ಹೊಸದಿಲ್ಲಿ: ಪ್ರಸಕ್ತ ವರ್ಷದ ಮುಂಗಾರು ಮಳೆ ಸಾಮಾನ್ಯವಾಗಿರಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಹೇಳಿದೆ. ಕಳದೊಂದು ತಿಂಗಳಿಂದ ಲಾಕ್ಡೌನ್ನಲ್ಲಿರುವ ದೇಶಕ್ಕೆ ಈ ಸುದ್ದಿ ಮುಂಗಾರು ಮಳೆ ಸುರಿದಷ್ಟೇ ಖುಷಿ ತಂದಿದೆ.
ಜೂನ್ನಿಂದ ಸೆಪ್ಟೆಂಬರ್ ಅವಧಿಯ ನೈರುತ್ಯ ಮುಂಗಾರು ದೇಶಾದ್ಯಂತ ಸರಾಸರಿಯಾಗಿ ಸಾಮಾನ್ಯವಾಗಿರಲಿದೆ ಎಂದು ತನ್ನ ಮೊದಲ ಲಾಂಗ್ ರೇಂಜ್ ಮುನ್ಸೂಚನೆಯಲ್ಲಿ ಹವಾಮಾನ ಇಲಾಖೆ ತಿಳಿಸಿದೆ.
1961 ರಿಂದ 2010 ರ ಅವಧಿಯಲ್ಲಿ ದೇಶದಲ್ಲಿ ವಾರ್ಷಿಕ ಸರಾಸರಿ 88 ಸೆಂಮೀ ಮಳೆಯಾಗುತ್ತಿದೆ. ಈ ಲೆಕ್ಕದಲ್ಲಿ ಶೇ.96 ರಿಂದ 100 ರಷ್ಟು ಪ್ರಮಾಣದ ಮಳೆಯಾಗುವಿಕೆಯನ್ನು ಸಾಮಾನ್ಯ ಮುಂಗಾರು ಎನ್ನಲಾಗುತ್ತದೆ. ಅದರಂತೆ 2020 ರ ಮಾನ್ಸೂನ್ ಅವಧಿಯಲ್ಲಿ ಶೇ.100 ರಷ್ಟು ಮಳೆಯಾಗುವ ಅಂದಾಜು ಮಾಡಲಾಗಿದೆ. ಇದರಲ್ಲಿ ಶೇ.5ರಷ್ಟು ಹೆಚ್ಚು ಕಡಿಮೆಯಾಗಬಹುದು ಎಂದು ಕೇಂದ್ರ ಭೂವಿಜ್ಞಾನ ಸಚಿವಾಲಯದ ಕಾರ್ಯದರ್ಶಿ ಮಾಧವನ್ ರಾಜೀವನ್ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.
"ಮಳೆ ಕೊರತೆಯಾಗುವ ಸಾಧ್ಯತೆಗಳು ಕೇವಲ ಶೇ.9 ರಷ್ಟು ಮಾತ್ರ ಇರುವುದು ಸಂತಸದ ವಿಚಾರವಾಗಿದ್ದು, ಈ ಬಾರಿ ಸಾಮಾನ್ಯ ಮುಂಗಾರು ನಿರೀಕ್ಷಿಸಬಹುದು" ಎಂದು ಅವರು ಮಾಹಿತಿ ನೀಡಿದರು.
ಜಾಗತಿಕ ಹವಾಮಾನ ಮಾದರಿಗಳ ಅಧ್ಯಯನದ ಪ್ರಕಾರ ಮುಂಗಾರಿನ ಎರಡನೇ ದ್ವಿತೀಯಾರ್ಧದಲ್ಲಿ ಪೆಸಿಫಿಕ್ ಸಾಗರದ ಮೇಲೆ ಎಲ್ ನಿನಾ ಪರಿಣಾಮ ದುರ್ಬಲವಾಗಿರಲಿದೆ ಎಂದು ಹವಾಮಾನ ಇಲಾಖೆ ಅಧಿಕಾರಿ ಹೇಳಿದರು.
