ಭಾರತದಲ್ಲಿ ತ್ರಿವಳಿ ತಲಾಖ್ ನಿಷೇಧಕ್ಕೆ ವರ್ಷ... ಶೇಕಡಾ 82ರಷ್ಟು ಇಳಿಕೆ ಕಂಡ ಪ್ರಕರಣಗಳು

ಆಗಸ್ಟ್ 1, 2019ರಂದು ತ್ರಿವಳಿ ತಲಾಖ್ ಕಾನೂನು ಬಾಹಿರ ಎಂದು ಕಾನೂನು ಜಾರಿಗೆ ಬಂತು. ಇದರಿಂದಾಗಿ ತಲಾಖ್ -ಇ- ಬಿಡ್ಡತ್ ಅಥವಾ ಯಾವುದೇ ರೀತಿಯ ತಲಾಖ್ ಅನ್ನು ಕಾನೂನು ಬಾಹಿರ ಎಂದು ಘೋಷಿಸಲಾಯಿತು. ತನ್ನ ಹೆಂಡತಿಗೆ ತಲಾಖ್ ಎಂದು ಉಚ್ಚರಿಸುವ ಯಾವುದೇ ಮುಸ್ಲಿಂ ಪತಿ ಮೂರು ವರ್ಷಗಳ ಅವಧಿಗೆ ಜೈಲು ಶಿಕ್ಷೆ ಅನುಭವಿಸಬೇಕೆಂದು ಕಾನೂನು ಜಾರಿಗೆ ತರಲಾಯಿತು.

ಹೈದರಾಬಾದ್:ತ್ರಿವಳಿ ತಲಾಖ್ ನಿಷೇಧವಾಗಿ ಇಂದಿಗೆ ಒಂದು ವರ್ಷ. ಆಗಸ್ಟ್ 1, 2019ರಂದು ತ್ರಿವಳಿ ತಲಾಖ್ ಕಾನೂನು ಬಾಹಿರ ಎಂದು ಕಾನೂನು ಜಾರಿಗೆ ಬಂತು. ಇದನ್ನು ನರೇಂದ್ರ ಮೋದಿ ಸರ್ಕಾರವು ಮೇ 18, 2017ರ ಸುಪ್ರೀಂಕೋರ್ಟ್ ತೀರ್ಪಿನ ಅನ್ವಯ ಜಾರಿಗೆ ತಂದಿತು.

ಇದರಿಂದಾಗಿ ತಲಾಖ್ - ಇ - ಬಿಡ್ಡತ್ ಅಥವಾ ಯಾವುದೇ ರೀತಿಯ ತಲಾಖ್ ಅನ್ನು ಕಾನೂನು ಬಾಹಿರ ಎಂದು ಘೋಷಿಸಲಾಯಿತು. ತನ್ನ ಹೆಂಡತಿಗೆ ತಲಾಖ್ ಎಂದು ಉಚ್ಚರಿಸುವ ಯಾವುದೇ ಮುಸ್ಲಿಂ ಪತಿ ಮೂರು ವರ್ಷಗಳ ಅವಧಿಗೆ ಜೈಲು ಶಿಕ್ಷೆ ಅನುಭವಿಸಬೇಕಾಗುತ್ತದೆ ಎಂದು ಕಾನೂನು ಜಾರಿಗೆ ತರಲಾಗಿದೆ. 2011ರ ಜನಗಣತಿಯ ಪ್ರಕಾರ, ಭಾರತದ ಜನಸಂಖ್ಯೆಯಲ್ಲಿ ಶೇ 8ರಷ್ಟು ಮುಸ್ಲಿಂ ಮಹಿಳೆಯರು ಇದ್ದಾರೆ.

