ನವದೆಹಲಿ: ಪುಲ್ವಾಮಾ ದಾಳಿ ನಂತರ ವಿಶ್ವಮಟ್ಟದಲ್ಲಿ ಪಾಕ್ಅನ್ನು ದುರ್ಬಲಗೊಳಿಸಲು ಭಾರತ ಪ್ರಯತ್ನ ನಡೆಸುತ್ತಲೇ ಇದೆ. ಇದರ ಬೆನ್ನಲ್ಲೆ, ಪ್ಯಾರಿಸ್ನ ಅಂತಾರಾಷ್ಟ್ರ ಸಂಸ್ಥೆ ಎಫ್ಎಟಿಎಫ್ ಸಹ ಪಾಕ್ಗೆ ಪೆಟ್ಟು ನೀಡಿದೆ.
ಉಗ್ರವಾದಕ್ಕೆ ಆರ್ಥಿಕ ನೆರವು ನೀಡುವುದನ್ನು ತಡೆಯುವ ಆರ್ಥಿಕ ಕ್ರಿಯಾ ಕಾರ್ಯಪಡೆ (FATF)ಯು ಇಂದು ನಡೆದ ಸಭೆಯಲ್ಲಿ ಪುಲ್ವಾಮಾ ದಾಳಿಯವನ್ನು ಬಲವಾಗಿ ಖಂಡಿಸಿದೆ. ಜೈಶ್ ಎ ಮೊಹಮ್ಮದ್ ಹಾಗೂ ಲಷ್ಕರ್ ಎ ತೊಯ್ಬಾದಂತಹ ಉಗ್ರ ಸಂಘಟನೆಗಳಿಗೆ ಹಣಕಾಸಿನ ನೆರವನ್ನು ನಿಗ್ರಹಿಸುವಲ್ಲಿ ಪಾಕ್ ವಿಫಲವಾಗಿದೆ ಎಂದು ಆರೋಪಿಸಿದೆ. ಅಲ್ಲದೆ, ಪಾಕ್ಅನ್ನು ತನ್ನ ಗ್ರೇ ಲಿಸ್ಟ್ನಲ್ಲಿಯೇ ಮುಂದುವರೆಸಲು ನಿರ್ಧರಿಸಿದೆ. ಇದರಿಂದ ಪಾಕ್ ಅಂತಾರಾಷ್ಟ್ರ ಸಾಲಗಳನ್ನು ಪಡೆಯುವುದು ಕಷ್ಟಸಾಧ್ಯವಾಗುತ್ತದೆ.
38 ಸದಸ್ಯರುಳ್ಳ ಸಂಸ್ಥೆಯು, ಪುಲ್ವಾಮಾ ದಾಳಿಯಂತಹ ವಿಧ್ವಂಸಕ ಕೃತ್ಯಗಳು ಉಗ್ರವಾದ ಪ್ರಚೋದಕ ಶಕ್ತಿಗಳ ಆರ್ಥಿಕ ನೆರವಿಲ್ಲದೆ ನಡೆಯುವುದಿಲ್ಲ. ಪಾಕ್ ಇಂತಹ ಉಗ್ರ ಸಂಘಟನೆಗಳಿಗೆ ಆರ್ಥಿಕ ನೆರವು ತಡೆಯುವುದರಲ್ಲಿ ಸರಿಯಾದ ಕ್ರಮ ಕೈಗೊಂಡಿಲ್ಲ. ಪಾಕ್ ಕೂಡಲೆ ಆಕ್ಷನ್ ಪ್ಲಾನ್ ರೂಪಿಸಿ, ತನ್ನ ಕೊರತೆಗಳನ್ನು ಸರಿದೂಗಿಸಿಕೊಳ್ಳುವ ಕಾರ್ಯವನ್ನು ಮುಂದುವರೆಸಬೇಕು ಎಂದು ಸೂಚನೆ ನೀಡಿದೆ.
ಇದೇ ಮೇ ಒಳಗೆ ಪಾಕ್ ತನ್ನ ಆಕ್ಷನ್ ಪ್ಲಾನ್ ರೂಪಿಸಬೇಕು. ಅಂತೆಯೇ ಅಕ್ಟೋಬರ್ ಒಳಗೆ ತನ್ನ ಗುರಿಯನ್ನು ತಲುಪಿಲಿಲ್ಲವಾದರೆ ಬ್ಲಾಕ್ಲಿಸ್ಟ್ಗೆ ಸೇರಿಸಲಾಗುವುದು ಎಂದು ಖಡಕ್ ಎಚ್ಚರಿಕೆಯನ್ನೂ ನೀಡಿದೆ.
ಕಳೆದ ವಾರ ಭಾರತದ ಗುಪ್ತಚರ ಅಧಿಕಾರಿಗಳು, ಪುಲ್ವಾಮಾ ದಾಳಿಯಲ್ಲಿ ಪಾಕ್ ಪಾತ್ರವಿರುವ ಕುರಿತು ಎಫ್ಎಟಿಎಫ್ಗೆ ದಾಖಲೆ ಸಲ್ಲಿಸಲಾಗುವುದು ಎಂದು ಹೇಳಿದ್ದರು. ಪಾಕ್ ಕಳೆದ ವರ್ಷ ಜೂನ್ ತಿಂಗಳಿಂದ ಎಫ್ಎಟಿಎಫ್ನ ಗ್ರೇ ಲಿಸ್ಟ್ನಲ್ಲಿದೆ. ಈಗಾಗಲೆ ಆರ್ಥಿಕ ಸಂಕಷ್ಟದಿಂದ ಕತ್ತೆಗಳನ್ನು ಮಾರಾಟ ಮಾಡುವಷ್ಟು ಅಧೋಗತಿಗೆ ಇಳಿದಿರುವ ಪಾಕ್ಗೆ ಇದು ಮತ್ತಷ್ಟು ಹೊಡೆತ ನೀಡಲಿದೆ ಎಂದೇ ಹೇಳಲಾಗ್ತಿದೆ.
