ಆರ್ಥಿಕತೆ ಸುಧಾರಿಸಲು ಮನ್ರೇಗಾ, ನ್ಯಾಯ್​​ ಯೋಜನೆ ಅನುಷ್ಠಾನ ಅತ್ಯಗತ್ಯ: ರಾಗಾ ಪ್ರತಿಪಾದನೆ

ಮನ್ರೇಗಾ ಮತ್ತು ನ್ಯಾಯ್ ಯೋಜನೆಗಳನ್ನು ಕಾರ್ಯಗತಗೊಳಿಸುವುದರಿಂದ ನಿರುದ್ಯೋಗ, ಬಡತನದಂತಹ ಸಾಮಾಜಿಕ ಪಿಡುಗುಗಳ ನಿವಾರಣೆಯಾಗುತ್ತದೆ. ಅಲ್ಲದೇ ಆರ್ಥಿಕತೆ ಸುಧಾರಿಸುತ್ತದೆ ಎಂದು ರಾಹುಲ್ ಗಾಂಧಿ ಪ್ರತಿಪಾದಿಸಿದ್ದಾರೆ.

ನವದೆಹಲಿ:ನಗರಗಳಲ್ಲಿನ ನಿರುದ್ಯೋಗ ಸಮಸ್ಯೆ ನಿವಾರಣೆಗೆ ಮತ್ತು ದೇಶಾದ್ಯಂತ ಇರುವ ಬಡವರಿಗೆ ಸಹಾಯ ಮಾಡಲು ಮನ್ರೇಗಾ ಮತ್ತು ನ್ಯಾಯ್ ನಂತಹ ಯೋಜನೆಗಳನ್ನ ಕಾರ್ಯಗತಗೊಳಿಸುವ ಅಗತ್ಯವಿದೆ ಎಂದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಹೇಳಿದ್ದಾರೆ.

ಕೋವಿಡ್​ ಬಿಕ್ಕಟ್ಟಿನಿಂದಾಗಿ ನಗರ ಪ್ರದೇಶಗಳಲ್ಲಿ ಹೆಚ್ಚುತ್ತಿರುವ ನಿರುದ್ಯೋಗ ಸಮಸ್ಯೆಗೆ ಪರಿಹಾರವಾಗಿ ಮಹಾತ್ಮಾ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯ (MGNREGA) ತನ್ನ ವ್ಯಾಪ್ತಿಯ ವಿಸ್ತರಿಸುವ ಅವಶ್ಯಕತೆ ಇದೆ. ಹಾಗೆಯೇ ಬಡ ಜನರಿಗೆ ನೆರವಾಗಲು ನ್ಯಾಯ್ (NYAY-Nyuntam Aay Yojana) - ಈ ಎರಡು ಯೋಜನೆಗಳನ್ನು ಅನುಷ್ಠಾನಕ್ಕೆ ತರುವುದು ಸದ್ಯದ ಅವಶ್ಯಕತೆಯಾಗಿದೆ ಎಂದು ರಾಹುಲ್ ಗಾಂಧಿ ಟ್ವೀಟ್​ ಮಾಡಿದ್ದಾರೆ.

ಈ ಯೋಜನೆಗಳನ್ನು ಕಾರ್ಯಗತಗೊಳಿಸುವುದರಿಂದ ಆರ್ಥಿಕತೆ ಸುಧಾರಿಸುತ್ತದೆ. ಸೂಟು - ಬೂಟು - ಲೂಟಿ ಸರ್ಕಾರಕ್ಕೆ ಬಡವರ ನೋವು ಅರ್ಥಮಾಡಿಕೊಳ್ಳಲು ಸಾಧ್ಯವೇ? ಎಂದು ಕೇಳಿರುವ ರಾಗಾ, ಮನ್ರೇಗಾ ಬೇಡಿಕೆ ಹೆಚ್ಚಳದ ಕುರಿತ ಗ್ರಾಫ್ ಒಂದನ್ನು ಹಂಚಿಕೊಂಡಿದ್ದಾರೆ.

ಕೋವಿಡ್​ ಲಾಕ್‌ಡೌನ್ ಅವಧಿಯಲ್ಲಿ, ಬಡವರಿಗೆ ಸಹಾಯ ಮಾಡಲು ಎಲ್ಲರ ಜನ ಧನ್, ಪಿಎಂ - ಕಿಸಾನ್ ಹಾಗೂ ಪಿಂಚಣಿ ಖಾತೆಗಳಿಗೆ 7,500 ರೂ. ಹಣ ಜಮೆ ಮಾಡುವಂತೆ ಕೇಂದ್ರ ಸರ್ಕಾರಕ್ಕೆ ಕಾಂಗ್ರೆಸ್​ ಒತ್ತಾಯಿಸಿತ್ತು ಎಂದರು. 2019 ರ ಲೋಕಸಭಾ ಚುನಾವಣೆ ವೇಳೆ ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ನ್ಯಾಯ್ ಯೋಜನೆಯನ್ನು ಜಾರಿಗೆ ತರುವ ಭರವಸೆಯನ್ನ ಕಾಂಗ್ರೆಸ್​​​​​ ನೀಡಿತ್ತು. ನ್ಯಾಯ್- ಬಡಜನರ ಖಾತೆಗಳಿಗೆ ಪ್ರತಿವರ್ಷ 72 ಸಾವಿರ ರೂ. ಹಣ ಜಮೆ ಮಾಡುವುದಾಗಿ ಘೋಷಿಸಿತ್ತು.