ತ್ರಿವಳಿ ತಲಾಖ್ ಕಾನೂನುಬಾಹಿರ ಎಂದು ಹೇಳುವ ಮುಸ್ಲಿಂ ಮಹಿಳೆಯರ (ವಿವಾಹದ ಹಕ್ಕುಗಳ ರಕ್ಷಣೆ) ಮಸೂದೆ, 2019ರ ಅಂಗೀಕಾರದ ವಿವಿಧ ಹಂತಗಳು ಇಲ್ಲಿವೆ:

ಅಕ್ಟೋಬರ್ 16, 2015: ಹಿಂದೂ ಉತ್ತರಾಧಿಕಾರದ ಪ್ರಕರಣವೊಂದರಲ್ಲಿ ವ್ಯವಹರಿಸುವಾಗ ಮುಸ್ಲಿಂ ಮಹಿಳೆಯರು ವಿಚ್ಛೇದನ ಪ್ರಕರಣಗಳಲ್ಲಿ ಲಿಂಗ ತಾರತಮ್ಯ ಎದುರಿಸುತ್ತಾರೆಯೇ ಎಂದು ಪರೀಕ್ಷಿಸಲು ಸೂಕ್ತ ನ್ಯಾಯಪೀಠವನ್ನು ರಚಿಸುವಂತೆ ಸುಪ್ರೀಂ ಕೋರ್ಟ್ ನ್ಯಾಯಪೀಠ ಭಾರತದ ಮುಖ್ಯ ನ್ಯಾಯಮೂರ್ತಿಗಳಿಗೆ ಸಲಹೆ ನೀಡಿತು.

ಫೆಬ್ರವರಿ 2016: ಶಯಾರಾ ಬಾನೊ ಅವರು ಸಲ್ಲಿಸಿದ ಅರ್ಜಿಯಲ್ಲಿ, ಉತ್ತರಾಖಂಡದಲ್ಲಿರುವ ತನ್ನ ಹೆತ್ತವರ ಮನೆಗೆ ವೈದ್ಯಕೀಯ ಚಿಕಿತ್ಸೆಗಾಗಿ ಶಯಾರಾ ಭೇಟಿ ನೀಡಿದ್ದಾಗ, ಆಕೆಯ ಪತಿ ತಲಾಖ್ ನೀಡುತ್ತಿದ್ದೇನೆ ಎಂದು ಹೇಳುವ ಪತ್ರವನ್ನು ಕಳುಹಿಸುತ್ತಾನೆ. ಅಲಹಾಬಾದ್​ನಲ್ಲಿ ವಾಸಿಸುವ ತನ್ನ ಪತಿಯನ್ನು ಭೇಟಿಯಾಗಲು ಆಕೆ ಹೋದಾಗ ಪತಿ ಹಾಗೂ ಮಕ್ಕಳನ್ನು ಭೇಟಿ ಮಾಡಲು ಅವಕಾಶ ನೀಡಿಲ್ಲ ಎಂದು ಉಲ್ಲೇಖಿಸಲಾಗಿತ್ತು.

ಫೆಬ್ರವರಿ 5, 2016: 'ತ್ರಿವಳಿ ತಲಾಖ್', 'ನಿಖಾ ಹಲಾಲಾ' ಮತ್ತು 'ಬಹುಪತ್ನಿತ್ವ'ದ ಸಾಂವಿಧಾನಿಕ ಸಿಂಧುತ್ವವನ್ನು ಪ್ರಶ್ನಿಸಿ ಸಲ್ಲಿಸಿದ ಮನವಿಯ ಕುರಿತು ಸಹಾಯ ಮಾಡಲು ಸುಪ್ರೀಂಕೋರ್ಟ್ ಅಟಾರ್ನಿ ಜನರಲ್ ಮುಕುಲ್ ರೋಹ್ಟಗಿ ಅವರನ್ನು ಕೇಳಿತು.

ಮಾರ್ಚ್ 28, 2016:'ಮಹಿಳೆಯರು ಮತ್ತು ಕಾನೂನು: ಮದುವೆ, ವಿಚ್ಚೇದನ, ಪಾಲನೆ, ಆನುವಂಶಿಕತೆ ಮತ್ತು ಉತ್ತರಾಧಿಕಾರಕ್ಕೆ ಸಂಬಂಧಿಸಿದ ಕಾನೂನುಗಳನ್ನು ಕೇಂದ್ರೀಕರಿಸಿ ಕುಟುಂಬ ಕಾನೂನುಗಳ ಮೌಲ್ಯಮಾಪನ' ಕುರಿತು ಉನ್ನತ ಮಟ್ಟದ ಸಮಿತಿಯ ವರದಿಯನ್ನು ಸಲ್ಲಿಸುವಂತೆ ಸುಪ್ರೀಂಕೋರ್ಟ್ ಕೇಂದ್ರಕ್ಕೆ ಸೂಚಿಸಿತು.

