ಟಿಆರ್​ಪಿ ದಂಧೆ ಭೇದಿಸಿದ ಪೊಲೀಸರ ಕಾರ್ಯವೈಖರಿಗೆ ಸಂಜಯ್ ರಾವತ್​ ಶ್ಲಾಘನೆ

ಬೇಕಾದ ಹಾಗೆ ಸುದ್ದಿವಾಹಿನಿಗಳ ಟಿಆರ್​ಪಿ ಬದಲಾಯಿಸುವ ಜಾಲವನ್ನ ಭೇದಿಸಿರುವ ಮುಂಬೈ ಪೊಲೀಸರ ಕಾರ್ಯವೈಖರಿಗೆ ಶಿವಸೇನೆ ಮುಖಂಡ ಸಂಜಯ್ ರಾವತ್ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಇದು ಕೇವಲ ಆರಂಭ, ಶೀಘ್ರದಲ್ಲೇ ಎಲ್ಲವೂ ಬಯಲಾಗಲಿದೆ ಎಂದಿರುವ ರಾವತ್, ಪೊಲೀಸರು ಪ್ರತೀಕಾರ ತೀರಿಸಿಕೊಂಡಿದ್ದಾರೆ ಎಂಬ ಆರೋಪವನ್ನು ತಳ್ಳಿಹಾಕಿದ್ದಾರೆ.

ಮುಂಬೈ:ಟೆಲಿವಿಷನ್ ರೇಟಿಂಗ್ ಪಾಯಿಂಟ್ಸ್ (ಟಿಆರ್​ಪಿ) ಮ್ಯಾನಿಪ್ಯುಲೇಷನ್ ದಂಧೆಯ ಪ್ರಕರಣವನ್ನು ಭೇದಿಸಿದ ಮುಂಬೈ ಪೊಲೀಸರ ಕಾರ್ಯವೈಖರಿಗೆ ಶಿವಸೇನೆ ಮುಖಂಡ ಸಂಜಯ್ ರಾವತ್​ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.

ಟಿಆರ್​ಪಿ ದಂಧೆಯನ್ನು ಬಯಲು ಮಾಡುವಲ್ಲಿ ಮುಂಬೈ ಪೊಲೀಸರು ತೋರಿದ ಧೈರ್ಯವನ್ನು ಬಣ್ಣಿಸಿರುವ ಸಂಜಯ್ ರಾವತ್, ಇದು ಯಾವುದೇ ರೀತಿಯ ಮತ್ತು ಯಾರ ವಿರುದ್ಧದ ಪ್ರತೀಕಾರವಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಟಿಆರ್​ಪಿ ಹಗರಣವನ್ನು ಜನರ ಮುಂದಿಡಲು ಮುಂಬೈ ಪೊಲೀಸರು ಹೊಸ ಹೆಜ್ಜೆ ಇಟ್ಟಿದ್ದಾರೆ. ಇದು ಕೇವಲ ಆರಂಭ, ಶೀಘ್ರದಲ್ಲೇ ಎಲ್ಲವೂ ಬಯಲಾಗಲಿದೆ ಎಂದು ಪೊಲೀಸರು ಪ್ರತೀಕಾರ ತೀರಿಸಿಕೊಂಡಿದ್ದಾರೆ ಎಂಬ ಆರೋಪಕ್ಕೆ ಮತ್ತಷ್ಟು ಟ್ವಿಸ್ಟ್​ ಕೊಟ್ಟರು.

30,000 ಕೋಟಿ ರೂ.ಗಳ ಹಗರಣ ನಡೆದರೂ ಮುಂಬೈ ಜನರು ಶಾಂತವಾಗಿರುವುದೇಕೆ? ಎಂದು ಪ್ರಶ್ನಿಸಿರುವ ಸಂಜಯ್ ರಾವತ್, ಈ ದಂಧೆಯ ಹಿಂದೆ ಯಾರು ಅಡಗಿದ್ದಾರೆ? ಇಷ್ಟು ದೊಡ್ಡ ಮೊತ್ತದ ಹಣ ಎಲ್ಲಿಂದ ಬಂತು? ಎಂದು ಕೇಳುವ ಮೂಲಕ ಟಿಆರ್​ಪಿ ದಂಧೆ ಕುರಿತು ಕಿಡಿ ಕಾರಿದರು.

ಮುಂಬೈ ಪೊಲೀಸರು ಅವರ ಕೆಲಸ ಅವರು ಮಾಡಿದ್ದಾರೆ. ಅದು ಅವರ ವೃತ್ತಿಪರತೆಯಷ್ಟೇ. ಸೇಡು ಅಥವಾ ಪ್ರತೀಕಾರದಿಂದ ಅವರು ಈ ಕ್ರಮ ಕೈಗೊಂಡಿಲ್ಲ. ಮಹಾ ವಿಕಾಸ್ ಅಘಾಡಿ (ಎಂವಿಎ) ಸರ್ಕಾರ ಮತ್ತು ಠಾಕ್ರೆ ಕುಟುಂಬವನ್ನು ಗುರಿಯಾಗಿಸಿಕೊಂಡು ಕೆಲವು ಟಿವಿ ಚಾನೆಲ್​ಗಳು ಹೇಗೆ ಬೇಕೋ ಹಾಗೆ ಸುದ್ದಿಗಳನ್ನು ತಿರುಚಿ ಬಿತ್ತರಿಸಿವೆ. ಇದು ಪ್ರತೀಕಾರವಲ್ಲವೇ? ಎಂದು ರಾವತ್ ಪ್ರಶ್ನಿಸಿದ್ದಾರೆ.