'ಘಟನೆ ವೇಳೆ ಬಾಲಾಪರಾಧಿಯಾಗಿದ್ದೆ!' ಸುಪ್ರೀಂನಿಂದ ನಿರ್ಭಯಾ ಅಪರಾಧಿಯ ಅರ್ಜಿ ವಿಚಾರಣೆ

ನಿರ್ಭಯಾ ಅತ್ಯಾಚಾರ ಹಾಗೂ ಕೊಲೆ ಪ್ರಕರಣದ ಅಪರಾಧಿಗಳಲ್ಲಿ ಒಬ್ಬನಾದ ಪವನ್​ ಗುಪ್ತಾ, 2012 ರಲ್ಲಿ ಘಟನೆ ನಡೆದ ವೇಳೆ ತಾನು ಬಾಲಾಪರಾಧಿಯಾಗಿದ್ದೆ ಎಂದು ಈ ಹಿಂದೆ ಸಲ್ಲಿಸಿದ್ದ ಅರ್ಜಿಯನ್ನು ದೆಹಲಿ ಹೈಕೋರ್ಟ್​ ತಿರಸ್ಕರಿಸಿತ್ತು. ಈ ಆದೇಶ ಪ್ರಶ್ನಿಸಿರುವ ಪವನ್ ಗುಪ್ತಾ, ಅಪೆಕ್ಸ್​ ಕೋರ್ಟ್​ಗೆ 'ಸ್ಪೆಷಲ್​ ಲೀವ್​ ಪಿಟಿಷನ್​' (SLP) ಸಲ್ಲಿಸಿದ್ದಾನೆ.

ನವದೆಹಲಿ: ನಿರ್ಭಯಾ ಅತ್ಯಾಚಾರ ಹಾಗೂ ಕೊಲೆ ಪ್ರಕರಣ ಸಂಬಂಧ 2012 ರಲ್ಲಿ ಘಟನೆ ನಡೆದ ವೇಳೆ ತಾನು ಬಾಲಾಪರಾಧಿಯಾಗಿದ್ದೆ ಎಂದು ಅಪರಾಧಿಯೊಬ್ಬ ಸಲ್ಲಿಸಿದ್ದ ಅರ್ಜಿಯನ್ನು ದೆಹಲಿ ಹೈಕೋರ್ಟ್​ ತಿರಸ್ಕರಿಸಿತ್ತು. ಇದೀಗ ಅದೇ ಅರ್ಜಿಯ ವಿಚಾರಣೆಯನ್ನು ಜನವರಿ 20 ರಂದು ಸುಪ್ರೀಂಕೋರ್ಟ್​ ನಡೆಸಲಿದೆ.

ಪ್ರಕರಣದ ಅಪರಾಧಿಗಳಲ್ಲಿ ಒಬ್ಬನಾದ ಪವನ್​ ಗುಪ್ತಾ, 2012 ರಲ್ಲಿ ಘಟನೆ ನಡೆದ ವೇಳೆ ತಾನು ಬಾಲಾಪರಾಧಿಯಾಗಿದ್ದೆ ಎಂದು ಈ ಹಿಂದೆ ಸಲ್ಲಿಸಿದ್ದ ಅರ್ಜಿಯನ್ನು ತಿರಸ್ಕರಿಸಿದ್ದ ದೆಹಲಿ ಹೈಕೋರ್ಟ್​ ಆದೇಶದ ವಿರುದ್ಧ ನಿನ್ನೆ ಅಪೆಕ್ಸ್​ ಕೋರ್ಟ್​ಗೆ 'ಸ್ಪೆಷಲ್​ ಲೀವ್​ ಪಿಟಿಷನ್​' (SLP) ಸಲ್ಲಿಸಿದ್ದಾನೆ. ನ್ಯಾ.ಆರ್​ ಬಾನುಮತಿ ನೇತೃತ್ವದಲ್ಲಿ ಮೂವರು ನ್ಯಾಯಧೀಶರ ಪೀಠ ಹಾಗೂ ನ್ಯಾ.ಅಶೋಕ್ ಭೂಷಣ್​​ ಮತ್ತು ನ್ಯಾ. ಎ ಎಸ್ ಬೋಪಣ್ಣ​​ ಜನವರಿ 20 ರಂದು ಅರ್ಜಿಯ ವಿಚಾರಣೆ ನಡೆಸಲಿದ್ದಾರೆ.

ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಅಪರಾಧಿ ಪರ ವಕೀಲ ಎ.ಪಿ. ಸಿಂಗ್, ಶಾಲಾ ದಾಖಲೆಗಳ ಪ್ರಕಾರ ಪವನ್​ ಗುಪ್ತಾ ಜನ್ಮದಿನಾಂಕ 1996 ರ ಅಕ್ಟೋಬರ್​ 8 ಆಗಿದ್ದು, ವಿಚಾರಣೆ ವೇಳೆ ದೆಹಲಿ ಹೈಕೋರ್ಟ್​ ಇದನ್ನು ನಿರಾಕರಿಸಿತ್ತು ಎಂದು ಹೇಳಿದ್ದಾರೆ.

ಇನ್ನು ನಿನ್ನೆಯಷ್ಟೇ ಪ್ರಕರಣದ ಅಪರಾಧಿಗಳಾದ ವಿನಯ್​ ಶರ್ಮಾ(26), ಮುಖೇಶ್​ ಕುಮಾರ್​ (32), ಅಕ್ಷಯ್​ ಕುಮಾರ್​ ಸಿಂಗ್​ (31) ಹಾಗೂ ಪವನ್ ಗುಪ್ತಾ (25)ಗೆ ದೆಹಲಿ ಕೋರ್ಟ್ ಹೊಸದಾಗಿ ಡೆತ್​ ವಾರೆಂಟ್​ ನೀಡಿದ್ದು, ಫೆ.1 ರಂದು ಗಲ್ಲು ಶಿಕ್ಷೆ ನಿಗಧಿಯಾಗಿದೆ.