ಜೂನ್ 29, 2016: ಮುಸ್ಲಿಮರಲ್ಲಿ 'ತ್ರಿವಳಿ ತಲಾಖ್' ಅನ್ನು ಸಾಂವಿಧಾನಿಕ ಚೌಕಟ್ಟಿನಲ್ಲಿ ಪರೀಕ್ಷಿಸಲಾಗುವುದು ಎಂದು ಸುಪ್ರೀಂ ಹೇಳಿತು.

ಅಕ್ಟೋಬರ್ 7, 2016: ಭಾರತದ ಸಾಂವಿಧಾನಿಕ ಇತಿಹಾಸದಲ್ಲಿ ಮೊದಲ ಬಾರಿಗೆ ಕೇಂದ್ರವು ಈ ಪದ್ಧತಿಗಳನ್ನು ಸುಪ್ರೀಂ ಕೋರ್ಟ್​ನಲ್ಲಿ ವಿರೋಧಿಸಿತು ಮತ್ತು ಲಿಂಗ ಸಮಾನತೆ ಮತ್ತು ಜಾತ್ಯತೀತತೆಯಂತಹ ಆಧಾರದ ಮೇಲೆ ಒಲವು ತೋರಿತು.

ಫೆಬ್ರವರಿ 14, 2017: ಸುಪ್ರೀಂಕೋರ್ಟ್ ವಿವಿಧ ವಿಷಯಗಳ ನಡುವೆ ಮುಖ್ಯ ಮನವಿಯನ್ನು ಸಲ್ಲಿಸಲು ಅವಕಾಶ ಮಾಡಿಕೊಟ್ಟಿತು.

ಫೆಬ್ರವರಿ 16, 2017: ತ್ರಿವಳಿ ತಲಾಖ್ ಮತ್ತು ನಿಖಾ ಹಲಾಲ್​ಗೆ ಸಂಬಂಧಿಸಿದ ಸವಾಲುಗಳನ್ನು ಚರ್ಚಿಸಲು ಐವರು ನ್ಯಾಯಮೂರ್ತಿಗಳನ್ನು ಒಳಗೊಂಡ ಸಾಂವಿಧಾನಿಕ ಪೀಠವನ್ನು ಸುಪ್ರೀಂಕೋರ್ಟ್ ರಚಿಸಿತು.

ಮಾರ್ಚ್ 2017:ತ್ರಿವಳಿ ತಲಾಖ್ ನ್ಯಾಯಾಂಗದ ವ್ಯಾಪ್ತಿಗೆ ಬರುವುದಿಲ್ಲ ಎಂದು ಅಖಿಲ ಭಾರತ ಮುಸ್ಲಿಂ ವೈಯಕ್ತಿಕ ಕಾನೂನು ಮಂಡಳಿ ಸುಪ್ರೀಂಕೋರ್ಟ್​​​ನಲ್ಲಿ ವಾದಿಸಿತು.

ಮೇ 18, 2017:ತ್ರಿವಳಿ ತಲಾಖ್​ನ ಸಾಂವಿಧಾನಿಕ ಸಿಂಧುತ್ವ ಪ್ರಶ್ನಿಸುವ ಮೇಲ್ಮನವಿಗಳ ತೀರ್ಪನ್ನು ಸುಪ್ರೀಂಕೋರ್ಟ್ ಕಾಯ್ದಿರಿಸಿತು.

