ಪಾಕ್ ಪ್ರಜೆಗಳಿಗೆ ಕೊರೊನಾ ಎದುರಿಸುವಷ್ಟು ರೋಗ ನಿರೋಧಕ ಶಕ್ತಿ ಹೊಂದಿಲ್ಲ: ಪ್ರಧಾನಿ ಇಮ್ರಾನ್​ ಖಾನ್​​​​

ನೆರೆಯ ಪಾಕಿಸ್ತಾನದಲ್ಲೂ ಕೊರೊನಾ ಹಾವಳಿ ಮುಂದುವರೆಯುತ್ತಿದೆ. ಈ ವೇಳೆ ಪಾಕಿಸ್ತಾನದ ನಾಗರಿಕರು ಸೋಂಕನ್ನು ಎದುರಿಸುವಷ್ಟು ರೋಗ ನಿರೋಧಕ ಶಕ್ತಿ ಹೊಂದಿಲ್ಲ ಎಂದು ಪಾಕ್​ ಪ್ರಧಾನಿ ಇಮ್ರಾನ್​ ಖಾನ್​ ಎಚ್ಚರಿಕೆ ನೀಡಿದ್ದಾರೆ

ಇಸ್ಲಾಮಾಬಾದ್​:ಪಾಕಿಸ್ತಾನದ ಜನತೆ ಕೊರೊನಾ ಎದುರಿಸುವಷ್ಟು ರೋಗ ನಿರೋಧಕ ಶಕ್ತಿಯಿಲ್ಲ, ಆದ್ದರಿಂದ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳಬೇಕೆಂದು ಎಚ್ಚರಿಕೆ ನೀಡಿದ್ದಾರೆ.

ಲಾಹೋರ್​ಗೆ ಭೇಟಿ ಕೊಟ್ಟ ಸಂದರ್ಭದಲ್ಲಿ ಈ ಬಗ್ಗೆ ಮಾತನಾಡಿದ ಅವರು ಪಾಕಿಸ್ತಾನಕ್ಕೆ ಕೊರೊನಾ ಸೋಂಕನ್ನು ಎದುರಿಸುವ ಶಕ್ತಿಯಿದೆ ಎಂದು ಭರವಸೆ ನೀಡಿದ್ದಾರೆ. ಸರ್ಕಾರ ಕೊರೊನಾ ನಿವಾರಣೆಗೆ ಬೇಕಾದ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳುತ್ತಿದೆ ಎಂದು ಸ್ಪಷ್ಟನೆ ನೀಡಿದ್ದಾರೆ. ನಿನ್ನೆಯಷ್ಟೇ ಟ್ವೀಟ್ ಮಾಡಿದ್ದ ಅವರು ಶೈಕ್ಷಣಿಕ ಸಂಸ್ಥೆಗಳು, ಮಾಲ್​ಗಳು, ಸಾರ್ವಜನಿಕ ಸ್ಥಳಗಳನ್ನು ಬಂದ್ ಮಾಡಿ ಕೊರೊನಾ ವಿರುದ್ಧ ಹೋರಾಟಕ್ಕೆ ಸಹಕಾರ ನೀಡಬೇಕೆಂದು ಸೂಚಿಸಿದ್ದರು.

ಶನಿವಾರದ ಅಂಕಿ ಅಂಶಗಳಂತೆ ಪಾಕಿಸ್ತಾನದಲ್ಲಿ 2818 ಸೋಂಕಿತರಿದ್ದು, 41 ಮಂದಿ ಬಲಿಯಾಗಿದ್ದಾರೆ. ಪಂಜಾಬ್​ನಲ್ಲಿ 1131, ಸಿಂಧ್​ನಲ್ಲಿ 839, ಖೈಬರ್​​-ಪಖ್ತುಂಖ್ವಾದಲ್ಲಿ 383 , ಬಲೂಚಿಸ್ತಾನದಲ್ಲಿ 175, ಗಿಲ್ಗಿಟ್​ ಬಾಲ್ಟಿಸ್ತಾನದಲ್ಲಿ 193, ಇಸ್ಲಾಮಾಬಾದ್​ನಲ್ಲಿ 75 ಕೊರೊನಾ ಸೋಂಕಿತರು ಪತ್ತೆಯಾಗಿದ್ದಾರೆ.

ಪಾಕಿಸ್ತಾನ ಪಂಜಾಬ್​ನಲ್ಲಿ ಸೋಂಕಿತರ ಸಂಖ್ಯೆ ಸಾವಿರ ಗಡಿ ದಾಟಿದೆ. ಸೋಂಕಿತರಿಗೆ ಚಿಕಿತ್ಸೆ ನೀಡುವ ಸಲುವಾಗಿ ವಿಶೇಷ ಆಸ್ಪತ್ರೆಗಳನ್ನು ಕೂಡಾ ಸಿದ್ಧಪಡಿಸಲಾಗಿದೆ. ಏಪ್ರಿಲ್​ ಅಂತ್ಯದ ವೇಳೆಗೆ ಪಾಕ್​ನ ಒಟ್ಟು ಸೋಂಕಿತರ ಸಂಖ್ಯೆ 50 ಸಾವಿರ ಮೀರುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.