ಸುಷ್ಮಾ ಸ್ವರಾಜ್​​ ಪಾದದ ಬಳಿ ಬಿಕ್ಕಿಬಿಕ್ಕಿ ಅತ್ತ ಎಂಡಿಹೆಚ್​ ಮಸಾಲ ಕಂಪನಿ ಮಾಲೀಕ!

ಮಂಗಳವಾರ ಇಹಲೋಕ ತ್ಯಜಿಸಿದ ಕೇಂದ್ರದ ಮಾಜಿ ಸಚಿವೆ ಸುಷ್ಮಾ ಸ್ವರಾಜ್ ಅಂತ್ಯಕ್ರಿಯೆ ಇಂದು ನವದೆಹಲಿಯ ಲೋಧಿ ಸ್ಮಶಾನದಲ್ಲಿ ಸಕಲ ಸರ್ಕಾರಿ ಗೌರವಗಳೊಂದಿಗೆ ನಡೆಯಿತು. ಇದಕ್ಕೂ ಮೊದಲು ಸುಷ್ಮಾ ಪಾರ್ಥಿವ ಶರೀರವನ್ನು ದೆಹಲಿಯ ಬಿಜೆಪಿ ಕಚೇರಿಯಲ್ಲಿ ಸಾರ್ವಜನಿಕ ದರ್ಶನಕ್ಕಿಡಲಾಗಿತ್ತು. ಈ ವೇಳೆ, ಎಂಡಿಹೆಚ್​ ಮಸಾಲ ಕಂಪನಿ ಮಾಲೀಕ ಪಾರ್ಥಿವ ಶರೀರದ ಮುಂದೆ ಕುಳಿತು ಬಿಕ್ಕಿ ಬಿಕ್ಕಿ ಅತ್ತಿದ್ದಾರೆ.

ನವದೆಹಲಿ:ಕೇಂದ್ರದ ಮಾಜಿ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್​​ ಅಂತ್ಯಕ್ರಿಯೆ ನವದೆಹಲಿಯ ಲೋಧಿ ಚಿತಾಗಾರದಲ್ಲಿ ಸಕಲ ಸರ್ಕಾರಿ ಗೌರವಗಳೊಂದಿಗೆ ನಡೆಯಿತು. ಅದಕ್ಕೂ ಮೊದಲು ಅನೇಕ ರಾಜಕೀಯ ಮುಖಂಡರು ಸೇರಿದಂತೆ ಅನೇಕರು ಅಂತಿಮ ನಮನ ಸಲ್ಲಿಕೆ ಮಾಡಿದರು.

ಈ ವೇಳೆ, ಭಾರತದ ಖ್ಯಾತ ಮಸಾಲ ಕಂಪನಿ ಎಂಡಿಹೆಚ್ ಮಾಲೀಕ 96 ವರ್ಷದ ಧರ್ಮಪಾಲ್ ಗುಲಾಟಿ ಸುಷ್ಮಾ ಸ್ವರಾಜ್​ ಅವರ ಕಾಲಿನ ಬಳಿ ಕುಳಿತು ಕಣ್ಣೀರು ಹಾಕಿದ್ದಾರೆ. ತ್ರಿವರ್ಣ ಧ್ವಜ ಹೊದಿಸಿದ್ದ ಸುಷ್ಮಾರ ಪಾರ್ಥಿವ ಶರೀರವನ್ನು ನೋಡುತ್ತಾ ಬಿಕ್ಕಿ ಬಿಕ್ಕಿ ಅತ್ತಿದ್ದಾರೆ.

ಗುಲಾಟಿಯವರು ತಮ್ಮ ಮಸಾಲ ಉತ್ಪನ್ನದ ಟ್ರೇಡ್​ಮಾರ್ಕ್​ ಬಣ್ಣವಾದ ಕೆಂಪು ಪಗ್ಡಿ ಧರಿಸಿದ್ದರು. ತಮ್ಮ ಬಗ್ಗೆಯಾಗಲಿ ಅಥವಾ ತಮ್ಮ ವಯಸ್ಸಿನ ಬಗ್ಗೆಯಾಗಲಿ ಚಿಂತಿಸದ ಗುಲಾಟಿ, ಸುಷ್ಮಾರ ಮೃತದೇಹದ ಮುಂದೆ ಗಳಗಳನೆ ಅತ್ತಿದ್ದಾರೆ.