ಆಗಸ್ಟ್ 22, 2017: ತ್ರಿವಳಿ ತಲಾಖ್ ಕಾನೂನುಬಾಹಿರ ಎಂದು ಸುಪ್ರೀಂಕೋರ್ಟ್ ಘೋಷಿಸಿತು. ಕಾನೂನನ್ನು ರೂಪಿಸಲು ಕೇಂದ್ರವನ್ನು ಕೇಳಿತು.

ಡಿಸೆಂಬರ್ 2017: ಲೋಕಸಭೆ ಮುಸ್ಲಿಂ ಮಹಿಳೆಯರ (ವಿವಾಹದ ಹಕ್ಕುಗಳ ರಕ್ಷಣೆ) ಮಸೂದೆ, 2017 ಅನ್ನು ಅಂಗೀಕರಿಸಿತು.

ಆಗಸ್ಟ್ 9, 2018: ತ್ರಿವಳಿ ತಲಾಖ್ ಮಸೂದೆಯ ತಿದ್ದುಪಡಿ ಕ್ಲಿಯರ್ ಮಾಡಿದ ಕೇಂದ್ರ ಸರ್ಕಾರ.

ಆಗಸ್ಟ್ 10, 2018: ರಾಜ್ಯಸಭೆಯಲ್ಲಿ ಮಸೂದೆಯನ್ನು ಮಂಡಿಸಲಾಯಿತು. ಚಳಿಗಾಲದ ಅಧಿವೇಶನದವರೆಗೆ ಮಸೂದೆಯ ಅಂಗೀಕಾರವನ್ನು ಮುಂದೂಡಲಾಯಿತು.

ಸೆಪ್ಟೆಂಬರ್ 19, 2018: ಸುಗ್ರೀವಾಜ್ಞೆ ಜಾರಿ. ತ್ರಿವಳಿ ತಲಾಖ್ ಮೂರು ವರ್ಷಗಳ ಜೈಲು ಶಿಕ್ಷೆಯೊಂದಿಗೆ ಶಿಕ್ಷಾರ್ಹ ಅಪರಾಧವಾಗುತ್ತದೆ ಎಂದು ಘೋಷಣೆ.

ಡಿಸೆಂಬರ್ 31, 2018: ರಾಜ್ಯಸಭೆಯಲ್ಲಿ ಆಯ್ದ ಸಮಿತಿಯಿಂದ ಮಸೂದೆ ಪರಿಶೀಲಿಸುವಂತೆ ಪ್ರತಿಪಕ್ಷಗಳಿಂದ ಒತ್ತಾಯ.

ಜೂನ್ 20, 2019: ಸಂಸತ್ತಿನ ಜಂಟಿ ಅಧಿವೇಶನದಲ್ಲಿ ಮಾಡಿದ ಭಾಷಣದಲ್ಲಿ ತ್ರಿವಳಿ ತಲಾಖ್ ಮಸೂದೆಯನ್ನು ಜಾರಿಗೊಳಿಸುವಂತೆ ರಾಜಕೀಯ ಪಕ್ಷಗಳಿಗೆ ರಾಷ್ಟ್ರಪತಿ ರಾಮನಾಥ ಕೋವಿಂದ್ ಒತ್ತಾಯಿಸಿದರು.

ಜೂನ್ 20, 2019: ರಾಜ್ಯಸಭೆಯಲ್ಲಿ ಮುಸ್ಲಿಂ ಮಹಿಳೆಯರ (ವಿವಾಹದ ಹಕ್ಕುಗಳ ರಕ್ಷಣೆ) ಮಸೂದೆ, 2019 ಅನ್ನು ಮಂಡಿಸಿದ ಸರ್ಕಾರ.

ಜೂನ್ 21, 2019: ಲೋಕಸಭೆಯಲ್ಲಿ ಮುಸ್ಲಿಂ ಮಹಿಳೆಯರ (ವಿವಾಹದ ಹಕ್ಕುಗಳ ರಕ್ಷಣೆ) ಮಸೂದೆ, 2019 ಅನ್ನು ಮಂಡಿಸಿದ ಸರ್ಕಾರ.

