ಅಯ್ಯೋ ದುರ್ವಿಧಿಯೇ... 3 ತಿಂಗಳ ಮಗುವನ್ನೇ ಬಲಿ ಪಡೆಯಿತು ರಕ್ಕಸ ಅಂಫಾನ್ ಚಂಡಮಾರುತ!

ರಕ್ಕಸ ಅಂಫಾನ್ ಚಂಡಮಾರುತ ಒಡಿಶಾದಲ್ಲಿ ಮೂರು ತಿಂಗಳ ಮಗುವನ್ನೇ ಬಲಿ ಪಡೆದಿದೆ. ಹೆಮ್ಮಾರಿ ಚಂಡಮಾರುತಕ್ಕೆ ಒಡಿಶಾದಲ್ಲಿ ಈಗಾಗಲೇ ಲಕ್ಷಾಂತರ ಜನರು ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಭದ್ರಾಕ್(ಒಡಿಶಾ):ಇಂದು ಸಂಜೆ ವೇಳೆಗೆ ಪಶ್ಚಿಮ ಬಂಗಾಕ್ಕೆ ಅಪ್ಪಳಿಸಲಿರುವ ಅಂಫಾನ್ ಚಂಡಮಾರುತ ಮೊದಲ ಬಲಿ ಪಡೆದಿದೆ. ಒಡಿಶಾದಲ್ಲಿ 3 ತಿಂಗಳ ಗಂಡು ಮಗುವೊಂದು ಅಂಫಾನ್​ ಅಬ್ಬರದಿಂದ ಮನೆ ಗೋಡೆ ಕುಸಿದ ಪರಿಣಾಮ ಕೊನೆಯುಸಿರೆಳೆದಿದೆ.

ಅಂಫಾನ್​ ಚಂಡಮಾರುತದ ಕಾರಣ ಒಡಿಶಾದಲ್ಲಿ ಭಾರಿ ಮಳೆಯಾಗುತ್ತಿದ್ದು, ಮನೆಯ ಗೋಡೆ ಕುಸಿದು ಮೂರು ತಿಂಗಳ ಮಗು ಸಾವನ್ನಪ್ಪಿದೆ. ಜಿಲ್ಲೆಯ ತಿಹಿಡಿ ಬ್ಲಾಕ್‌ನ ಕಂಪಡಾ ಗ್ರಾಮದಲ್ಲಿ ಈ ಘಟನೆ ನಡೆದಿದೆ. ತಾಯಿ ಮತ್ತು ಮಗು ಮಲಗಿದ್ದ ಸಂದರ್ಭದಲ್ಲಿ ಈ ದುರ್ಘಟನೆ ಸಂಭವಿಸಿದೆ. ಘಟನೆಯಲ್ಲಿ ಮಗುವಿನ ತಾಯಿ ಗಾಯಗೊಂಡಿದ್ದಾಳೆ.

ಒಡಿಶಾದಲ್ಲಿ ಭೀಕರ ಚಂಡಮಾರುತದಿಂದಾಗಿ ಈಗಾಗಲೇ ಲಕ್ಷಾಂತರ ಜನ ಸಂಕಷ್ಟಕ್ಕೆ ಸಿಲುಕಿದ್ದಾರೆ.