ ದೃಶ್ಯ ಆಧಾರಿತವಾಗಿ ನೋಡುವುದಾದರೆ ಸ್ಪೆಷಲ್ ಫೋರ್ಸ್‌ನ ಉಗ್ರರಿರುವ ಸ್ಥಳದಲ್ಲಿ ಹೆಲಿಕಾಪ್ಟರ್ ಮೂಲಕ ಇಳಿಸಲಾಯಿತು. ಹೆಚ್ಚಿನ ಹಿಮ ಸುರಿಯುತ್ತಿದ್ದ ಕಾರಣ ಬೆಟಾಲಿಯನ್‌ ಅಲ್ಲಿಯೇ ನೆಲೆಯೂರಬೇಕಾಯ್ತು.
ಏಪ್ರಿಲ್ 5ರಂದು ಐವರು ಸೈನಿಕರ ಒಂದು ತಂಡ ಹೊರಗೆ ಕಾಲಿಟ್ಟಿದ್ದರು. ಈ ವೇಳೆ ಹಿಮಪಾತವಾಗಿ ಆ ಐವರ ತಂಡ ನೀರಿನ ಕಾಲುವೆಯೊಂದಕ್ಕೆ ಬಿದ್ದಿದೆ. ಅವರು ಬಿದ್ದ ಸ್ಥಳದಿಂದ ಸ್ವಲ್ಪ ದೂರದಲ್ಲೇ ಉಗ್ರರು ನೆಲೆಯೂರಿದ್ದು ಗಮನಕ್ಕೆ ಬಂದಾಕ್ಷಣ, ಭಯೋತ್ಪಾದಕರು ಹಾಗೂ ಮೊದಲೇ ಗಾಯಗೊಂಡಿದ್ದ ಸೇನಾಪಡೆಯ ನಡುವೆ ಗುಂಡಿನ ಚಕಮಕಿ ನಡೆಯಿತು. ತುಂಬಾ ಹತ್ತಿರದಿಂದ ನಡೆದ ಈ ದಾಳಿಯಲ್ಲಿ ಐವರಿದ್ದ ಭಯೋತ್ಪಾದಕರ ಗುಂಪನ್ನ ಮಟ್ಟ ಹಾಕುವಾಗ ನಾಲ್ವರು ಯೋಧರು ಹುತಾತ್ಮರಾಗಿದ್ದಾರೆ. ಸುಬೇದಾರ್ ಸಂಜೀವ್ ಕುಮಾರ್ ಗಂಭೀರವಾಗಿ ಗಾಯಗೊಂಡಿದ್ದರು. ಆದರೆ, ಆಸ್ಪತ್ರೆಗೆ ಸಾಗಿಸುವಾಗ ಮಾರ್ಗ ಮಧ್ಯೆ ಅವರೂ ಹುತಾತ್ಮರಾಗಿದ್ದಾರೆ.