ಜುಲೈ 25, 2019: ಸಭೆಯಿಂದ ಹೊರನಡೆದ ಪ್ರತಿಪಕ್ಷಗಳು. ಲೋಕಸಭೆ ತ್ರಿವಳಿ ತಲಾಖ್ ಮಸೂದೆ ಅಂಗೀಕಾರ.

ಜುಲೈ 30, 2019: ರಾಜ್ಯಸಭೆಯಲ್ಲಿ ತ್ರಿವಳಿ ತಲಾಖ್ ಮಸೂದ ಅಂಗೀಕಾರ.

ಆಗಸ್ಟ್ 1, 2019: ಮುಸ್ಲಿಂ ಮಹಿಳೆಯರ ವಿವಾಹದ ಹಕ್ಕುಗಳ ರಕ್ಷಣೆ ಮಸೂದೆ, 2019 ಜಾರಿ. ತ್ರಿವಳಿ ತಲಾಖ್ ನಿಷೇಧಿಸುವ ಕಾನೂನಿನ ಅನುಷ್ಠಾನ.

ಇದಾದ ಬಳಿಕ ರಾಷ್ಟ್ರ ರಾಜಧಾನಿಯಲ್ಲಿ ಭಾರತೀಯ ಮುಸ್ಲಿಂ ಮಹಿಳಾ ಆಂದೋಲನ್ (ಬಿಎಂಎಂಎ) ಎರಡು ದಿನಗಳ ಸಮ್ಮೇಳನವನ್ನು ಆಯೋಜಿಸಿತ್ತು. 2019ರ ನವೆಂಬರ್‌ನಲ್ಲಿ ಮಹಾರಾಷ್ಟ್ರ, ತಮಿಳುನಾಡು, ತೆಲಂಗಾಣ ಸೇರಿದಂತೆ 10 ರಾಜ್ಯಗಳ ಸುಮಾರು 50 ಮುಸ್ಲಿಂ ಮಹಿಳೆಯರು ಆ ಸಮ್ಮೇಳನದಲ್ಲಿ ಭಾಗವಹಿಸಿದ್ದರು.

ಅವರು ತಮ್ಮ ಗಂಡಂದಿರ ವಿರುದ್ಧ ತ್ರಿವಳಿ ತಲಾಖ್ ನೀಡಿದ್ದಕ್ಕಾಗಿ ದೂರುಗಳನ್ನು ಸಲ್ಲಿಸಲು ಪ್ರಯತ್ನಿಸಿದ ಬಳಿಕ ಅವರು ಕಾನೂನು ವ್ಯವಸ್ಥೆಯೊಂದಿಗಿನ ತಮ್ಮ ಹೋರಾಟವನ್ನು ವಿವರಿಸಿದರು.

ಸಮ್ಮೇಳನದಲ್ಲಿ ಕೆಲವು ಮಹಿಳೆಯರು ಎಫ್‌ಐಆರ್ ದಾಖಲಿಸಲು ಪೊಲೀಸರಿಗೆ ಮನವರಿಕೆ ಮಾಡಿಕೊಡಲು ಬಹಳ ಸಮಯ ತೆಗೆದುಕೊಳ್ಳುತ್ತದೆ ಮತ್ತು ಅವರು ಅದನ್ನು ನೋಂದಾಯಿಸಿದ ನಂತರವೂ ನ್ಯಾಯಾಲಯದ ವಿಚಾರಣೆಗಳು ಬಹಳ ಸಮಯ ತೆಗೆದುಕೊಳ್ಳುತ್ತದೆ ಎಂದರು.

ಈ ಕಾನೂನು ಜಾರಿಗೆ ಬಂದಾಗಿನಿಂದ ತ್ರಿವಳಿ ತಲಾಖ್ ಪ್ರಕರಣಗಳು ಶೇ.82ರಷ್ಟು ಕುಸಿತ ಕಂಡಿವೆ ಎಂದು ಮಸೂದೆಯ ಅನುಷ್ಠಾನದ ಕುರಿತು ಸಚಿವ ಮುಖ್ತಾರ್ ಅಬ್ಬಾಸ್ ನಖ್ವಿ ಹೇಳಿದ್ದಾರೆ.