ಅಜಿತ್ ದೋವಲ್ ಹೇಳಿಕೆ ಚೀನಾ, ಗಡಿ ಪರಿಸ್ಥಿತಿಗೆ ಸಂಬಂಧಿಸಿಲ್ಲ: ಅಧಿಕಾರಿಗಳ ಸ್ಪಷ್ಟನೆ

ಋಷಿಕೇಶದಲ್ಲಿ ಶನಿವಾರ ನಡೆದ ಧಾರ್ಮಿಕ ಸಮಾರಂಭದಲ್ಲಿ ಮಾತನಾಡಿದ್ದ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ಯಾವುದೇ ದೇಶ ಅಥವಾ ನಿರ್ದಿಷ್ಟ ಪರಿಸ್ಥಿತಿಯನ್ನು ಉಲ್ಲೇಖಿಸಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ನವದೆಹಲಿ:ರಾಷ್ಟ್ರೀಯ ಭದ್ರತಾ ಸಲಹೆಗಾರ (ಎನ್‌ಎಸ್‌ಎ) ಅಜಿತ್ ದೋವಲ್ ಕೇವಲ ನಾಗರಿಕ ಮತ್ತು ಆಧ್ಯಾತ್ಮಿಕ ಸನ್ನಿವೇಶದಲ್ಲಿ ಮಾತನಾಡುತ್ತಿದ್ದರು ಮತ್ತು ಋಷಿಕೇಶದಲ್ಲಿ ಶನಿವಾರ ನಡೆದ ಧಾರ್ಮಿಕ ಸಮಾರಂಭದಲ್ಲಿ ಯಾವುದೇ ದೇಶ ಅಥವಾ ನಿರ್ದಿಷ್ಟ ಪರಿಸ್ಥಿತಿಯನ್ನು ಉಲ್ಲೇಖಿಸಿಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಆಧ್ಯಾತ್ಮಿಕ ಸನ್ನಿವೇಶದಲ್ಲಿ ಮಾಡಿದ ಎನ್‌ಎಸ್‌ಎ ಹೇಳಿಕೆಯನ್ನು ತಿರುಚುವ ಪ್ರಯತ್ನ ಮಾಡಲಾಗಿದೆ. ಅವರು ಚೀನಾ ಬಗ್ಗೆ ಅಥವಾ ಪೂರ್ವ ಲಡಾಕ್ ವಲಯದಲ್ಲಿ ನಡೆಯುತ್ತಿರುವ ಸಂಘರ್ಷದ ಬಗ್ಗೆ ಮಾತನಾಡದ ಕಾರಣ ಹೇಳಿಕೆಯನ್ನು ಅಳಿಸಲಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಅಕ್ಟೋಬರ್ 24ರಂದು ಋಷಿಕೇಶದ ಪರಮಾರ್ಥ್ ನಿಕೇತನ್ ಆಶ್ರಮದಲ್ಲಿದ್ದ ದೋವಲ್ ಅವರು ಭಾರತದ ಆಧ್ಯಾತ್ಮಿಕ ಶಕ್ತಿಯ ಬಗ್ಗೆ ಅಲ್ಲಿನ ಭಕ್ತರನ್ನು ಉದ್ದೇಶಿಸಿ ಮಾತನಾಡಿದ್ದರು. ಅಲ್ಲಿ ಅವರು ಸ್ವಾಮಿ ವಿವೇಕಾನಂದ ಅವರನ್ನೂ ಉಲ್ಲೇಖಿಸಿದ್ದಾರೆ.

"ನಾವು ಯಾರ ಮೇಲೂ ದಾಳಿ ಮಾಡಿಲ್ಲ ಎಂದು ನೀವು ಹೇಳಿದ್ದೀರಿ ಮತ್ತು ಅದರ ಬಗ್ಗೆ ಅನೇಕ ಅಭಿಪ್ರಾಯಗಳಿವೆ. ದೇಶಕ್ಕೆ ಬೆದರಿಕೆ ಇದ್ದರೆ ದೇಶವನ್ನು ಉಳಿಸುವುದು ಮುಖ್ಯವಾದ್ದರಿಂದ ನಾವು ದಾಳಿ ಮಾಡಬೇಕಾಗುತ್ತದೆ" ಎಂದು ಹೇಳಿದ್ದರು.

"ನಾವು ಎಲ್ಲಿ ಹೋರಾಡಬೇಕೆಂದು ನೀವು ಬಯಸುತ್ತೀರೋ ಅಲ್ಲಿ ಹೋರಾಡುತ್ತೇವೆ, ಅದು ಸಹ ಕಡ್ಡಾಯವಲ್ಲ. ಬೆದರಿಕೆ ಬರುತ್ತಿದೆ ಎಂದು ನಾವು ಭಾವಿಸುವ ಸ್ಥಳದಲ್ಲಿ ಹೋರಾಡುತ್ತೇವೆ. ಸ್ವಾರ್ಥ ಕಾರಣಗಳಿಗಾಗಿ ನಾವು ಎಂದಿಗೂ ದಾಳಿ ಮಾಡಿಲ್ಲ. ನಮ್ಮ ಭೂಮಿ ಮತ್ತು ಇತರರ ಭೂಮಿಯಲ್ಲೂ ನಾವು ಯುದ್ಧ ಮಾಡುತ್ತೇವೆ. ಆದರೆ ನಮ್ಮ ಸ್ವಾರ್ಥ ಕಾರಣಗಳಿಗಲ್ಲ. ಅದರ ಹಿಂದೆ ಉತ್ತಮ ಉದ್ದೇಶ ಇರುತ್ತದೆ" ಎಂದು ದೋವಲ್ ಹೇಳಿದ್ದರು.